Пе́снь 1.

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Просвеще́ние Тро́ическое, Иа́кове, в ду́шу прие́м, ми́ра оста́вил еси́ те́мную пре́лесть и преми́рную сла́ву получи́л еси́.

Ты́, кре́ст на ра́мо взе́м, Распе́ншемуся, преподо́бне, после́довал еси́ и, мона́шествовав прему́дре, стра́сти воздержа́нием, о́тче, изсуши́л еси́.

Вмести́телен дарова́ний Ду́ха от млады́х ногте́й твои́х сосу́д бы́л еси́ и Вы́шняго граждани́н Сио́на и насле́дник, блаже́нне Иа́кове.

Богоро́дичен: Еди́на Бо́га, все́ми су́ща невмести́ма, Тебе́ вме́стна бы́вша за бла́гость, родила́ еси́, Отрокови́це, Его́же моли́ спасти́ воспева́ющия Тя́.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Житие́ твое́ красно́, сло́во со́лию любве́, богому́дре, растворе́но, се́рдце благоумиле́нно: сего́ ра́ди тя́ ве́рою ублажа́ем.

Христа́, на́с ра́ди я́вльшагося пло́тию, Боже́ственный почита́я о́браз, гоне́ния, о́тче, претерпе́л еси́, и беды́, и ско́рби, всеблаже́нне.

Я́ко же́ртву чи́сту, тебе́ сама́го прине́сл еси́ Го́сподеви умерщвле́нием греха́ и же́ртвы безкро́вны Тому́, я́ко святи́тель зако́нен, прине́сл еси́.

Богоро́дичен: Зла́ту я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́снейшую Бо́жию Тя́, Де́во, имену́ем.

Седа́лен, гла́с 4.

Христу́ после́довал еси́, ми́р оста́вив и пло́ть покори́в воздержа́нием я́ве, преблаже́нне Иа́кове, отню́дуже свяще́нства пома́зание свято́е име́л еси́, ны́не же к невеще́ственным преста́вился еси́ лико́м, моля́ о все́х на́с, восхваля́ющих тя́.

Сла́ва, и ны́не, богоро́дичен: Еди́на, ро́ждшая Творца́ всему́, еди́на, украси́вшая челове́чество Рождество́м Твои́м, Богоневе́сто, изба́ви мя́ от се́ти льсти́ваго врага́, поста́ви мя́ на ка́мени Христо́вых хоте́ний, Того́ моля́щи приле́жно, Его́же воплоти́ла еси́.

Крестобогоро́дичен: На Кресте́ Тя́ возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко — Жи́знь все́х — вкуша́еши сме́рти, оживи́ти ме́ртвыя хотя́, я́ко Благоутро́бен?

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Всено́щными мольба́ми сла́сти теле́сныя умертви́в, безстра́стия яви́лся еси́ свети́льник неусы́пный, преподо́бне.

Сле́з тече́ньми всегда́ омыва́яся, преблаже́нне, чи́сто прия́телище яви́лся еси́ Свята́го Ду́ха.

Смире́н же, и кро́ток, и сострада́телен, и незло́бив, и целому́др святи́тель, преподо́бне, бы́л еси́.

Богоро́дичен: Неискусобра́чная Влады́чице, Я́же Бо́га во чре́ве заче́нши, напа́стей и печа́лей вся́ изба́ви.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Сла́вы жела́ний вои́стинну, е́же в челове́цех высо́каго, преподо́бне, прея́вственно, о́тче, возгнуша́лся еси́ и бы́л еси́ свети́льник, смиренному́дрия сия́я све́тлостию.

Воздержа́нием мно́гим и во бде́нии приле́жнем, преподо́бне, в моли́тве и в злострада́нии взыска́л еси́ Бо́га, тя́ к Вы́шним оби́телем преложи́вшаго.

Упражня́я себе́ всено́щными моли́твами, стоя́л еси́, душе́вным о́ком Боже́ственныя прие́мля зари́, о́тче святи́телю богому́дре Иа́кове.

Богоро́дичен: Уязви́вшееся прило́ги лука́ваго, Пречи́стая, я́ко сострада́тельна, уврачи́ се́рдце мое́, Су́щаго, на Кресте́ пло́тию уя́звленнаго, неизрече́нно ро́ждшая.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

То́ки сле́з твои́х, преподо́бне, мо́ре лю́тых страсте́й изсуши́ша и та́мошнее утеше́ние честне́й твое́й души́ исхода́таиша.

Незло́бив, кро́ток, це́л, преподо́бен, сла́док, смиренному́др, и ти́х, и просвеще́ния испо́лнен, пресла́вне о́тче, бы́л еси́.

С Боже́ственными па́стыри па́мять твоя́, о́тче, спросла́вися, я́коже па́стыря до́браго, па́стырю му́дре Иа́кове, я́ко преподо́бне ста́до упа́сл еси́.

Богоро́дичен: Во́лею вся́ соде́лавый во утро́бу, восхоте́в, неискусобра́чную всели́ся, тле́нием неду́говавшия нетле́нием почти́в, я́ко Милосе́рд.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Мно́гая гоне́ния и неосла́бная искуше́ния претерпе́л еси́, иконобо́рцы побежда́я, правосла́вием сия́я, вся́ зря́щия просвеща́я и взыва́я, Иа́кове: благослове́н еси́, Бо́же оте́ц на́ших.

Христо́во стра́шное прише́ствие помышля́я, во умиле́нии все́ житие́ сконча́л еси́, до́ндеже обре́л еси́, блаже́нне, очище́ние прегреше́ний соверше́нное и ве́чное утеше́ние, просвеще́ние и́стинное и сла́ву неизрече́нную.

Па́стыря Христа́ в кро́тости души́ яви́лся еси́ а́гня и, Си́м наставля́емь, па́стырь ове́ц в Ду́се, о́тче, слове́сных позна́лся еси́, с ни́ми поя́ всегда́: благослове́н еси́, Бо́же оте́ц на́ших.

Богоро́дичен: Де́во сла́вная, Неискусобра́чная Чи́стая, Благослове́нная, па́дающих исправле́ние, согреша́ющих избавле́ние, спаси́ мя́, блу́днаго, спаси́, Сы́ну Твоему́ зову́ща: благослове́н еси́, Бо́же оте́ц на́ших.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Чисте́йший тво́й у́м, чистото́ю боже́ственною просвеще́н, бесо́вския тмы́ и мглы́ страсте́й разу́мно уклони́ся, преподо́бне, зовы́й: по́йте, вся́ дела́, Го́спода и превозноси́те во вся́ ве́ки.

Разжже́нныя врага́ стре́лы угаси́л еси́, му́дре, одожде́ньми непреста́нных сле́з и, разжже́гся Христо́вою любо́вию, всеблаже́нне, попали́л еси́ вещенеи́стовное сласте́й те́рние.

Сие́ ста́до, прему́дре, е́же собра́л еси́ твои́ми уче́нии, и ве́рою соверша́ющия свяще́нную, и честну́ю, и по́лну све́та боже́ственную па́мять твою́ сохрани́ моли́твами твои́ми от искуше́ний и бе́д.

Богоро́дичен: Живы́й су́щи исто́чник, Я́же во́ду жи́зни ро́ждшая, ду́шу мою́, иста́явшую грехо́вным пла́менем, Де́во Богоро́дице, напо́й, да Тя́ сла́влю во вся́ ве́ки.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

По мно́гих труде́х и боле́знех безчи́сленных, по́тех же и ско́рбех вои́стинну, в приста́нищи почи́л еси́, небе́сное нося́ бога́тство Боже́ственных доброде́телей, свяще́ннейше о́тче, преподо́бных удобре́ние.

Разсужде́ния свети́льник, чу́вствия престо́л, незло́бив, кро́ток, и ми́лостив, и благоумиле́н бы́л еси́, рыда́яй же и омыва́я о́др, я́коже рече́ Дави́д, с ни́мже вся́, ве́рою чту́щия тя́, помина́й.

Я́ко дневну́ю звезду́, я́ко Ду́ха хра́м, я́ко ши́пок благово́ния та́инственнаго, о́тче, сы́й испо́лнен, я́ко высокове́твенно дре́во, я́ко сла́вы ве́чныя о́бщника и я́ко му́дра святи́теля чти́м тя́, Иа́кове.

Сле́зныя пото́ки, в зе́млю се́рдца посыла́емы бога́тно, вои́стинну кла́с возрасти́ша зре́л, ду́ши пита́ющ ве́рою чту́щия тя́ при́сно, святи́телю богому́дре, о́тче на́ш Иа́кове.

Богоро́дичен: Пощади́ мя́, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростию Твое́ю обличи́ мене́, — мо́лит Тя́ Де́ва, ро́ждшая Тя́, Христе́, а́нгел мно́жества и с преподо́бными му́ченики.