Пе́снь 1.

Ирмо́с: Изра́иля от рабо́ты изба́вил еси́, Го́споди, десни́цею Твое́ю держа́вною, я́ко о́наго спа́сл еси́, ны́не на́с спаси́.

От пусты́нных преде́л прини́кнув, преподо́бне, собра́ние е́реси расплени́в, свя́те, утверди́л еси́ ве́ру Христо́ву.

Дави́дски пред цари́, сла́вне, глаго́ля, никогда́же постыде́лся еси́, Христо́ву хотя́ Це́рковь утверди́ти.

В ти́не пре́лести, приве́ргся, прехва́льне, я́ко би́сер, просия́л еси́, заре́ю Ду́ха уясня́емь, сла́вне.

Богоро́дичен: Во утро́бе заче́нши Безле́тнаго, Пречи́стая, от Отца́ рожде́нна Сы́на, Младе́нца Сего́, Непоро́чная Де́во, породила́ еси́.

Пе́снь 3.

Ирмо́с: Утверди́ на́ш у́м и сердца́, Небеса́ сло́вом утвержде́й, во е́же пе́ти и сла́вити Тя́, во спасе́ние ду́ш на́ших.

Труба́ слове́сна Ду́ха яви́лся еси́, о́тче, вся́ созыва́ющи, я́коже на бра́нь, вра́жиим ополче́нием проти́ву ста́ти по́мощию Спа́са Христа́.

Ле́ствица мы́сленная показа́лся еси́, Богоно́се, к ца́рству веду́щи Вы́шнему восходя́щия ве́рою, уче́нии твои́ми утвержда́емы в Ду́се.

Гора́ и́стинно я́вствовался еси́ уче́ния, Богоно́се, любо́вию Влады́ки, ко Христо́ве Це́ркви вся́ собира́я, сопряже́нныя доброде́тельми к Нему́.

Богоро́дичен: Ма́ти и́стинно показа́лася еси́, о Де́во, Емману́ила ро́ждши, Бо́га Сло́ва, Его́же моля́щи не преста́й, безму́жная Неве́сто, благослове́нная Богоро́дице Чи́стая.

Седа́лен, гла́с 4.

Тучено́сный о́блак духо́вный яви́лся еси́, преблаже́нне, су́щим на земли́, напая́я, я́ко бразду́, ве́рных сердца́: обте́к же концы́ Боже́ственными словесы́ твои́ми, до́ждь уче́ний источи́л еси́, прему́дре, те́мже, я́ко пото́ки, все́х сердца́ благово́ние Ду́ха богому́дренно израсти́л еси́, Богоно́се Исаа́кие, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Я́ко Всенепоро́чная Неве́ста Творцу́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Услы́шах слу́х си́лы Твоея́, и возвесели́ся се́рдце мое́ о Го́споде.

Ангелоподо́бно на земли́ показа́л еси́ житие́, лику́еши с Небе́сными си́лами.

Пе́рвее ты́ мона́хов настоя́тель бы́в, из пусты́ни, Богому́дре, су́щим во гра́де о́браз показа́лся еси́, сла́вне.

Па́мять твоя́ вои́стинну ны́не, Исаа́кие о́тче, весели́т сердца́ пою́щих тя́.

Богоро́дичен: Богоро́дице, и ны́не, я́ко при́сно, от вра́г беззако́нных моли́твами Твои́ми свободи́ рабы́ Твоя́.

Пе́снь 5.

Ирмо́с: От но́щи неве́дения Богове́дением просвети́вый концы́, просвети́ мя́ у́тром человеколю́бия Твоего́, Го́споди.

От пусты́ни вои́стинну, я́коже звезда́ светла́, возсия́л еси́ и ерети́ческую но́щь уче́нии твои́ми отгна́л еси́.

Бразды́ удержа́в коня́ Ва́лентова, прехва́льне, ско́тский ра́зум обличи́л еси́, я́ве посрами́в его́.

Главу́ твою́, о́тче, же́злием положи́л еси́ ураня́тися, мы́сленно ве́ры твоея́ главу́ держа́, Христа́ Бо́га.

Богоро́дичен: Херуви́м я́вльшися честне́йши, Де́во Всепе́тая, моли́ Сы́на Твоего́ спасти́ ду́ши пою́щих Тя́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Проре́кл еси́ Ва́ленту, му́дре, ме́рзкую сме́рть проразуме́нием ду́ха и яви́лся еси́ вои́стинну проро́к сла́вен.

Лопа́тою ве́ры ве́рных, я́ко пшени́цу, собра́л еси́, Ва́лента, я́ко пле́вы в пле́внице, запали́л еси́ моли́твами твои́ми, му́дре.

Угла́дил еси́ скрижа́ли серде́чныя ве́рою послу́шающих тебе́, Богому́дре Исаа́кие, начерта́в на ни́х правосла́вия о́браз.

Богоро́дичен: Я́же еди́на сло́вом пло́тию Сло́во ро́ждши, изба́ви, мо́лимся, сете́й вра́жиих ду́ши на́ша.

Конда́к, гла́с 8.

Я́ко уго́дник Бо́жий ве́рный, по Христо́ве Це́ркви ре́вностию разже́гся, бразды́ Ва́лентовы удержа́в, проро́чески тому́ о затворе́нии Це́ркве па́губную сме́рть предре́кл еси́, преподо́бне. Те́мже при́сно моли́ о на́с, чту́щих тя́, Исаа́кие преподо́бне.

Пе́снь 7.

Ирмо́с: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Пода́вый преподо́бному Твоему́ сло́во обличи́тельно к мучи́телеве зло́бе, благослове́н еси́ во ве́ки, Го́споди Бо́же оте́ц на́ших.

Во све́тлей пра́ведных сла́вно оби́тели водворя́яся, о́тче, вопие́ши Зижди́телю: благослове́н еси́ во ве́ки, Го́споди Бо́же оте́ц на́ших.

О́тче честны́й, Спа́су моли́ся о на́с немо́лчно, не престая́, изба́витися вся́кия беды́ и неотъе́млемыя жи́зни улучи́ти ста́ду твоему́.

Богоро́дичен: И́же во утро́бу Де́вы всели́выйся и в не́й Ада́ма назда́вый, благослове́н еси́ во ве́ки, Го́споди Бо́же оте́ц на́ших.

Пе́снь 8.

Ирмо́с: Безнача́льнаго Царя́ сла́вы, Его́же трепе́щут Небе́сныя си́лы, по́йте, свяще́нницы, лю́дие, превозноси́те во вся́ ве́ки.

Показа́вшаго правосла́вныя ве́ры побо́рника, Исаа́кия, вси́ по́йте, свяще́ннии, лю́дие, превозноси́те во вся́ ве́ки.

Я́ко овча́ слове́сное, от пусты́ни прише́л еси́, отгоня́ зве́ри от ста́да Христо́ва, водворя́тися в ме́стех пусты́х прогоня́.

Не убоя́лся еси́ Ва́лентовы, о́тче, лю́тыя и злы́я я́рости кро́тостию души́, де́йствоваше бо в тебе́ Ду́х И́стины.

Богоро́дичен: Жи́зни из Тебе́ отсече́ся Ка́мень, я́коже пи́шет, без руки́ челове́чи, Пресвята́я Чи́стая, Бо́г, благоволи́вый в Тя́ всели́тися.

Пе́снь 9.

Ирмо́с: Тя́, Богоро́дицу, Ма́терь Све́та, в пе́снех велича́ем.

Сокруши́л еси́ си́лы безбо́жных держа́вно кре́постию Боже́ственнаго Ду́ха.

Разруши́л еси́ ве́ры сою́зом, сою́зныя ересе́й полки́.

Исаа́кие Богому́дре, помина́я к Бо́гу не преста́й, е́же спасти́ на́с.

Богоро́дичен: Рождество́ Твое́, Де́во, е́же в печа́лех рожде́ние Е́вы претвори́.