Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Дарова́нии боже́ственными обога́щся, да́р я́ко многоце́нен, Творцу́, о́тче, себе́ приве́л еси́. Те́мже мо́й облагодати́ по́мысл, восхваля́ющу твою́ дне́сь па́мять светоно́сную и житие́ равноа́нгельное.

Я́ко напита́вся боже́ственными добро́тами, взя́л еси́ на ра́мо твое́ по́стнически кре́ст, Фео́доре, и после́довал еси́ во́льное тебе́ ра́ди Претерпе́вшему распя́тие, блаже́нне, стра́сти умертви́в теле́сныя.

Кре́пко, о́тче, проти́ву врага́ ополчи́вся, и, кре́стным ору́жием огражде́н, сего́ смири́л еси́, смири́вся и му́дре возноша́емь. Те́мже победоно́сец яви́лся еси́ и преподо́бных равностоя́тель.

Богоро́дичен: Спа́сшиися, Де́во, Тебе́ ра́ди, Пренепоро́чную в жена́х и Бо́жию Роди́тельницу пе́сньми ублажа́ем, и почита́ем, и согла́сно зове́м: ра́дуйся, вино́вная пра́дедняго назда́ния.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Процве́л еси́ в поро́де воздержа́ния, преподо́бне, я́ко ши́пок благово́нен, сердца́ благоуха́я на́м боже́ственным твои́м житие́м, пресла́вне.

Кре́постию возмога́емь Спа́совою, ше́ствовал еси́ те́сным, сла́вне, жесто́ким и ско́рбным путе́м и к широте́ Вы́шняго Сио́на дости́гл еси́.

Ви́дится тво́й гро́б, благово́нно ми́ро благода́тию источа́я, преподо́бне, и пропове́дует Бо́гу бы́вша тя́ благово́ние, о́тче свяще́нне.

Богоро́дичен: Черто́г безсме́ртия Твое́ чре́во бы́сть, из него́же Жени́х Госпо́дь возсия́в, Де́во Пречи́стая, преподо́бных ли́к Себе́ собра́.

Седа́лен, гла́с 4.

Я́ко чи́ст, к чи́стому присту́пль ча́стыми моли́твами и чистото́ю, освяти́лся еси́ Ду́хом, Фео́доре, отону́дуже со а́нгелы ны́не водворя́яся, пое́ши пе́снь трисвяту́ю все́х Влады́це. Те́мже моли́, преподо́бне, Христа́ поми́ловати любо́вию чту́щих тя́.

Сла́ва, и ны́не, богоро́дичен: По Бо́зе во Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу; моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Воздержа́ния ча́стыми я́звами ура́нил еси́ стра́сти Еги́пта и наста́вил еси́, Фео́доре, к земли́ небе́сней благоче́стно и преподо́бно после́дующия тебе́.

Истка́нии доброде́тельными соде́лал еси́, Фео́доре, себе́ уго́дну и чисте́йшую оде́жду, в ню́же оде́явся, в черто́г вы́шний вше́л еси́.

Изсуше́нием, се́туя, соверша́л еси́, Фео́доре, власяны́ми истка́ньми твою́ пло́ть покрыва́я, отону́дуже ти́ возсия́ мы́сленное весе́лие Боже́ственным Ду́хом.

Богоро́дичен: В ча́с мя́ стра́шный, Пречи́стая, суди́ма спаси́ и изба́ви, гее́нны исхити́, я́ко да ублажа́ю Тя́ и по до́лгу честву́ю, Непоро́чная.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Житие́ равноа́нгельное восприе́м на земли́, преподо́бне, по́стнически вся́ким озлобле́нием умертви́л еси́ страсте́й воста́ния, богому́дре Фео́доре.

Ча́с Суда́ помышля́я всегда́, отри́нул еси́ от души́ со́н уны́ния, у́тренюя к Бо́гу и боже́ственною любо́вию удобря́емь.

Любя́ Вы́шния оби́тели, я́ко мона́х и́стинен, воздви́гл еси́ на земли́ оби́тели мона́шествующим, в ни́хже тобо́ю насажде́ни бы́вше почита́ют тя́, преподо́бне.

Богоро́дичен: Еди́на родила́ еси́ ипоста́сную Жи́знь, Пречи́стая, Творца́ все́х и Влады́ку, Его́же лю́бяще, мно́жество оте́ц преподо́бных преподо́бно пожи́ша.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Просве́щся виде́нии лу́чшими, от все́х земны́х ду́шу обнажи́л еси́ и о Бо́зе упраздни́лся еси́ непреста́нными поуче́нии, Фео́доре.

Све́тлаго твоего́ жития́ све́тлостию поднебе́сная освети́шася, блаже́нне, восто́чнаго со́лнца светосия́нную тя́ звезду́ пропове́дающе.

Мра́зом и сту́дению утесня́емь, и́же к Бо́гу огрева́лся еси́ манове́нии и зи́му отгна́л еси́ страсте́й боже́ственною теплото́ю, Фео́доре.

Богоро́дичен: Я́ко добру́, я́ко красну́ я́вльшуюся, Сло́во кра́сное возлюби́, Чи́стая, и в Твою́ утро́бу всели́ся в на́ше, ве́рных, избавле́ние.

Конда́к, гла́с 4.

Яви́лся еси́ преди́вен житие́м, Фео́доре му́дре о́тче, власяны́ми ру́бы измени́в па́че ца́рских сокро́вищ, я́же на земли́, сего́ ра́ди небе́сную оде́жду восприя́л еси́, при́сно моли́ о на́с, преподо́бне.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Миродохнове́н бы́л еси́ доброде́тельными твои́ми обе́ты, Фео́доре, и ми́ро благово́нно от честны́х твои́х моще́й источа́еши на́м, ве́рно чту́щим тя́, ду́ши и сердца́ благоуха́я, преподо́бне.

Я́ко а́гнец незло́бив, воспита́н на зла́це воздержа́ния, преподо́бне, всели́лся еси́ во огра́ду небе́сную весели́тися с нача́льным Па́стырем, те́мже твоя́ о́вцы при́сно помина́й.

Ка́плями сле́з твои́х погаси́л еси́ вря́щую телесе́ пе́щь, свяще́нне, огне́м Боже́ственнаго Ду́ха распала́емь, свети́льник до́блести и све́т су́щим во тме́, о́тче, бы́л еси́.

Богоро́дичен: Показа́ купина́ Тя́, повива́ема огне́м, Пренепоро́чная, ника́коже опаля́ема у́бо, О́гнь бо носи́ла еси́ Божества́, И́же неопа́льну Тя́ соблюде́, Чи́стая, и по рождестве́ Де́ву нетле́нну.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Скве́рну отмы́л еси́ души́ сле́зными тече́нии и пото́к пи́щный насле́довал еси́ и кро́тких зе́млю, я́ко кро́ток, преподо́бне, и незло́бив, и пра́вдою я́ве укра́шен.

Сво́йственными к Бо́гу взира́нии при́сно просвеща́емь, непреткнове́нно премину́л еси́ страстны́я по́мыслы и все́ омраче́ние теле́сное и к све́ту преше́л еси́ безстра́стия, о́тче.

Да и́стинному жела́нию присту́пиши, возде́ржник, и смиренному́др, и долготерпели́в яви́лся еси́, и ми́лостив вои́стинну, власяны́ми ру́бы покрыва́яся и де́монскую обнажа́я пре́лесть.

Богоро́дичен: Украси́вшися добро́тами доброде́телей и ря́сны преиспещре́нна златы́ми, Де́во, я́же па́че все́х челове́к красне́йшаго Сло́ва породила́ еси́. Его́же пое́т преподо́бных мно́жество во ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Распе́н пло́ть твою́ стра́хом Влады́ки твоего́, умертви́лся еси́ ми́ру, о́тче Фео́доре, и ны́не преше́л еси́, ра́дуяся, к жи́зни живы́х, треблаже́нне, прича́стием обоже́н и све́та при́сно исполня́емь.

Де́нь пра́зднственный и испо́лнен свяще́ния, твою́ боже́ственную па́мять соверша́ем дне́сь: ты́ бо све́та и дне́ я́ко вои́стинну сы́н показа́лся еси́ и во све́те невече́рнем живе́ши, ра́дуяся.

Свети́льниче светоза́рне, Бо́жия да́ра тезоимени́те, Богосия́нное свети́ло, невече́рняя заря́, доброде́телей мирополо́жниче и непрекло́нен сто́лпе мона́шествующих, ста́до твое́ изба́ви моли́твами твои́ми от вся́кия ско́рби.

Богоро́дичен: Све́та жили́ще чре́во Твое́ бы́сть, Де́во, просве́щшаго ми́р заря́ми Божества́, две́ре Со́лнца сла́вы, в жена́х прера́дованная, преподо́бных похвало́, Всесвята́я и Преблагослове́нная.