Пе́снь 1.

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Трисия́нною Богонача́льною све́тлостию просвеще́н, преподо́бне, ми́р оста́вил еси́ и страсте́й мглу́ и житие́м светле́йшим, о́тче, украси́лся еси́.

Наста́влен бы́в боже́ственным промышле́нием, Гео́ргие, к небеси́ веду́щую стезю́ ше́ствовал еси́, помо́щника стяжа́в еди́наго Благоде́теля и Всеще́драго.

Бо́гом, блаже́нне, я́ве управля́емь, сынотворе́ния благода́тию освяща́емь, соверши́л еси́, о́тче, преподо́бно и пра́ведно жи́тельство.

Богоро́дичен: Твои́м утвержде́нием и заступле́нием обога́щшеся, Богоро́дицу, Пречи́стая, испове́дающе Тя́, от треволне́ния жите́йскаго, Всенепоро́чная Де́во, спаса́емся.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Ты́ стезю́ жи́зненную, в безконе́чный ве́к, всеблаже́нне, пребыва́ющую, неукло́нно, ра́дуяся, ше́ствовал еси́ и во оби́тели ве́чныя всели́лся еси́.

Житие́ твое́ све́тло и сло́во, со́лию боже́ственною в Ду́се растворе́но, показа́ся, Гео́ргие, земледе́лания боже́ственнаго боже́ственный са́д.

Сы́н Бо́жий ты́ креще́нием бы́ти, всеблаже́нне, сподо́блен, оте́ческое насле́дил еси́ сокро́вище, жития́ чистото́ю.

Богоро́дичен: Утвержде́ние бу́ди, и прибе́жище, и покро́в, Де́во Богороди́тельнице, ве́рою к Тебе́ прибега́ющим и Бо́жию Тя́ Ма́терь пропове́дающим.

Седа́лен, гла́с 3.

Красне́йшаго Христа́ возжеле́л еси́ и теле́сныя стра́сти возненави́дел еси́, а́нгельски на земли́, Гео́ргие, пожи́в. Те́мже свято́е твое́ пра́зднуем успе́ние и облобыза́ем ра́ку моще́й твои́х, из нея́же на́м то́чиши исцеле́ния, о́тче, любо́вию чту́щим тя́.

Сла́ва, и ны́не, богоро́дичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со а́нгелом вопие́м Ти́: ра́дуйся, Благода́тная.

Крестобогоро́дичен: Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, и́же мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Испещре́н добро́тами доброде́тели и нра́вы светоно́сными, к Бо́гу возлете́л еси́, о́тче Гео́ргие.

Теку́щих, о́тче Гео́ргие, смуще́ния убежа́л еси́, к тишине́ боголюбе́зным житие́м претворя́яся.

Беззако́ния пото́цы твою́ ду́шу не возмого́ша смути́ти, сла́дости бо пото́цы тебе́ напои́ша.

Боже́ственным поуче́нием, прему́дре, всегда́ внима́я, непостоя́нная помышле́ния отри́нул еси́, о́тче Гео́ргие.

Богоро́дичен: Песносло́вяще, Чи́стая, во утро́бе Твое́й Воплоще́ннаго, и Тя́ славосло́вим, я́ко Богома́терь.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Блаже́нство и безсме́ртную жи́знь получи́л еси́, о́тче му́дре, боже́ственными восхо́ды сходя́, всеблаже́нне, наде́ждею, любо́вию и ве́рою укрепля́емь.

Украша́яся смире́нием благосты́нным, преподо́бне, к высоте́ я́ве возне́слся еси́ доброде́телей, богому́дре, земледе́лания боже́ственнаго бы́в гумно́.

Те́ла истоща́ние воздержа́нием опа́сно показа́л еси́ и чи́сто се́рдце стяжа́л еси́, и́мже сподо́бился еси́ ви́дети, о́тче, все́ми Неви́димаго.

Богоро́дичен: Я́ко непости́жное и неудобозри́мое все́м, Влады́чице, е́же па́че ума́ та́инство, Отрокови́це, Боже́ственнаго рождества́ Твоего́: су́щаго бо вои́стинну Бо́га на́м родила́ еси́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Лука́вых духо́в отгони́тель те́пл яви́лся еси́, пресла́вне о́тче Гео́ргие, Свята́го Ду́ха соде́йством я́ве укрепля́емь.

Безстра́стия украше́н дарова́нием, целому́дрия ри́зою, Гео́ргие, пресве́тло оде́ялся еси́, страсте́й отгна́в смуще́ние.

Пла́менное ору́жие преше́л еси́, му́дре, и ра́йския сла́дости сподо́бился еси́, кре́стным, Гео́ргие, обложе́н ору́жием непобеди́мым.

Богоро́дичен: На Тя́ упова́ние возложи́х, Ма́ти Присноде́во, спасе́ния моего́, и Тя́ предста́тельницу полага́ю жи́зни моея́ тве́рду и непоколеби́му.

Конда́к, гла́с 4.

Покая́ния исто́чник неисчерпа́емый, утеше́ния пода́тель неконча́емаго и умиле́ния пучи́на еси́, Ио́сифе, сле́зы на́м пода́ждь покая́ния боже́ственнаго, и́миже утеше́ние, зде́ пла́чущеся, обря́щем от Бо́га, твоея́ по́мощи прося́ще, свя́те.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Укрепи́в ду́шу си́лою Христо́вою, о́тче Гео́ргие, Того́ держа́вою отгна́л еси́ тебе́ ненави́дящих полки́, сия́ Кресто́м устраши́в, и́мже соблюда́емь пе́л еси́: благослове́н еси́, Го́споди, Бо́же оте́ц на́ших.

Блаже́н еси́, и добро́ тебе́ бу́дет ны́не, преблаже́ннейше, восприе́млющу боле́зней твои́х и подвиго́в воздая́ние и со а́нгелы вопию́щу Го́сподеви, Гео́ргие: благослове́н еси́, Го́споди, Бо́же оте́ц на́ших.

Бы́л еси́ све́тло жили́ще Христо́во, престо́л чу́вствия, о́тче, бы́в и му́дрости, святы́ни испо́лнен, ве́рою же и благода́тию сия́я, и зовы́й, Гео́ргие: благослове́н еси́, Бо́же оте́ц на́ших.

Богоро́дичен: Све́щник Све́та, и о́блак све́тел, и свяще́ния ме́сто показа́лася еси́, Неискусобра́чная, святы́х бо Свято́е Сло́во прия́ла еси́ несказа́нно, Его́же пою́ще, вопие́м Ти́: благослове́нна Бо́га пло́тию ро́ждшая.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки.

К неразори́мей жи́зни, к неувяда́ющей сла́дости, о́тче, преста́вился еси́ к присносу́щней сла́ве и к невече́рнему Све́ту: Бо́жие бо показа́лся еси́ де́лание, Его́же превозно́сим во ве́ки.

Я́ко ра́б Христо́в, я́ко слуга́ ве́рен и строи́тель Того́ та́ин, я́ко непреле́стен путево́ждь, бы́л еси́, Гео́ргие прему́дре, стра́сти врачу́я ду́ш же и теле́с.

По́лн поще́ния пло́д к гумну́ Христо́ву, о́тче, прине́слся еси́, я́коже зре́л гро́зд, небе́сными точи́лы, преблаже́нне, изгне́лся еси́, умиле́ния вино́ источа́еши на́м в твое́й па́мяти.

Богоро́дичен: Чре́ва Твоего́ Пло́д нетле́нныя мне́ жи́зни вино́вен яви́ся и сла́дости присносу́щныя, Богороди́тельнице Чи́стая. Те́мже Ти́ зову́, веселя́ся, арха́нгелов гла́с: ра́дуйся, Де́во.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Укрепля́емь ве́рою и Христо́вою си́лою, всеблаже́нне, огражде́н тве́рдо, се́ти де́монския разори́л еси́ и, си́х ловле́ний и кова́рств все́х отбе́г, Влады́це все́х предстои́ши, ра́дуяся.

Все́ жела́ние твое́, блаже́нне, к Бо́гу пренося́ и Боже́ственныя наслажда́яся добро́ты, ея́же вся́ко естество́ жела́ет, виде́нием, и дея́нием, и жития́ све́тлостию себе́ украси́л еси́, о́тче, те́мже тя́ ублажа́ем.

О на́с, ве́рою твою́ па́мять соверша́ющих, Христа́ моля́ приле́жно, о́тче, не преста́й, спасти́ся на́м напа́стей, и треволне́ния, и бу́ри, и бе́д и страсте́й, и ми́р ми́ру дарова́ти, преблаже́нне.

Богоро́дичен: Вопло́щшееся Сло́во, е́же пре́жде без пло́ти су́ще, я́ко Бо́г е́сть от Бо́га, родила́ еси́, еди́на Всепе́тая, на обновле́ние и спасе́ние все́х земноро́дных, те́мже, ве́рнии, Тя́ вси́ пе́сньми велича́ем.