Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Венча́в Боже́ственными доброде́тельми, преподо́бне, житие́ твое́, Кассиа́не, к Бо́гу отше́л еси́, от Него́же на́м проси́ избавле́ния прегреше́ний, мо́лимся, соверша́ющим ве́рою свято́е твое́ преставле́ние.

Всеобра́зным манове́нием к Бо́гу все́х, достосла́вне, от стра́стных помышле́ний уклони́лся еси́ и све́т бы́л еси́, прича́стии невеще́ственными обожа́емь, препросла́вленнаго Го́спода поя́, тя́ просла́вльшаго.

Вра́чь бы́л еси́ душа́м, боже́ственными твои́ми уче́нии, Кассиа́не, управля́я мудрова́ния мона́шествующих благода́тию, и к жи́зни ве́чней наста́вил еси́. Сего́ ра́ди тя́ вси́ любо́вию почита́ем.

Богоро́дичен: Во чре́ве носи́вшую, Чи́стая, вси́ ве́мы: Бо́га бо, в пло́ть ме́ртвенную обле́кшася, па́че ума́ родила́ еси́, просвети́вшаго преподо́бных сосло́вие, препросла́вленнаго Го́спода, сла́вно бо просла́вися.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Звезду́ тя́, на высоте́ церко́вней возсия́вшую, просвеще́ние показа́ су́щим во тме́ Христо́с, всехва́льне, по́стников украше́ние, преподо́бне.

Кресту́ приобщи́вшемуся и ми́р просве́щшему, Кассиа́не, подо́бяся, распя́лся еси́ мирски́м страсте́м, кова́рствия бесо́в победи́в.

Му́дрости испо́лнися твое́ се́рдце, прему́дре, уче́ния бе́здну Святы́м источи́ Ду́хом, мона́хов стада́ напая́ющу.

Богоро́дичен: Исцели́, Всенепоро́чная, ду́шу мою́, молю́ся, изнемо́гшую страстьми́ и вся́кими настоя́нии зле́йших де́монов, боже́ственным хода́тайством Твои́м.

Седа́лен, гла́с 4.

Преподо́бен бы́в, Бо́гу возложи́лся еси́ и, просве́щься до́брыми ви́ды, Кассиа́не, я́ко со́лнце, облиста́л еси́ сия́нием боже́ственных твои́х уче́ний сердца́ все́х, чту́щих тя́, всегда́ просвеща́я. Но приле́жно моли́ Христа́ о и́же любо́вию те́пле восхваля́ющих тя́.

Сла́ва, и ны́не, богоро́дичен: Грехолюби́в сы́й, молю́ Тя́, Безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити: гре́шных бо Ты́ еси́ очище́ние, и спасе́ние ве́рных, и заступле́ние.

Крестобогоро́дичен: И́же во́лею на́с ра́ди распе́ншагося на дре́ве А́гница зря́щи, рыда́ющи, глаго́лаше, слезя́щи: что́ Ти́ безблагода́тный евре́йский собо́р воздаде́, и́же мно́гих и вели́ких, Сы́не Мо́й, даро́в наслажде́йся? Но воспева́ю Твое́, Бо́же Мо́й, долготерпе́ние.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

По́двиги твои́ми плотска́я покори́л еси́ игра́ния ду́ху, преподо́бне, и свяще́нными уче́нии твои́ми вся́ обнажи́л еси́ кова́рствия льсти́ваго и ловле́ния.

Умерщвля́емь во́лею от мирски́я ме́ртвости, бу́дущия жи́зни насле́дие прия́л еси́, Кассиа́не пресла́вне, зако́ны же написа́л еси́ мона́хов в наставле́ние и соверше́ние.

Всели́ся в ду́шу твою́ благода́ть Ду́ха и все́х вы́шша плотски́х мудрова́ний тя́ показа́, пребога́те, и льсти́ваго сете́й явле́нно.

Богоро́дичен: Безле́тнаго, в ле́то бы́вша, родила́ еси́ неизрече́нно, Всенепоро́чная, преподо́бныя просвети́вшаго, ве́рою пожи́вшия, и злонача́льнаго зми́я смири́вшаго.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Восхи́тился еси́, твои́ми доброде́тельми, богоприя́тне, носи́мь, и, ра́дуяся, дости́гл еси́ к небе́сным селе́нием, трудо́в по́чести досто́йно прие́мля.

Умо́м чи́стым ты́ взира́я добро́ту Христо́ву, стоя́л еси́ непрекло́нен в нощи́ и во дни́, пресла́вне, Боже́ственная явле́ния отту́ду прие́мля.

Сле́з тече́нии, богоно́се о́тче, напая́емь, я́ко дре́во высокове́твенно, прине́сл еси́ плоды́ исправле́ния, веселя́щая все́х боже́ственно помышле́ния.

Богоро́дичен: Из Тебе́ Жи́знь па́че ума́ возсия́вши, Де́во, врага́ умертви́, вся́ ны́ умертви́вшаго, и оживи́ ми́р, непреста́нно воспева́ющий Тя́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Путе́м те́сным, о́тче, ше́ствовал еси́, все́м же словесы́ твои́ми се́й показа́л еси́, и́мже до́бре ходя́щии, в ра́йскую широту́ вводи́ми быва́ют.

Жи́знь твоя́ преподо́бна бы́сть, и кончи́на блаже́нна и честна́, Кассиа́не о́тче на́ш, святы́х а́нгелов собесе́дниче.

Дрема́ние уны́ния отве́ргл еси́ и, пребдева́я в виде́ниих и дея́ниих, а́нгельски пожи́л еси́ на земли́, богоно́се, всеблаже́нне.

Богоро́дичен: Я́ко добру́, я́ко красну́ возлюби́в Тя́, добротворя́й Иису́с, Всенепоро́чная, из Тебе́ пло́тию ражда́ется и обожа́ет мя́ за милосе́рдие безме́рное.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Всегда́ воззре́ньми светле́йшими, богому́дре, обожа́емь, свети́льник яви́лся еси́ незаходи́мь, отню́дуже облиста́л еси́ сло́во спаси́тельное, все́х на́с ра́зумы просвеща́ющее, восхваля́ющих тя́.

Язы́к тво́й Ду́хом обощре́н, я́ве начерта́вший зако́н спаси́телен, и о́бразы изложи́, и́миже управля́ются вся́, всеблаже́нне, при́сно мона́шествующих стада́, ра́дующеся.

Ра́зумы, преподо́бне, спаси́тельныя и глаго́лы, неве́дение серде́чное отгоня́ющия, бога́тно источи́л еси́, о́тче богому́дре. Те́мже тя́ почита́ем ве́рно, всесвяту́ю соверша́юще па́мять твою́.

Богоро́дичен: Черто́г была́ еси́ Боже́ственныя сла́вы и престо́л огнезра́чен, на не́мже почи́ Сло́во, воплоще́нное за кра́йнюю благосты́ню. Того́ у́бо моли́, Чи́стая, уще́дрити и поми́ловати ны́.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Сия́я, я́коже звезда́, сло́вом и житие́м, Кассиа́не, просвеща́еши вся́ земны́я концы́, неве́дения изыма́я мглы́ и пе́ти повелева́я всегда́: благослови́те, вся́ дела́ Госпо́дня, Го́спода.

Заше́л еси́, у́мер, я́ко со́лнце, преблаже́нне, я́ко зарю́ же, оста́вил еси́ незаходи́ма словеса́ твоя́, просвеща́ющая ду́ши на́ша, ве́рою святу́ю твою́, преподо́бне, соверша́ющих па́мять.

Добро́ты мы́сленныя неизрече́нно наслажда́ешися, оста́вль тле́нное те́ло, и ви́дети сподо́бился еси́, я́же ви́дят, сла́вне, а́нгельская во́инства, пою́ще: благослови́те, вся́ дела́ Госпо́дня, Го́спода.

Богоро́дичен: Яви́лася еси́ небе́с ши́рши, Де́во, Его́же бо та́я не вмести́ша, несказа́нно вмести́вши и ро́ждши па́че смы́сла, сугу́ба су́ща Естество́м, еди́ну же иму́ща боголе́пно Ипоста́сь.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Кре́пость тебе́ дарова́ся от Бо́га и си́ла нача́ла отгони́ти мироде́ржца, те́мже до́блествовав вельми́, я́ко вои́стинну, о́тче богому́дре, лико́м счи́слился еси́ преподо́бных, ра́дуяся.

Я́ко ши́пок сладково́нен, на́с благоуха́ют богодухнове́нная словеса́ боже́ственнаго язы́ка твоего́: ты́ бо благоуха́ние бы́л еси́ на́с ра́ди Излия́вшагося за милосе́рдие и в пло́ть Обле́кшася, богоно́се всече́стне.

Па́мять твоя́, дне́сь преподо́бно возсия́вши, озаря́ет сердца́ восхваля́ющих твое́ а́нгельское житие́, Кассиа́не, в не́йже мо́лимся согреше́ний проще́ние дарова́ти все́м, помоли́ся.

Богоро́дичен: Гла́с Ти́ прино́сим Гаврии́лов, взыва́юще: ра́дуйся, трапе́зо, боже́ственный хле́б носи́вшая; ра́дуйся, непроходи́мая две́ре; ра́дуйся, ра́досте все́х спаса́емых, преподо́бных похвало́, Богоро́дице Присноде́во.