Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Па́вла богоно́снаго, я́ко мона́шествующих удобре́ние, ве́рнии, соше́дшеся, пе́сньми по до́лгу почита́ем.

Бы́л еси́ пусты́ни пе́рвый жи́тель, Па́вле сла́вне, и небе́снаго Ца́рствия насле́дник показа́лся еси́ поще́нием.

Всего́ себе́ воздержа́нием очи́стив, всеблаже́нне, жили́ще яви́лся еси́ Бо́жие и а́нгелов единосе́льник.

Богоро́дичен: Пречи́стая Богоро́дице, Я́же воплоще́нно Присносу́щное и Пребоже́ственное Сло́во па́че естества́ ро́ждшая, пое́м Тя́.

Пе́снь 3.

Ирмо́с: Утвержде́й Сло́вом небеса́ и зе́млю основа́вый на вода́х мно́гих, утверди́ мя́ к пе́нию славосло́вия Твоего́, Го́споди.

К Бо́гу о́ком твоея́ души́ взира́я, о́тче, Того́ возлюби́л еси́, возненави́дев земна́я и а́нгельскую соверши́в жи́знь.

Луча́ми, о́тче, доброде́телей, страсте́й отгна́л еси́ мглу́ я́ве, просвеще́ние Ду́ха во твое́м се́рдцы прие́м.

Небе́сным хле́бом пита́яся, я́ко Илия́ дре́вле вра́ном, мы́сленныя отбе́гл еси́, о́тче, Иезаве́ли, к покро́ву Христо́ву.

Богоро́дичен: Ца́рь сла́вы и Творе́ц, обагри́в кровьми́, Богороди́тельнице, Свою́ багряни́цу омочи́в, та́инственно очервлени́.

Седа́лен, гла́с 1.

Ми́ра кра́сная от се́рдца возненави́дев и Еди́наго Бо́га от души́ возлюби́в, пусты́ню, я́ко во обита́тельный гра́д, Па́вле, пости́гл еси́. В еди́нех то́кмо виде́ниих упражня́яся, яви́лся еси́, я́ко а́нгел, с пло́тию живы́й. Те́м тя́ почита́ем.

И ны́не, богоро́дичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющь на́м вино́ спаси́тельное, все́х веселя́щее ду́ши и телеса́. Те́мже, я́ко вину́ Тя́ до́брых блажа́ще при́сно, со а́нгелом вопие́м Тебе́: ра́дуйся, Благода́тная.

Крестобогоро́дичен: Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4.

Ирмо́с: Та́йно проро́к предзря́ от Де́вы Тя́, Сло́ве, воплоща́ема, пе́сненно вопия́ше: сла́ва си́ле Твое́й, Го́споди.

Насажде́н в дому́ Бо́жии, доброде́телей благопло́дие прозя́бл еси́ и плотска́я увяди́л еси́ воста́ния по́стничеством твои́м.

Огне́м любве́ Бо́жия страсте́й те́рние попали́л еси́ и тебе́ сама́го Ду́ха, о́тче, жили́ще показа́л еси́.

Жезло́м доброде́тельныя твоея́ жи́зни, я́коже зве́ри, стра́сти отгна́л еси́, те́мже и твоя́ сме́рть зве́ри на погребе́ние твое́ собра́.

Богоро́дичен: Багряни́ца истка́ся та́инственная из чи́стых крове́й Твои́х все́х Бо́гу, в ню́же оде́явся, Богоро́дице, соедини́ на́с Бо́гу и Отцу́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

В пе́ниих и поще́ниих, моли́твах же и бде́ниих пожи́в, преподо́бне, к Бо́гу всели́лся еси́.

Житие́ твое́ всечестно́е бы́сть в Го́споде, Па́вле всеблаже́нне, и погребе́ние твое́ пресла́вно.

Тече́ние поще́ния, преподо́бне, сконча́в, вы́шним си́лам собесе́дник, о́тче, бы́л еси́.

Богоро́дичен: Де́ву по Рождестве́ пое́м Тя́, Богоро́дице, Ты́ бо Бо́га Сло́ва пло́тию ми́ру родила́ еси́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Ру́ки просте́р к Бо́гу, ду́шу твою́, преподо́бне, Тому́ преложи́л еси́, во дни́ и нощи́ благоугожда́я Ему́.

Просла́виша успе́ние твое́ а́нгелов во́инства, проро́ков же чи́ни и святы́х апо́столов, о́тче преподо́бне.

Бу́рю страсте́й пребе́г, ве́трилом, преподо́бне, кра́йняго по́стничества в небу́рное приста́нище устреми́лся еси́ Христо́во.

Богоро́дичен: Еди́на сло́вом пло́тию Сло́во Ро́ждшая, изба́ви, мо́лимся, сете́й врага́ ду́ши на́ша.

Конда́к, гла́с 3.

Я́ко свети́ло незаходя́щее мы́сленнаго Со́лнца, соше́дшеся, дне́сь восхва́лим в пе́снех: возсия́л бо еси́ су́щим во тме́ неразу́мия, вся́ возводя́ к Боже́ственней высоте́, фиве́ев украше́ние, Па́вле преподо́бне, отце́в и по́стников тве́рдое основа́ние.

Пе́снь 7.

Ирмо́с: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Мудрова́ние плотско́е покори́в Ду́ху, преподо́бный вопия́ше: благослове́н еси́ во ве́ки, Го́споди Бо́же оте́ц на́ших.

Спасе́н бы́в от вра́жиих се́тей, преподо́бне, в ра́дости вопия́ше: благослове́н еси́ во ве́ки, Го́споди Бо́же оте́ц на́ших.

Страсте́й пла́мень ве́сь попра́в по́стнически, преподо́бный вопия́ше: благослове́н еси́ во ве́ки, Го́споди Бо́же оте́ц на́ших.

Богоро́дичен: Не́бо сотвори́вый Де́ву, и из Нея́, я́ко со́лнце, возсия́в, благослове́н еси́ во ве́ки, Го́споди Бо́же оте́ц на́ших.

Пе́снь 8.

Ирмо́с: Безнача́льнаго Царя́ сла́вы, Его́же трепе́щут небе́сныя си́лы, по́йте, свяще́нницы, лю́дие, превозноси́те во вся́ ве́ки.

Поревнова́л еси́ Иоа́нну богому́дрому Предте́чи, в пусты́ни пости́вся, с ни́мже и жи́знь получи́ти сподо́бился еси́ и́стинно присносу́щную.

Угаси́л еси́ страсте́й пе́щи, о́тче на́ш, воздержа́ния росо́ю, вопия́ всеблагоче́стно: лю́дие, превозноси́те Христа́ во ве́ки.

Ра́й и́стинно соде́лал еси́ пусты́ню, в не́й преизя́ществовав во вся́кой доброде́тели, те́мже и рая́ сла́дости сподо́бился еси́.

Богоро́дичен: Я́ко иму́щи к Бо́гу дерзнове́ние, Всепе́тая Богома́ти Мари́е, умоли́ Его́ бе́д изба́вити ве́рою Тя́ пою́щия.

Пе́снь 9.

Ирмо́с: Неви́димаго зра́ком Боже́ственным прие́мшая, Неискусобра́чная Де́во и Ма́ти, пе́сньми Рождество́ Твое́ велича́ем.

Я́ко сокро́вище тя́ мы́сленное сокрове́нно, преподо́бне, откры́ Бо́г Анто́нию, на́м же в сла́ву и ра́дование.

В стра́х Бо́жий себе́ сама́го пригвозди́в, о́тче преподо́бне, и сме́рти поуче́нием житие́ соверши́в, жи́зни сподо́бился еси́.

Я́ко дерзнове́ние к Бо́гу стяжа́в, моли́ о и́же на земли́ соверша́ющих ве́рою па́мять твою́ сию́, Па́вле блаже́нне.

Богоро́дичен: Собезнача́льнаго Отцу́ и Свято́му Ду́ху заче́нши Христа́ и ро́ждши несказа́нно, Де́во, моли́, е́же спасти́ся на́м.