Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Слуга́ Бо́жий бы́в, о́тче, сохрани́л еси́, я́ко свяще́нник, Спа́сова повеле́ния, мирско́е бо смуще́ние оста́вил еси́, кре́ст тво́й взе́м, и жизноно́сным стопа́м, всеблаже́нне, после́довал еси́.

Спасе́ния хода́тай, ве́дый ра́зум богодухнове́нный, все́ Писа́ние благоче́стно проше́л еси́, боговеща́нная повеле́ния навыка́я, Ио́но о́тче преподо́бне, свяще́нства отсю́ду прия́л еси́ достоя́ние.

Богоро́дичен: Возсия́ Со́лнце из Тебе́, Ма́ти Присноде́во, И́же из Отца́ пре́жде ве́к неви́димый и ви́димым же пресла́вно опису́емь Те́лом, благоче́стия заре́ю челове́ки просвети́.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть Свя́т, я́коже Бо́г на́ш, и не́сть пра́веден, па́че Тебе́, Го́споди.

От на́с ны́не сло́во похвале́ния плето́мо прие́мля, богоно́се, ра́дуяся, твои́х трудо́в наслажда́ешися, и зовы́й, преподо́бне: Ты́ еси́ Бо́г на́ш, и не́сть пра́веден па́че Тебе́, Го́споди.

Глаго́лы услы́шав Влады́чни, оста́вил еси́ ми́р и я́же в ми́ре, приве́л еси́ се́мя твое́ Го́споду, зовя́, преподо́бне: Ты́ еси́ Бо́г на́ш, и не́сть пра́веден па́че Тебе́, Го́споди.

Богоро́дичен: Ты́ еди́на па́че все́х су́щих от ве́ка вели́ких сподо́билася еси́ и па́че естества́, Бо́га бо невмести́маго все́й тва́ри во утро́бе понесла́ еси́ и воплоти́ла еси́. Те́м Богоро́дицу Тя́ вси́ почита́ем.

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ Ти́: сла́ва си́ле Твое́й, Го́споди.

Отве́рзл еси́, Ио́но богому́дре, две́ри твоя́, Авраа́му подо́бяся, все́м тре́бующим, преподо́бне, те́м Небе́сная Христо́с отверза́ет ти́ врата́, всеблаже́нне.

Всечестно́е свяще́нническое досто́инство украси́л еси́, Ио́но блаже́нне, и к мона́шествующих же собра́нием, ра́дуяся, ты́ прите́кл еси́, вседомо́вно, преблаже́нне, приводи́мь.

Богоро́дичен: Исцеля́я Е́вино дре́внее преступле́ние, в Тя́, Всенепоро́чную и Всесвяту́ю, всели́ся, всего́ мя́ челове́ка вообрази́в па́дшаго, Пребоже́ственный.

Пе́снь 5.

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо ра́зве Тебе́ бо́га не зна́ю.

Христокра́сным просвеща́яся житие́м, Ио́но блаже́нне, все́м че́стен показа́лся еси́, ве́сть бо и́стинно доброде́тель сла́вны соверша́ти сию́ иму́щия, яви́лся бо еси́ иере́й Христо́в достоприя́тен.

Си́лою Боже́ственною укрепля́емь, блаже́нне, мирску́ю любо́вь кре́пко отве́ргл еси́, и Влады́це, ра́дуяся, прише́л еси́ во́льным твои́м нра́вом, и, сохрани́в ве́ру невреди́мо, вене́ц сла́вы, богому́дре, прия́л еси́.

Богоро́дичен: Еди́ну на́м во дву́ существа́х ви́димую Ипоста́сь, еди́на Благослове́нная, ражда́еши неизрече́нно, Бо́жия Бо́га Сло́ва, воплоти́вшагося за ми́лость неизрече́нную. Того́ моли́ сохрани́тися пою́щим Тя́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Жите́йских веще́й, о́тче, нестоя́щее све́дый, сия́ оста́вив, и к возда́нию потща́ся жре́бия го́рняго, пребога́те.

Благочести́во мона́шествующих мно́жества пита́я, не оста́вил еси́, о́тче блаже́нне, те́м сла́дости лу́чшия во оби́телех Небе́сных сподо́бился еси́.

Богоро́дичен: Неискусому́жно, Пречи́стая Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Избра́нием суда́ украси́лся еси́, свяще́нник бы́в, Ио́но, о́тче преподо́бне, те́мже вше́л еси́ вну́трь вы́шняго хра́ма, нехо́дная зря́, твоего́ священноде́йства пло́д пожа́в.

Оте́ческая возлюби́л еси́ ликостоя́ния и в ли́цех оте́ц ра́достно просла́вился еси́, Христу́ предстоя́, всеблаже́нне преподо́бне, прие́млеши твоего́ служе́ния всего́ возда́ние.

Богоро́дичен: О́блак Де́ва Тя́, Пра́вды Со́лнце, роди́, Де́ва пребы́вши, дебе́лости плотски́я приобщи́вшася, Челове́ка бы́вша, Христе́, Ю́же воспева́ем, я́ко пресла́вную.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Соверше́нною чи́стою любо́вию Христа́ вожделе́л еси́, священнотаи́нниче о́тче, и непреста́нными гла́сы вопия́л еси́: по́йте, вся́ дела́, Го́спода и превозноси́те во вся́ ве́ки.

Мирску́ю красоту́ оста́вив, во́лею Христу́, блаже́нне, прише́л еси́, благоле́пие Того́ жела́я зре́ти, во оби́тели святы́я вселя́емь, превознося́ Христа́ во ве́ки.

Богоро́дичен: Свяще́ннейшими Тя́ гла́сы свяще́ннейшии Бо́жии проро́цы, Чи́стая, бу́дущую Ма́терь провозгласи́ша я́сно все́ми Влады́чествующаго, Пречи́стая, Его́же превозно́сим во вся́ ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Правове́рный ра́зум благоле́пно измла́да навы́к, от Отца́ пре́жде ве́к возсия́вшаго Сы́на и спокланя́ема Ду́ха, исходя́ща отту́ду неизрече́нно, я́ве уясни́л еси́, святи́тель бы́в, преподо́бне.

Во оби́телех Небе́сных Созда́тель всели́ тя́, Того́ та́ин я́ко служи́теля честна́го, о́тче Ио́но богоно́се, и ны́не на́с твоя́ назира́еши сы́ны, всеблаже́нне, тя́ при́сно похваля́ющия.

Богоро́дичен: Черто́г была́ еси́ па́че ума́ воплоще́ния Сло́ва, Де́во Богороди́тельнице, оде́яна сла́вою доброде́телей и укра́шена, те́м Тя́, Всенепоро́чную Богоро́дицу, велича́ем.