Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Напое́ньми твои́ми, блаже́нне, та́инственными, напая́я бога́тно прозя́бший мо́й по́мысл, я́ко кла́с, пе́ния тебе́ принести́ твои́ми моли́твами сподо́би.

Глаго́л тече́ния твои́х, я́ко из Еде́ма, всебога́те Ни́ле, происходя́щая я́вственно, лице́ все́ приснотеку́щее церко́вное напая́ют.

Догма́тов и слове́с река́ твои́х, богоглаго́ливе, сердца́ благочести́вых, наводня́ющи, напая́ет, злочести́вых же потопля́ет собра́ния.

Богоро́дичен: Изблева́ в слу́хи Е́вы я́д душетле́нный губи́тель и вра́г; Христа́ же ро́ждши, Богома́ти, того́ вре́да исцели́ла еси́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Дарова́ния, о́тче, Ду́ха но́сит твое́ помышле́ние, лука́вая помышле́ния отгоня́.

Ми́ро благово́ннейшее твоя́ моли́твы на́м вдохну́в, священноде́лателю, виде́нием де́тельным пожи́в.

Источи́л еси́ уче́ния ты́ небе́сная, всему́дре, я́ко от исто́чника, и церко́вныя пито́мцы обогати́л еси́.

Богоро́дичен: Умертви́ мудрова́ние пло́ти на́шея, Пречи́стая, Исто́чник безсме́ртия челове́ком источи́вшая.

Седа́лен, гла́с 8.

Украси́в тво́й у́м виде́нии, богосло́вия ре́ки отры́гнул еси́, напая́я сердца́, Ни́ле Богоно́се, ве́рою почерпа́ющих твои́х уче́ний пи́во, проза́рное же и чи́стое, и чту́щих па́мять твою́ светоза́рную же и честну́ю, преподо́бных удобре́ние и отце́в хвало́.

Богоро́дичен: Я́же непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами ма́терними Твои́ми: я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Крестобогоро́дичен: И́же от крове́й Твои́х чи́стых Вопло́щшагося и па́че ума́ из Тебе́, Чи́стая, Роди́вшагося, на дре́ве ви́сяща среди́ злоде́ев зря́щи, утро́бою боле́зновала еси́ и, ма́терски пла́чущи, вопия́ла еси́: увы́ Мне́, Ча́до Мое́, что́ Боже́ственное и неизрече́нное строе́ние Твое́, и́мже оживи́л еси́ созда́ние Твое́? Воспева́ю Твое́ благоутро́бие.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Возведи́, всему́дре, от страсте́й мя́ плене́ния, я́ко избавле́ние и це́ну Бо́гу принося́ моли́твы твоя́.

Свяще́нно вчини́ти е́же о Христе́ му́дрости догма́ты, искуси́в поще́нием, себе́, всеблаже́нне, предочи́стил еси́.

Помышле́ний вся́кое возвыше́ние, о́тче, взима́ющееся смири́л еси́, мно́жеством му́дрости твоея́ погуби́в си́х па́мять.

Богоро́дичен: Отцу́ Соприсносу́щный и я́ко Бо́г, Сло́во, пре́жде безпло́тное, в после́дняя воплоти́ся от чи́стых крове́й Твои́х, Всепе́тая.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Целому́дренно жела́я, всему́дре, боже́ственныя чистоты́, оста́вил еси́ все́ жития́ пристра́стие.

Разу́мная ты́ вы́ше зна́ния, богоявле́нне, мы́сленно пости́гл еси́, едине́нием Боже́ственным науча́емь.

О́блак тя́, ту́чами зна́ния, богоно́сне, все́ потопля́ющий неразу́мие, ве́мы.

Богоро́дичен: Я́ко кри́н, сия́ющий посреде́ те́рния, обре́т, Жени́х Тя́, Девома́ти, возлюби́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Му́дрости да́ром украша́емь и жития́ све́тлостию удобря́емь, священноде́латель боже́ственный бы́л еси́, Зижди́телю хода́тайствуя, и зда́нию, и бы́л еси́ пресве́тел и обзо́рный, о́тче, учи́тель.

К горе́ доброде́телей прибли́жився и Боже́ственным покры́вся, о́тче, мра́ком, от Бо́га догма́тов скрижа́ли богопи́санныя прия́л еси́, всебога́те, и вторы́й на́м Моисе́й законополо́жник показа́лся еси́ благода́ти.

Освяти́в себе́ во́лею та́инственно, я́ко вольноже́ртвенную же́ртву предстоя́нием Зижди́телю, Ни́ле, и виде́нии и дея́нии украша́емь, помина́й о на́с, ве́рно соверша́ющих па́мять твою́.

Богоро́дичен: Ви́девше обра́зными явле́нии стра́шных Твои́х та́ин глубину́, я́ко Бо́гу во чре́во Твое́ всели́тися, богоглаго́ливии проро́цы провозвести́ша, Всенепоро́чная, и ны́не мы́, сбы́тие ви́дяще, сла́вим.

Конда́к, гла́с 8.

Хвра́стная страсте́й, я́же от телесе́, воста́ния сечи́тельно, Ни́ле блаже́нне, во бде́нной твое́й ссе́кл еси́ моли́тве, но, я́ко име́я дерзнове́ние ко Го́споду, от вся́ких мя́ бе́д свободи́, да зову́ ти: ра́дуйся, о́тче всеми́рный.

И́кос:

Кто́ земноро́дных изрещи́ возмо́жет, Ни́ле, жи́тельства твоего́ страда́ния, и жития́ твоего́ безме́рныя труды́, и мно́гая тща́ния твоя́, я́же на земли́, я́ко безпло́тный, соверши́л еси́? Но оба́че зову́: ра́дуйся, реко́ Боже́ственных благода́тей; ра́дуйся, цевни́це Христо́вых уче́ний; ра́дуйся, ча́ше му́дрости и зна́ния; ра́дуйся, возде́лание безсме́ртных насажде́ний; ра́дуйся, догма́те де́тельнейший богодухнове́нных слове́с; ра́дуйся, зако́на богода́ннаго иску́снейший толко́вниче; ра́дуйся, садоде́лателю рая́ мы́сленнаго; ра́дуйся, де́вства храни́лище ве́лие; ра́дуйся, кра́сная гу́сль Ду́ха; ра́дуйся, страсте́й кореносе́чный мечу́; ра́дуйся, пра́ведных муже́й высото́; ра́дуйся, ве́рных земноро́дных предста́телю. Ра́дуйся, о́тче всеми́рный.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Напая́емь, о́тче, ту́чами небе́сными, яви́лся еси́ многопло́ден, плоды́ красне́йшия принося́ Влады́це, ве́рою зову́щия: оте́ц на́ших Бо́же, благослове́н еси́.

Тво́й, всеблаже́нне, язы́к, хля́би догма́тов разве́рз, ерети́ческую ле́сть кре́пко потопля́ет, ве́рныя же науча́ет пе́ти: оте́ц на́ших Бо́же, благослове́н еси́.

Жи́тельство а́нгельское в телеси́, о́тче, на земли́ пожи́л еси́, и Боже́ственных виде́ний го́рних позо́рищ наслажда́яся, и пое́ши: оте́ц на́ших Бо́же, благослове́н еси́.

Богоро́дичен: От утро́бы де́вственныя вопло́щся, яви́лся еси́ в на́ше спасе́ние. Те́м Тя́, Ма́терь, ве́дуще Богоро́дицу, благода́рственно зове́м: оте́ц на́ших Бо́же, благослове́н еси́.

Пе́снь 8.

Ирмо́с: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три́ о́троцы не повину́вшеся, Го́спода воспева́ху и славосло́вяху во вся́ ве́ки.

Доброде́тель восприи́м соверше́нну, благи́х пе́рвое возлюби́в, и Того́ ны́не блиста́ньми просвеща́емь, зове́ши: Го́спода по́йте и превозноси́те Его́ во ве́ки.

Ве́детельным обогати́вся иску́сством, де́тельное пости́гл еси́ благосла́вие, благода́ти зари́ посыла́я вопию́щим: Го́спода по́йте и превозноси́те Его́ во ве́ки.

Мирски́х мо́лв отбежа́в, молча́ния приста́нище дости́гл еси́ и страсте́й прило́ги умертви́л еси́, зовы́й: Го́спода по́йте и превозноси́те Его́ во ве́ки.

Богоро́дичен: Изве́стно ве́дяще, Де́во, ро́ждшагося из Тебе́ Бо́га Сло́ва, пое́м Тя́ всеблагоче́стно, ве́рою песнопою́ще: Го́спода по́йте и превозноси́те Его́ во ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Расто́ргша пристра́стия мирска́го у́зы и Бо́гу приближа́ющася тя́ зря́, о́тче, губи́тель ва́рварская треволне́ния тебе́ воздви́же, разсла́бити твою́ мне́в кре́пость. Боже́ственным же про́мыслом того́ отрази́л еси́ козноде́йства, всеблаже́нне.

Бога́тными сия́я заря́ми уче́ний многообра́зными, освети́л еси́ благоче́стия ве́рою приходя́щих тебе́ ду́ши, и́бо ча́ши, всему́дре Ни́ле, му́дрости чи́стей устне́ прикосну́в, поче́рпл еси́ оби́льно и лю́бящим препода́л еси́.

Освяти́л еси́ усе́рдно себе́, о́тче, та́инственно, я́ко непоро́чное заколе́ние Зижди́телю, Того́ возлюби́в и́скренно: Его́же ны́не престо́лу, всеблаже́нне Ни́ле, предстоя́, приле́жно моли́ся ве́рою соверша́ющим твою́ па́мять получи́ти твоея́ све́тлости.

Богоро́дичен: Испра́вила еси́, Де́во, же́нское поползнове́ние, Сло́ва ро́ждши, исправля́юща низве́рженныя, я́ко бла́га и держа́вна си́лою, за благоутро́бие превозмо́г, из Тебе́ вопло́щшася, и спа́сша ми́р страстоуби́йственными Свои́ми Страстьми́.

Свети́лен.

А́нгельское житие́ жела́я, удали́л еси́ себе́ в пусты́ню и, стра́сти покори́в плотски́я, равноа́нгелен яви́лся еси́, о́тче на́ш богоно́се.

Богоро́дичен: И́же от Бо́га ми́ру да́нных бла́г Ты́ вина́ еси́, Богоро́дице, но и ны́не ми́лостива сотвори́ за о́бщее спасе́ние благоуве́тливаго Бо́га.