Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Сла́ву безсме́ртия и нетле́ния боже́ственный вене́ц до́бре подви́гшемуся Христо́с тебе́ подаде́, Гера́симе.

Име́я Светода́теля, твои́х послу́шающа моле́ний, де́монов тму́ ума́лил еси́, о́тче Гера́симе.

Струя́ми твои́х сле́з, я́коже дре́во, о́тче, тучня́емое, плоды́ безсме́ртия произне́сл еси́, богому́дре Гера́симе.

Богоро́дичен: Пречи́стая Богоро́дице, уста́ви боле́зни се́рдца моего́, я́же Христа́ безболе́зненно, па́че ума́ же и сло́ва ро́ждшая.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Распя́тие во́льное Претерпе́вшему, преподо́бне, после́дуя, ве́сь распя́лся еси́ житию́ и страсте́м.

Возмо́гл еси́, укрепля́емь вседе́тельным, му́дре, манове́нием, кре́пкаго вся́ се́ти попра́ти, Гера́симе.

Смире́нным мудрова́нием и смире́нным, му́дре, ду́хом, ты́ укре́плься, стра́сти душетле́нныя всеконе́чно смири́л еси́.

Я́коже вели́кое со́лнце, чуде́с твои́х сия́ньми просвеща́еши все́х сердца́, ве́рно восхваля́ющих тя́.

Богоро́дичен: Родила́ еси́, Всенепоро́чная, Отцу́ Сы́на сопресто́льна и соесте́ственна, все́м вхо́ды жи́зненныя показа́вшаго.

Седа́лен, гла́с 4.

Де́монов, преподо́бне, кова́рства кре́стною благода́тию и де́йством преше́д, положе́нием бо́г бы́л еси́; те́мже тя́ ве́рно почита́ем, Гера́симе.

Богоро́дичен: Пречи́стыя ру́ки Твоя́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.

Крестобогоро́дичен: На дре́ве ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Хра́м бы́сть Ду́ха просвеще́нное, о́тче, се́рдце твое́, те́м то́чит дарова́ния, исцеля́я неду́ги Боже́ственною благода́тию.

Зако́ну Боже́ственному повину́яся, о́тче, от ю́ности после́довал еси́ Го́споду, облобыза́я безпло́тных житие́ с те́лом.

Ше́ствия твоя́, преподо́бне, к спаси́тельней стези́ испра́вишася наставле́нием Боже́ственнаго Ду́ха, в тя́, преподо́бне, все́льшагося.

Богоро́дичен: Иису́са Человеколю́бца, Его́же несказа́нно чревоноси́ла еси́, умоли́, Всенепоро́чная, спасти́ вся́, пою́щия Тя́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Умо́м очище́нным прие́м лучи́ Свята́го Ду́ха, све́т мона́шествующих бы́л еси́.

Житие́ твое́, ну́ждею естества́ сия́я, а́нгела земна́го с пло́тию тя́ показа́.

Во́д живото́чных Ду́ха испо́лнен, ре́ки источи́л еси́ чуде́с, о́тче Гера́симе.

Богоро́дичен: Я́ко ту́ча, на Тя́ сни́де, Богоро́дице, Сло́во, воплоща́емое в просвеще́ние ду́ш на́ших.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Пло́ти твоея́ немощно́е, си́лою укрепля́емо от Де́вы на́м Чи́стыя возсия́вшаго, всю́ смири́ си́лу, о́тче, вражде́бных безпло́тных, преподо́бне.

Сокруши́в мы́сленных льво́в че́люсти благода́тию, покори́л еси́ чу́вственных стремле́ния, преподо́бне; те́м повину́ется тебе́ ле́в, я́ко па́стырю благопоко́рно служа́.

Житие́ а́нгельское, мудрова́ние, о́тче, смире́нно стяжа́в о Христе́, кро́ток бы́л еси́ и ны́не всели́лся еси́ в земли́ кро́тких, ра́дости Боже́ственныя исполня́емь.

Богоро́дичен: Всели́ся в Тя́ О́тчее, Чи́стая, озаре́ние и, ро́ждься пло́тию, ми́р просвети́, и тмы́ изба́ви многобо́жия; сего́ ра́ди воспева́ем Тя́.

Конда́к, гла́с 4.

Возгоре́вся раче́нием го́рним, же́стость пусты́ни Иорда́новы, па́че все́х ми́ра сла́дких предпоче́л еси́, отону́дуже повину́ся тебе́ зве́рь да́же до сме́рти, о́тче, послу́шне и жа́лостне на гро́бе твое́м сконча́ся, просла́вльшу тя́ та́ко Бо́гу, к Нему́же моля́ся, и о на́с, о́тче Гера́симе, помина́й.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Све́т возсия́ тебе́, о́тче, и сопру́г сего́ весе́лие, в небе́сных кро́вех при́сно водворя́ему и песнопою́щу: благослове́н еси́, Го́споди Бо́же, во ве́ки.

Ту́чами сле́з напои́в твое́, богоно́се, се́рдце, доброде́тельныя прозяба́еши плоды́, и́миже сла́дость го́рнюю во ве́ки прия́л еси́ со все́ми преподо́бными.

Во усте́х нося́ пе́ние в подража́нии непреста́нно а́нгельстем, бде́нным умо́м, Гера́симе, вопия́л еси́: благослове́н еси́, Го́споди Бо́же, во ве́ки.

Богоро́дичен: О́гнь ника́коже Тя́, Богоро́дице, Божества́ опали́, Де́во, Тя́ бо купина́ иногда́ образова́ше в горе́, опаля́ема, Пречи́стая, и ника́коже сгара́ющи.

Пе́снь 8.

Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Просвеще́н предста́л еси́ Влады́це по́стническими сия́ньми, чудоно́сче Гера́симе, и безпло́тных лико́м счи́слился еси́.

В беззло́бии житие́ проводи́в, лука́ваго седа́лище отню́д охуди́л еси́, по́стников красото́, богому́дре Гера́симе.

Во оде́жду нетле́ния оде́ялся еси́ страсте́й совлече́нием, о́тче богому́дре Гера́симе, и черто́г Боже́ственный досто́йно получи́л еси́.

Богоро́дичен: Я́ко благоуха́нный кри́н, обре́т Тя́ во удо́лиих жития́ Пресу́щественный, Всечи́стая, Тобо́ю благоуха́ние ми́рови вдохну́.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Стопа́м все́х, до́бре на земли́ ходи́вших, после́дуя, любо́вь име́л еси́, ве́ру, наде́жду, ме́рность, му́дрость и неоску́дную моли́тву, воздержа́ние неизрече́нное, о́тче Гера́симе, наслажда́яся чи́стыми восхожде́нии.

О, чу́до! ка́ко, я́ко слове́сен, повинова́шеся тебе́ зве́рь повеле́нию твоему́, Гера́симе, со усе́рдием служа́, Бо́гу прославля́ющу твое́ житие́ равноа́нгельное, зна́мении, преподо́бне, и безчи́сленными дивесы́ и чудесы́?

Утвержде́ние яви́лся еси́ мона́шествующих и молча́щих, богоно́се, наказа́ние, тесне́йшую бо воздержа́ния стезю́ ше́ствовал еси́, боже́ственными наде́ждами ду́шу при́сно разширя́я. Те́мже простра́нно в се́лех избра́нных обре́л еси́ селе́ние.

Процве́л еси́, о́тче, во дво́рех Бо́га на́шего, я́ко фи́никс высокора́сленный, я́ко кипари́с, возвели́чился еси́ боже́ственными возноше́нии. Отону́дуже па́мять твою́ ве́рно вси́ пра́зднуем, в ню́же мо́лимся: искуше́ний ны́ вся́ких спаси́.

Богоро́дичен: Нося́щи Емману́ила на руку́ Твое́ю, Чи́стая, я́коже Младе́нца, Богора́дованная, вопия́ла еси́: Ча́до Мое́ сладча́йшее, ка́ко пода́м Тебе́ сосе́ц, пита́ющему вся́ческая? ка́ко повию́ Тя́ пелена́ми, мгло́ю повива́ющаго мо́ре?