Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть: препросла́вленный Госпо́дь сла́вно бо просла́вися.

Преподо́бне о́тче Иоаса́фе, да́ждь ми́ сло́во, недосто́йному рабу́ твоему́, да возмогу́ досто́йно воспе́ти святу́ю па́мять твою́.

О́тче Иоаса́фе, ты́ на земли́ равноа́нгельно пожи́л еси́, равноа́нгельную же че́сть досто́йно получи́л еси́ и ны́не со все́ми А́нгелы Бо́гу предстои́ши.

Ю́ность твоя́ чи́ста, житие́ же твое́ све́тло, я́ко пра́вило изве́стно в тебе́, о́тче, Боже́ственныя доброде́тели показа́ся.

Богоро́дичен: Покро́в Боже́ственный, ти́хое приста́нище, Пречи́стую Де́ву Мари́ю, ве́рнии, пе́сньми похва́лим, Богома́терь обра́дованную, все́х же ве́рных Предста́тельницу.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая, Це́рковь прише́ствием, Твои́м, в не́йже утверди́ся мое́ се́рдце.

И́хже о́ко не ви́де, ни у́хо слы́ша, ни на се́рдце челове́ка взыдо́ша, я́же угото́вана Бо́гом Того́ возлю́бльшим, си́х ты́ возжеле́л еси́, Иоаса́фе Богодохнове́нне.

Соше́дшеся дне́сь, чту́ще любо́вию па́мять твою́, Иоаса́фе прему́дре, мо́лим тя́ приле́жно: моли́ о на́с, ве́рно пра́зднующих честну́ю па́мять твою́.

Лику́я со А́нгелы на Небесе́х, не забу́ди на́с, преподо́бне о́тче, но при́сно моли́ся ко Го́споду дарова́ти ми́ру ми́р и все́м скорбя́щим утеше́ние.

Богоро́дичен: Ря́сны златы́ми укра́шена, Влады́чице, я́ко Цари́ца предстои́ши ны́не одесну́ю Царя́ и Бо́га, моля́щи о рабе́х Твои́х.

Седа́лен, гла́с 8:

О́тче Богоно́сне Иоаса́фе, житие́ свое́ украси́л еси́ воздержа́нием и, попра́в вся́ прило́ги вра́жия, присво́ился еси́ Бо́гу еди́ному. Те́м ны́не в ве́чней сла́ве со А́нгелы лику́я, с ни́миже моли́ непреста́нно поми́ловатися все́м на́м.

Тя́ ны́не ублажа́ем, преподо́бне, ты́ бо, влады́чество на земли́ оста́вив, Небе́сное насле́довал еси́. Те́мже моли́твами прося́щим тя́ подае́ши Боже́ственная дарова́ния, моли́ся у́бо и о на́с, чту́щих с любо́вию святу́ю па́мять твою́.

Пе́снь 4.

Ирмо́с: Прише́л еси́ от Де́вы, не хода́тай, ни А́нгел, но Са́м, Го́споди, вопло́щся и спа́сл еси́ всего́ мя́, челове́ка. Те́м зову́ Ти́: сла́ва си́ле Твое́й, Го́споди.

А́ще и владе́тель на земли́ бы́л еси́, но, после́дуя уче́нию преподо́бнаго ста́рца Афана́сия, сочта́лся еси́ преподо́бным. Те́м с ни́ми тя́ почита́ем.

Возсия́в, я́ко со́лнце, и сы́н све́та бы́в, свя́то твое́ проводи́л еси́ житие́. Те́м ны́не весели́шися со все́ми святы́ми.

Ле́потственно возсия́ на́м дне́сь па́мять твоя́ свята́я, преподо́бне о́тче Иоаса́фе. Те́м мо́лим тя́: проси́ на́м от Христа́ благода́ти, и ми́лости, и согреше́ний избавле́ние.

Богоро́дичен: А́дова сокро́вища упраздни́шася и сме́ртное мучи́тельство преста́ воста́нием Ро́ждшагося из Тебе́, и жи́зни сокро́вища напо́лнишася.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го бо́га не зна́ем.

Ю́нии и ста́рцы, мона́си и свяще́нницы, славосло́вят ку́пно блаже́нную па́мять твою́, Богодохнове́нне о́тче Иоаса́фе.

Иоаса́фе Богоблаже́нне, ты́ яви́лся еси́ безсме́ртия прича́стник и о́бщник Боже́ственнаго Ца́рствия и с высоты́ бде́еши над певцы́ твои́ми. Проси́ у Бо́га проще́ние грехо́в и́х и прича́стие в сла́ве Его́.

О Иоаса́фе, равноа́нгельне, име́ющу ти́ жили́ще на высоте́ Метео́рстей, возсия́ тебе́ с высоты́ Госпо́дь от Де́вы, Его́же ты́ возжеле́л еси́.

Богоро́дичен: Моего́ ума́ стра́сти лю́тыя утоли́, Ма́ти Бо́жия, и испра́ви мя́, заблу́ждшаго, я́ко да сла́влю Тя́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

А́нгела на земли́ и на Небеси́ челове́ка ве́м тя́, преподо́бне, насажде́н бо в дому́ Госпо́дни, процве́л еси́ пра́ведно, я́ко ке́др в пусты́ни, умно́жив Христо́во ста́до слове́сных ове́ц в преподо́бии и пра́вде.

Соде́лав ду́шу твою́ хра́м Ду́ха Свята́го, премину́л еси́ зе́млю до́льную, Небе́сную же жи́знь стяжа́л еси́ и со Безпло́тными ли́ки смеси́лся еси́. Те́м и кро́тких зе́млю насле́довал еси́.

А́нгельски на земли́, я́ко Безпло́тен, пожи́в, ми́р преоби́дел еси́, сла́вне, обветша́вшаго челове́ка я́ве, о́тче, совле́клся еси́ и, я́ко скве́рну ри́зу отве́рг с грехо́вными страстьми́, в но́ваго обле́клся еси́, е́же по подо́бию о Христе́, преподо́бне.

Богоро́дичен: Из Тебе́ прозябе́ Цве́т неувяда́емый, облагово́нствуя все́ челове́чество Боже́ственным ми́ром естества́ Своего́, и И́же Отцу́ Собезнача́льный из Тебе́ бы́сть ле́том, Де́во Всенепоро́чная.

Конда́к, гла́с 4:

Ве́дый прехва́льное житие́ твое́ и чистоту́ и безме́рное смиренному́дрие, преподо́бный Афана́сий наименова́ тя́ прее́мника своего́, ты́ же показа́лся еси́ досто́ин сего́ нарече́ния и, служа́ Триипоста́сному Бо́гу, соблю́л еси́ вве́ренную ти́ оби́тель Метео́рскую. Те́мже мо́лим тя́, о́тче Иоаса́фе, не забу́ди оте́чество твое́ и ве́сь се́рбский ро́д, но моли́ся всегда́ о все́х на́с

И́кос:

Утверди́вся стра́хом Христо́вым, ве́сь распя́лся еси́ ми́рови, Богоно́се о́тче Иоаса́фе, и, возвы́сив к Бо́гу серде́чное жела́ние, нищету́ возлюби́л еси́, в нищете́ же пожи́в, доброде́тельми обогати́лся еси́, испо́лнен же бы́в све́тлостию жития́, хра́мы благоле́пныя на Метео́рах Бо́гу воздви́гл еси́ и вся́ оби́тели Метеори́тския ку́пно со сестро́ю свое́ю Мари́ею бога́тно снабде́л еси́. Сего́ ра́ди и мы́, ве́дуще тя́ хра́м Свята́го Ду́ха, приле́жно мо́лим тя́: не забу́ди оте́чество твое́ и ве́сь се́рбский ро́д, но моли́ся всегда́ о все́х на́с.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть. Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

Фи́никс, насажде́нный в дому́ Госпо́дни, яви́лся еси́, мно́жеством бо мона́хов процве́л еси́ и, я́ко ке́др, и́же в Лива́не, доброде́тель умно́жил еси́.

А́ще и владе́тель бы́л еси́, но, презре́в сла́дости привре́менныя, благослове́нное целому́дрие соблю́л еси́.

Метеори́тская похвала́ яви́лся еси́, поревнова́в блаже́нному Афана́сию – Метеори́ту, нра́вом и житие́м после́дуя ему́, стра́х бо Бо́жий восприи́м в се́рдцы свое́м, де́лы свои́ми ве́сь ро́д се́рбский возвесели́л еси́.

Богоро́дичен: Родила́ еси́ па́че смы́сла и естества́, Богоро́дице Де́во, Свята́го святы́х, подаю́щи хода́тайством Твои́м освяще́ние и избавле́ние и оставле́ние грехо́в все́м ве́рным, сла́вящим Его́ воскресе́ние.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте, дела́, я́ко Го́спода и превозноси́те во вся́ ве́ки.

Удаля́яся пути́ простра́ннаго, те́сный же предпочита́я, и́нок и́стинен бы́л еси́ и, дости́г широты́ ра́йския, ра́достно о Христе́ взыва́еши: по́йте и превозноси́те во вся́ ве́ки.

Да́ры мно́гими вся́ оби́тели Метео́рския ще́дро снабдева́л еси́, си́м же ду́шу свою́ обогати́л еси́. Те́мже ны́не со все́ми пра́ведными, ра́дуяся, о Христе́ пое́ши: по́йте и превозноси́те во вся́ ве́ки.

Ре́вность Боже́ственнаго жития́ твоего́ яви́ тя́ и́стиннаго наста́вника мно́жества мона́хов, и́бо стяжа́л еси́ Христа́ соде́тельствующа. Ему́же ны́не со все́ми святы́ми восклица́еши: по́йте и превозноси́те во вся́ ве́ки.

Богоро́дичен: Красне́йшаго добро́тою родила́ еси́, Всенепоро́чная, Сего́ умоли́ изба́вити мя́ огня́, и́бо житие́ мое́ все́ отягчи́ся, все́ порабо́тися лю́тыми греха́ми, а́з же воспою́ к Нему́: по́йте и превозноси́те во вся́ ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

А́нгелом сожи́тель бы́в, я́ко в раи́ воздержа́ния процве́л еси́ и, я́ко ма́слина, псало́мски яви́лся еси́, помазу́я сердца́ на́ша еле́ем трудо́в твои́х, благоче́стно чту́щих свяще́нную па́мять твою́.

Гла́с Христа́ твоего́ послу́шав, зако́н Бо́жий сохраня́я невреди́мо, чистоту́ и смиренному́дрие от младе́нства име́л еси́, и житие́ нескве́рно, и нра́в ми́лостивей, Иоаса́фе, о́тче досточу́дне.

О́тче Иоаса́фе блаже́нне, доброде́тельми бога́т бы́в, испо́лнился еси́ све́тлостию жития́ и преста́вился еси́ к Вы́шнему гра́ду, сего́ ра́ди мо́лим тя́: моли́ся ко Го́споду изба́витися от бе́д ро́ду се́рбскому.

Богоро́дичен: Отрокови́це Богоневе́сто, из ко́рене Иессе́ова Ты́ прозябла́ еси́ и родила́ еси́ Ко́рень, все́х Царя́, Христа́ Бо́га на́шего, от Него́же вси́ ве́рнии прозяба́ют и получа́ют спасе́ние. Те́м непреста́нно моли́ Его́, да спасе́т правосла́вный ро́д се́рбский.

Свети́лен:

Све́том Единосу́щныя Тро́ицы озаря́ем, возсия́л еси́ све́тлыми заря́ми доброде́тельных подвиго́в твои́х, озари́ све́тлостию и ве́сь правосла́вный ро́д се́рбский, да вси́ взыва́ем ти́: ра́дуйся, о́тче Иоаса́фе, метеори́тов похвало́.

.