Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Дре́ва жи́зни и ра́йскаго вои́стинну наслажде́ния вседомо́вне, всему́дрии, ны́не восприе́мше, ва́с восхваля́ющия моли́те спасти́, к Человеколю́бцу.

В пути́ за́поведей Твои́х ше́ствуя те́пле, Тво́й ра́б, Влады́ко, оби́тели дости́же, сугу́бым жела́нием жи́зни ве́чныя наслажда́яся.

Но́вую ски́нию Авраа́мову показа́л еси́ тво́й до́м все́м, те́мже, чу́дне, во Авраа́млих не́дрех досто́йно и пра́ведно воспочи́л еси́.

Богоро́дичен: Ве́сь в Тя́ всели́вся, Всенепоро́чная, всего́ мя́, челове́ка, вообрази́, из Отца́ возсия́вый пре́жде все́х ве́к, Сло́во Безнача́льное.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Светле́йшими досто́инствы почте́н, светоно́сным житие́м украси́вся, дея́ние бо восхожде́ние виде́ния, вопия́, показа́л еси́: Ты́ еси́ Бо́г на́ш, и не́сть свя́т, па́че Тебе́, Го́споди.

Я́ко все́х строи́тель бы́в, все́х попече́ние прия́л еси́, тре́бующим бога́тство твое́ раздая́, прие́мля любому́дренно мона́шествующих чи́ны, о́тче преподо́бне.

Зако́нами пита́яся Влады́ки, в зако́не и поуче́нием, и наказа́нием Госпо́дним наказа́л еси́ твоя́ де́ти, зовы́й, чу́дне: Ты́ еси́ Бо́г на́ш, и не́сть свя́т, па́че Тебе́, Го́споди.

Богоро́дичен: Еди́ну де́вствующую по рождестве́ Мари́ю, святы́х святе́йшую, су́щую неискусобра́чную Богоро́дицу, прииди́те, воспои́м, ве́рнии, зову́ще: ра́дуйся, Ма́ти Чи́стая, ра́дуйся, Влады́чице.

Седа́лен, гла́с 8.

В за́поведех Влады́ки бдя́й, подо́бными же нра́вы де́ти твоя́ наказу́я, блаже́нне Ксенофо́нте, и сопру́жницу, с ни́миже вы́шнее насле́довал еси́ Ца́рствие, напа́стей вся́ческих оста́вив обурева́ние. Те́мже восхваля́ем благоче́стно ва́с вси́, и любо́вию почита́ем, и ве́рно взыва́ем: богоно́снии всеблаже́ннии, моли́теся Христу́ Бо́гу грехо́в оставле́ние дарова́ти пра́зднующим любо́вию святу́ю па́мять ва́шу.

Богоро́дичен: Я́ко де́ву и еди́ну в жена́х, Тя́, безсе́менно ро́ждшую Бо́га пло́тию, вси́ блажи́м, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим всесвято́е Рождество́ Твое́ и согла́сно вопие́м Ти́: моли́ Христа́ Бо́га прегреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Крестобогоро́дичен: А́гнца и Па́стыря и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние, ве́рою воспева́ющим Боже́ственныя Стра́сти Твоя́.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Спа́сшеся от бу́ри жите́йския, в приста́нище благоче́стия устреми́стеся, де́ти блаже́ннейшии.

Научи́вшеся зна́нию боже́ственных и челове́ческих, Бо́гу служи́ти изво́листе.

Из бе́здны, преподо́бнии, мирски́я изба́вльшеся пресла́вно, ко благи́х бе́здне приидо́сте.

Богоро́дичен: Изба́вленнии кро́вию, от ре́бр излия́нною Сы́на Твоего́, Богома́ти, вси́ Тя́ блажи́м.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

К неги́бнущей преходя́й жи́зни, потща́лся еси́ дости́гнути свяще́нный, Арка́дие, гра́д и Гро́бу Су́щия Жи́зни поклони́лся еси́.

Я́ко благоле́пный вои́стинну бы́вший о тебе́ про́мысл, и чу́дно, и препросла́вленно окормле́ние боже́ственное все́х Влады́ки, всеблаже́нне Арка́дие!

Тобо́ю промышля́яй, И́же на объя́тиих Симео́новых пе́рвее возлеги́й, боже́ственнаго ста́рца, ста́рцу тя́ боже́ственному, Арка́дие, приво́дит, Христо́с путево́ждствова.

Богоро́дичен: Сы́на Безнача́льнаго и Соприсносу́щнаго Отцу́ родила́ еси́ преесте́ственно, из Тебе́ воплоще́нна, Всенепоро́чная Отрокови́це. Те́мже Богоро́дицу Чи́стую Тя́ пропове́дуем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Блаже́нныя жи́зни жела́я, к мона́шествующих притека́еши собо́ру, жи́тельное дохнове́ние споспе́шника, Иоа́нне, творя́.

Человекоуби́йцы зло́бы ме́ртвость и смертоно́сный я́д отве́рг, к Живоно́сному Гро́бу Христо́ву, Иоа́нне, прите́кл еси́.

Иоа́ннову житию́ поревнова́л еси́, и́бо, я́ко о́н, в пусты́ню всели́лся еси́ и чи́сте пожи́л еси́, Иоа́нне, Христу́ очища́яся.

Богоро́дичен: Не́бо простры́й хоте́нием, друго́е не́бо соде́ла одушевле́нно: Тя́, Богома́ти Чи́стая, и из Тебе́ су́щим во тме́ возсия́.

Конда́к, гла́с 4.

В за́поведех бо́дрствовал еси́ Влады́чних, ни́щим расточи́вый твое́ бога́тство, блаже́нне, ти́хо с сопру́жницею и ча́ды твои́ми, те́мже насле́дуете Боже́ственное наслажде́ние.

И́кос:

Стра́нен пу́ть боголе́пно, Ксенофо́нте, ше́ствовал еси́, и с сопру́жницею забы́сте естество́, я́коже безтеле́снии я́ве, на земли́ я́вльшеся; те́мже и две́ри небе́сныя ва́м отверзо́шася, и со а́нгелы лику́ете, я́ко виногра́да бы́вше Госпо́дня боже́ственнии де́лателе, и с ча́ды. Моли́теся у́бо Христу́ дарова́ти зарю́ просвеще́ния омраче́нным на́шим сердца́м, па́мять ва́шу творя́щим светоно́сную, Венцеда́теля Христа́ велича́юще.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Ума́ чистото́ю богоно́сный ва́ше соше́ствие зря́, провозвести́: Бо́г бо пра́ведный, благоче́стие ва́ше боже́ственне возмзди́в, во еди́но, я́ко Ми́лостив, собра́.

Ре́вность зря́ благоче́стия, жела́ние прие́м, ве́ру призре́в ва́шу, Человеколю́бец, вся́ собра́ во еди́ну трапе́зу ва́с, я́ко Благоде́тель и Препросла́вленный.

Богоро́дичен: Наде́жда непосты́дная, наде́жда изве́стная, и стена́ непоколеби́мая, и покро́в, и помо́щница бу́ди ми́, Всенепоро́чная, упова́ющему на Тя́: на Тя́ бо возлага́ю, Чи́стая, всю́ наде́жду спасе́ния моего́.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Пе́щь, зело́ огне́м распаля́емую, разлуче́ние от дру́г дру́га кре́пко претерпе́сте, утро́бами бо растерза́еми и душа́ми распаля́еми, остно́м сро́дства страда́ния му́чеников подъя́сте.

Свы́ше ва́с о́блак росода́тельный человеколю́бия осени́ в гора́х Сио́нских, иде́же роса́ Ду́ха ученики́ просвети́, зову́щия: благослови́те, вся́ дела́ Госпо́дня, Го́спода.

Ми́лостива на́м и благосе́рда бы́ти Благоде́теля моли́те, отцы́ всебога́тии, ва́шу торжеству́ющим свяще́нную па́мять, естество́м соедине́нных и совоку́пленных благода́тию.

Богоро́дичен: Единоро́днаго Сы́на и Бо́га Сло́ва, пре́жде ве́к из Безнача́льнаго Отца́ неизрече́нно возсия́вшаго, тва́ри перворо́дна бы́вша, родила́ еси́, те́м Тя́, Богома́ти, вси́ язы́цы, сла́вим.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

На ра́мех взе́мше Христо́в Кре́ст, вои́стинну ше́ствовасте стезе́ю воздержа́ния, вся́ку доброде́тель соверша́юще, до́ндеже са́мую и́стинно нестаре́емую жи́знь прия́сте, вседомо́вне венчава́еми.

Огоспо́дствовавше плотско́му мудрова́нию, Ду́ха бога́тство сокро́виществовасте, благода́ть врачева́ний прие́мше от Исто́чника дарова́ний, к Нему́же ны́не преше́дше, ве́чно почива́ете.

Победи́вше кова́рства змии́ная, на коне́ц по́честей, преподо́бнии, нареко́стеся, пра́вды венцы́ от Христа́ прие́мше досто́йно. Его́же ны́не моли́те, е́же спасти́ ду́ши на́ша.

Богоро́дичен: Безма́терня пе́рвее по пе́рвому рожде́нию, на́с ра́ди воплоще́нна, ражда́еши без отца́, во двою́ познава́ема естеству́, Боже́ственнем и челове́честем, и си́ми ве́руема де́йствы, Богоневе́сто.

Свети́лен.

Расточи́л еси́ бога́тство ни́щим богоуго́дно и вседомо́вне присво́ился еси́, о Ксенофо́нте, Го́споду, Его́же моли́, всеблаже́нне, от страсте́й на́с изба́вити.

Богоро́дичен: Во́инства а́нгелов и святы́х ли́ки превзыдо́ша и́стинно вели́чия Твоя́, Чи́стая. Те́мже Христа́ умоли́ о лю́дех согре́шших.