Канон святому преподобному Мартиниану Кесарийскому

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Та́йными пе́сньми согла́сно, прииди́те, восхва́лим по́стника благоче́стия дне́сь, Мартиниа́на, ве́рно, я́ко до́бре и зако́нно пости́вшася, те́мже и побе́ды прия́т от Христа́ вене́ц.

Неукло́нно стра́хом Христо́вым, о́тче, огражда́емь, стра́ха вра́жия, я́коже мо́лния, отгна́л еси́, стра́шен бо бы́л еси́ на ни́х терпе́нием воздержа́ния и мечта́ньми непоколеби́мь пребы́л еси́, прехва́льне.

Спаси́тельною си́лою Христо́вою искуше́ние тебе́ де́монское наше́дшее удо́бь ми́мо тече́, жены́ наи́тие, преподо́бне, ю́же спасы́й, уязви́л еси́ сея́ ра́ди злонача́льника.

Богоро́дичен: Во чре́ве поноси́вши без му́жа, Чи́стая, и Де́ва же Ма́ти в жена́х еси́ нетле́нна, Ду́хом Святы́м Сы́на Бо́жия заче́нши во утро́бе, Его́же по благоволе́нию Отца́ родила́ еси́ без се́мене.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Пло́ти воздержа́нием отмы́л еси́ ме́рзости зло́бу, я́коже ти́ну, и обре́л еси́ чистото́ю ума́ стези́, преподо́бне, пра́ведных, гла́дких путе́й отбе́г грехо́вных, му́дре.

Вжили́в се́рдце твое́ и разже́г стра́хом и любо́вию Госпо́днею, пло́ть твою́ опали́л еси́ во́лею огне́м невеще́ственным, му́дре, си́м пропису́я на́м гее́нны, преподо́бне, негаси́мый о́гнь.

Ураня́я твое́ те́ло огне́м всеяду́щим, гони́тель яви́лся еси́ и вене́чник, уязвля́я супоста́та терпе́нием, очища́я же помышле́ний скве́рну, преподо́бне, и убеля́я ду́хом, и де́вствуя пло́тию.

Богоро́дичен: Зача́тие неискусому́жно, Боже́ственное Рожде́ние несказа́нно, па́че ума́ бо, Бо́г же, ражда́емый вы́ше естества́. О, Рождества́ Твоего́! О, чистоты́ Твоея́! Тобо́ю бо яви́ся мне́ Бо́г в ра́бии о́бразе.

Седа́лен, гла́с 4.

Преподо́бный Тво́й, Го́споди, в поще́нии свое́м по́двиги показу́я усе́рдием мно́гим, Христе́ Бо́же на́ш, име́я бо кре́пость Твою́, преоби́дяще бе́сы, посече́ сло́вом некре́пкую горды́ню. Те́мже Тя́ мо́лим: спаси́ ду́ши на́ша.

Сла́ва, и ны́не, богоро́дичен: Де́во Всенепоро́чная, Я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Благослове́нная, моля́щи не преста́й, проще́ние прегреше́ний на́м дарова́ти.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

Умертви́ся томи́теля ле́сти обре́тение и побежде́ние прия́т, ея́же бо ра́ди победи́ти наде́яшеся, се́ю низложи́ся и попира́ется до́бле нога́ми кре́пко.

Претерпе́л еси́ до́блественным нра́вом Го́спода, стези́ упра́вил еси́ и на ка́мень всели́лся еси́, преподо́бне, без покро́ва лежа́щ, я́ко на не́бо, возше́д в ма́лый о́стров.

До́блественнеи и кра́снии твои́ но́зе, прехва́льне, к тече́нию просте́рл еси́, от страны́ в страну́ преходя́: бежа́л бо от гра́да страсте́й и в безстра́стие дости́гл еси́.

Богоро́дичен: Пребыла́ еси́ по Рождестве́ Де́ва, Препе́тая, Бо́г бо Безнача́льный яви́ся, из Тебе́ проходя́, Ему́же вчелове́чшуся, подо́бия о́браз целу́ем.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Две́рь обре́т доброде́тели, кова́рство врага́, преподо́бне, яви́лся еси́ и жи́зни мое́й предста́тель, души́ же наста́вник, погруже́нней лю́те бу́рею.

Да́р Бо́жий я́ко прия́т моли́тв твои́х кре́пость, вся́ соверша́еши, му́дре, пресла́вно, и спаса́еши от глубины́, и от бу́ри избавля́еши страсте́й ду́ши на́ша.

Богоро́дичен: Во двою́ естеству́ и ипоста́си еди́ной бы́л еси́ и соверше́н Сы́й Челове́к. Несме́шен о́браз или́ зра́к не пострада́, Сло́ве, воплоща́яся, Го́споди.

Пе́снь 6.

Ирмо́с: Ко Го́споду от ки́та Ио́на возопи́: Ты́ мя́ возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.

Си́лою Бо́жиею укре́пль твою́ ду́шу, прехва́льне, не ужа́слся еси́, наде́ждею огражда́емь, непрепла́ваему глубину́, му́дре, прейти́, но спасе́ся, дельфи́нми носи́мь.

Житие́ твое́ а́нгелы и́стинно удиви́, де́моны посрами́ и челове́ки просвети́, и жену́ па́че спа́сл еси́, и на стезю́ поще́ния привле́кл еси́.

Подо́бие твои́м трудо́м и честны́м подвиго́м, му́дре, твое́ преи́тие по достоя́нию и́стинно бы́сть, и взя́т на враги́ целому́дрия побе́ду, воздержа́нием зми́я уби́в.

Богоро́дичен: Зако́ны о Тебе́ изнемого́ша вои́стинну естества́, Де́во Чи́стая, де́вствуеши бо, ро́ждши сопресто́льна Отцу́ и Боже́ственному Ду́ху Сло́во су́ща, Бо́га же и Челове́ка.

Конда́к, гла́с 2.

Я́ко подви́жника благоче́стия иску́сна, и страда́льца произволе́нием честна́го, и пусты́ни жи́теля и все́льника, в пе́снех досто́йно восхва́лим Мартиниа́на присночестна́го: то́й бо зми́я попра́.

И́кос:

От коне́ц да́же до коне́ц про́йде веща́ние кра́сных доброде́телей и боже́ственных по́двиг твои́х: мла́д сы́й во́зрастом, в пусты́нях возжела́л еси́ пожи́ти, пе́ния Христу́, псалмы́ и моли́твы воспуща́я при́сно, де́нь же и но́щь возраста́я в боле́знех и слеза́х, чи́сте житие́ твое́ сконча́л еси́ и, му́дре, злонача́льнаго посрами́л еси́, ты́ бо зми́я попра́л еси́.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Ве́щнаго жития́ уста́вль себе́, мона́шествуй, бе́гай кре́пко, гра́ды вся́ и страны́ обходи́, я́ко досто́йно, Мартиниа́н бо учи́т без печа́ли пе́ти: благослове́н Бо́г оте́ц на́ших.

Тве́рдым хожде́нием Па́влову бы́л еси́, му́дре, ше́ствию о́браз, любо́вию гоня́, его́же пости́гл еси́ воздержа́ния тече́нием твои́м, те́мже и, я́ко стра́нен ми́ра, позна́лся еси́, прехва́льне, Царю́ Небе́сному и просла́вился еси́ ве́рно.

Тече́ние скончава́я поще́ния твоего́, учени́к Христо́в, Ду́хом Боже́ственным проуве́дев отше́ствие е́же от те́ла, поя́ше душе́ю несомне́нною: я́ко в ру́це Твои́, Влады́ко, ду́х мо́й и ду́шу мою́ ны́не предаю́.

Богоро́дичен: Во́ду жи́ву подая́, от исто́чника Христо́с источи́, в Твою́ святу́ю, Пресла́вная, утро́бу всели́ся, пребы́в неслия́нен, все́х нетле́ния напои́в, ве́рою зову́щих: благослове́нна еси́, Бо́га пло́тию ро́ждши.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Совле́кшися чу́вственне плотски́я немощны́я ри́зы и му́жества взе́мши оде́жду и ра́зум, отрокови́ца вопия́ше, постя́щися: Тя́ превозноша́ю, Иису́се, во ве́ки вся́.

Ра́дуется усе́рдно, вои́стинну на ка́мени Христо́ве утвержде́на и посто́м и ве́рою вооружи́вшися кре́пко, отрокови́ца вопия́ше в пе́снех: Тя́ превозноша́ю, Иису́се, во ве́ки.

Я́ко преложе́н от тле́нных и вы́шняго нетле́ния прича́стник бы́в, богоно́се, и боже́ственное тече́ние сконча́в, вене́ц прие́м, вопия́л еси́: Тя́ превозноша́ю, Иису́се, во ве́ки.

Богоро́дичен: Сше́дый с небесе́ за милосе́рдие, Ще́дре, Бо́же вся́ческих, и ро́ждься от Де́вы, спаси́ пою́щия: по́йте, вся́ дела́, Го́спода и превозноси́те Его́ во ве́ки.

Пе́снь 9.

Ирмо́с: Что́ о Тебе́ ве́лия и пресла́вная та́йна, Ада́мова дщи́ и Вы́шняго Ма́ти, Еди́ный к Бо́гу небла́зненный ве́рных мо́ст? Тя́ немо́лчными пе́сньми, ве́рнии, Богоро́дицу велича́ем.

Зако́ны превозше́д, о́тче, поще́ния, просия́л еси́, в воздержа́нии вся́цем и моли́тве бдя́, посто́м же, вку́пе и чистото́ю, и гове́нием. Те́мже тво́й Венча́тель при кончи́не страда́ний тя́ пропове́дует — Христо́с.

Досто́ин Бо́гу яви́вся, я́ко до́бре подви́глся еси́, вся́ко бо бре́мя отве́рг, ле́гко преплы́л еси́, о́тче, вели́кую и тя́жкую жития́ сего́ пучи́ну и прише́л еси́ в приста́нище ти́хо, преше́д твое́ тече́ние, му́дре.

Богоро́дичен: Ты́ еси́ и́стинно, Еди́на Богоро́дице Присноде́во, христиа́н направле́ние, гре́шников Предста́тельница, из Тебе́ бо благоче́стно возсия́ Избавле́ние. С Ни́мже Тебе́ по до́лгу в ве́ре пе́снь скончава́ю.

Свети́лен.

А́нгельскаго жития́ жела́я, удали́л еси́ себе́ в пусты́нях и, стра́сти покори́в пло́ти, равноа́нгелен яви́лся еси́, Мартиниа́не богоно́се.

Богоро́дичен: Гора́, ю́же предви́де дре́вле боже́ственный Авваку́м, присе́нна, часта́, Ты́ яви́лася еси́, Де́во, и Тя́ Дави́д имену́ет усыре́ну и ту́чну.