Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Обогати́вся Боже́ственными доброде́тельми, бога́тство преоби́дел еси́ земно́е и небе́сное получи́л еси́. Те́мже мя́, обнища́вша, Боже́ственнаго ра́зума обогати́ благода́тию, я́ко да твое́ воспою́, о́тче, жи́тельство равноа́нгельное.

Яре́м Госпо́день благи́й, блаже́нне, от ю́ности ты́ подъе́м, по́стническими боре́нии врага́ смири́л еси́, смире́нием Христо́вым воору́жся, и́мже возвы́сился еси́ на высоту́, Иоа́нне, к небеси́.

Я́ко ше́ствовав стезе́ю те́сною, скорбьми́, и слеза́ми, и стена́ньми, и озлобле́нии, преподо́бне, к простра́ннейшей широте́ дости́гл еси́, обре́т оби́тель досто́йну боле́зней, о́тче Иоа́нне досточу́дне.

Богоро́дичен: Лю́тыми страсте́й наве́ты, Отрокови́це, обурева́емь и прило́ги грехо́вными преклоне́н, ко Твоему́ неусы́пному и непобеди́мому предста́тельству, Всепе́тая, любо́вию прибега́ю, уще́дри мя́ и спаси́, Присноде́во.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Кади́ло благово́нно Всеви́дцу, преподо́бне, твоя́ моли́твы прине́сл еси́, я́же обоня́в и прие́м, по́стническим лико́м причте́ тя́.

Яви́лся еси́ чу́до велича́йше, сердца́, преподо́бне, благочести́вых ужаса́я: ка́ко пред враты́ претерпе́л еси́ роди́телей, нище́тствуя и оскорбля́емь.

Зако́нно в моли́твах и поще́ниих, преподо́бне, претерпева́я, в безстра́стие обле́клся еси́, пло́ти мудрова́ние смири́в кре́постию Боже́ственнаго Ду́ха.

Богоро́дичен: Я́ко мироуха́нен ши́пок от удо́лий, Пречи́стая, Чи́стый Тя́ обре́те и посреде́ Тебе́ всели́ся, благово́ния испо́лнив челове́чество.

Седа́лен, гла́с 3.

Бога́тство тле́нное и сла́ву мимотеку́щую оста́вив, небе́сное бога́тство восприя́л еси́ и сла́ву, о́тче, и́стинно ве́чнующую, блаже́нне. Те́мже блажи́м свято́е твое́ успе́ние и, торжеству́юще в не́м, вопие́м тебе́: помяни́ на́с ко Го́споду, я́ко име́я, Иоа́нне, дерзнове́ние.

И ны́не, богоро́дичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющь на́м вино́ спаси́тельное, все́х веселя́щее ду́ши и телеса́. Те́мже, я́ко вину́ Тя́ до́брых блажа́ще при́сно, со а́нгелом вопие́м Тебе́: ра́дуйся, Благода́тная.

Крестобогоро́дичен: Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

В ру́бищах убо́гих сокро́вище сокрове́но яви́лся еси́, богодохнове́нне: Боже́ственную бо оде́жду возлюби́л еси́ и, оде́явся, в черто́г вы́шний вше́л еси́.

Прие́м небе́сное се́мя, богодохнове́нне, се́рдца браздо́ю кла́с красе́н возде́лал еси́, умы́ препитава́ющь преподо́бно па́мять твою́ чту́щим.

Претерпе́л еси́ в те́снейшей ку́щи, чу́дне, ни́щь, я́коже други́й Ла́зарь, во́лею бы́в. Те́мже почи́л еси́ Авраа́ма ны́не в не́дрех, о́тче преподо́бне.

Богоро́дичен: Упра́ви моея́ души́ движе́ния, Всенепоро́чная, к Боже́ственным повеле́нием Возсия́вшаго из чре́ва Твоего́, бу́ри избавля́ющи мя́ жите́йских собла́знов хода́тайством Твои́м.

Пе́снь 5.

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо ра́зве Тебе́ Бо́га не зна́ю.

Стра́нен земны́х сласте́й бы́л еси́, стра́нен свои́х, стра́нен роди́телей твои́м изволе́нием, и, воздержа́нием себе́ очи́стив, усво́ился еси́ Вседержи́телю, о́тче Иоа́нне, обнища́в ду́хом.

Хра́м себе́ Святы́я Тро́ицы соверши́в, претерпе́л еси́, утесня́емь ку́щею, Боже́ственными поуче́нии ду́шу очища́я и добро́ту Бо́жию неизглаго́ланную, о́тче Иоа́нне, при́сно зря́.

Зако́на Бо́жия испо́лнитель яви́лся еси́, ничто́же предсуди́в па́че Сего́ любве́, богому́дре о́тче, ни бра́тии бо, ни роди́телей тя́ любо́вь, ниже́ бога́тство, ниже́ досто́инство, ниже́ пло́ти сла́дость разсла́биша.

Богоро́дичен: Емману́ила, все́х Влады́ку, ражда́еши нетле́нно, пребы́вши Де́ва и по рождестве́, Де́во Ма́ти. Его́же непреста́нно моли́ искуше́ний вра́жиих изба́вити под кро́в Тво́й прибега́ющия.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Го́рдаго зми́я низложи́л еси́ смиреному́дрия ору́жии, всеблаже́нне, и, возвы́сився ду́хом, во оби́тели присножи́зненныя всели́лся еси́.

Дарова́ний испо́лнился еси́ Ду́ха и лука́вствия покори́л еси́ ду́хи, я́ко смы́слен, и прему́др, и Бо́гу весьма́ возложе́н.

Безстра́стия сия́я высота́ми, о́тче Иоа́нне, коли́бою утесня́емь и напа́стьми облага́емь, терпе́л еси́, Боже́ственне укрепля́емь.

Богоро́дичен: Равноде́тельна Ро́ждшему и сопресто́льна Сло́ва из утро́бы Твоея́, Чи́стая, воплоти́ла еси́, за благоутро́бие неизрече́нное на́ше все́ поне́сшаго.

Конда́к, гла́с 2.

Возлюби́в, прему́дре, нищету́ неокра́дому, роди́телей твои́х бога́тство возненави́дел еси́ и, Ева́нгелие в рука́х твои́х держа́, после́довал еси́ Христу́ Бо́гу, Иоа́нне, моля́ся непреста́нно о все́х на́с.

И́кос:

Кто́ дово́лен досто́йно воспе́ти твоя́ труды́, и боле́зни, и де́лания мно́гая, и сла́ву, и вели́чество? Но моли́твами твои́ми к Бо́гу благоприя́тными Ду́ха благода́ть мне́ ны́не пода́ждь, я́ко да твоя́ па́че естества́ по́двиги изреку́ ве́рно и воспою́, е́же па́че сло́ва, терпе́ние твое́ и со́вести пожда́ние, всеблаже́нне, льсти́ваго врага́ посрами́л еси́. Не преста́й моля́ся о все́х на́с.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Те́сный предпоче́л еси́, не́жели простра́нный, пу́ть, достосла́вне, и, ра́дуяся, претерпе́л еси́ пред враты́ роди́телей твои́х, укоря́емь и удруча́емь мно́гими боле́зньми, богоблаже́нне.

Тебе́ сама́го удобри́л еси́ красне́йшими, му́дре, восхожде́нии, пло́ти умертви́в мудрова́ние. Те́мже всели́лся еси́ в небе́сная, лико́м счисля́емь при́сно честны́х отце́в, досточу́дне.

Пути́ ше́ствуя, вводя́щия к Боже́ственному поко́ю, уклони́лся еси́ про́пастей де́монских, блаже́нне, Боже́ственною покрыва́емь благода́тию, вопия́ше: Сы́й благослове́н и препросла́влен.

Богоро́дичен: Пое́м Рождество́ Твое́, Благослове́нная, и́мже изба́вихомся дре́вняго осужде́ния, и Тя́ блажи́м, Богоблаже́нная, Еди́ну, Ю́же возлюби́, Сы́й благослове́н и препросла́влен.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Неветша́емый себе́, Иоа́нне, доброде́тельми упещре́нне истка́ хито́н одея́нием нище́тным: в ви́де ни́щаго ты́ оде́ялся еси́, пред враты́ роди́телей претерпева́я.

Непоро́чен, я́коже други́й И́ов, пред враты́ злостра́ждеши, я́ко на гно́ищи, терпя́ уко́ры рабо́в твои́х, му́дре, гла́дом же и жа́ждею дручи́мь, те́мже насле́довал еси́ го́рнее Ца́рствие.

После́довал еси́ я́ве, е́же прия́л еси́ рука́ми, Ева́нгелию, и обнища́л еси́, блаже́нне, се́туя во все́й жи́зни, и кро́ток бы́л еси́, и незло́бив, и Ца́рствия го́рняго насле́дник.

Богоро́дичен: Струю́ приснотеку́щую на́м, притека́ющим к Тебе́, Чи́стая, то́чиши: ея́же оби́льную благода́ть почерпа́юще, Твое́ пое́м Рождество́, Пречи́стая, и превозно́сим во ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Кре́пость моя́ и пе́ние Госпо́дь, — взыва́л еси́, — предста́теля тмы́ в Се́м побежда́ю, мечта́нных ле́стей, я́же от него́, ника́коже бою́ся, еди́ну мечта́я добро́ту Боже́ственную и непристу́пную.

Я́ко земля́ тучна́, преподо́бне, твое́ се́рдце прия́т небе́сное се́мя у́мными бразда́ми и стори́чествующий кла́с плодоно́сит, пита́ющи все́х, ве́рно чту́щих тя́, ду́ши, богоблаже́нне.

Освяти́ Госпо́дь из ложе́сн тя́, блаже́нне, и к Себе́ ше́ствия твоя́ напра́ви. Те́мже счи́слился еси́ преподо́бным, благоче́стно пожи́вшим, с ни́миже обоже́ния наслажда́ешися, пресла́вне.

Богоро́дичен: Све́та жили́ще утро́ба Твоя́ бы́сть, И́мже све́т во тме́ седя́щии ви́деша. Те́мже Тя́ гла́сы немо́лчными, Ма́ти Бо́жия, при́сно воспева́ем и любо́вию почита́ем, я́ко наде́жду ду́ш на́ших.

Свети́лен.

Роди́телей пристра́стие оста́вив и бога́тство теку́щее, тво́й кре́ст взя́л еси́, о́тче, и Христу́, Иоа́нне, преусе́рдно после́довал еси́: по́стнически же умертви́л еси́ стра́сти, к безстра́стию восте́кл еси́ и мо́лишися о на́с, богоно́се.

Сла́ва, и ны́не, богоро́дичен: Сове́та вели́каго А́нгела О́тча родила́ еси́, Христа́, Всепе́тая Отрокови́це, Царя́ сла́вы, Его́же Кре́ст преподо́бнии и по́стницы взе́мше, в сле́д Сего́ потеко́ша. С ни́миже непреста́нно моли́ о на́с, Богоро́дице.