Канон святому преподобному Павлу Латрийскому

Припев: Преподо́бне о́тче Па́вле, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 28 декабря (15 декабря ст. ст.); 28 декабря (15 декабря ст. ст.)

Глас 1.

Пе́снь 1.

Ирмо́с: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Но́вое тебе́ пе́ние похва́льное привнести́ во отверзе́ние у́ст, Па́вле богоно́се, тща́щуся, пода́ждь ми́ глаго́лати твои́ми моли́твами, преподо́бне, благода́ть, я́ко да по́двиги твоя́ честны́я пропове́м.

От ю́ности, преподо́бне, яре́м Госпо́день восприе́мь, и, в бразда́х твоего́ се́рдца пшени́цу се́яв духо́вную, кла́с пожа́л еси́, утвержда́ющь ду́ши, богоблаже́нне.

По́ты мно́жайшими восприя́л еси́ вы́шнее Ца́рство, я́ко безпло́тен на земли́ жи́в и те́лом пожи́в а́нгельское житие́. И ны́не у́бо, в высоча́йших Тро́ице предстоя́, на́с помина́й.

Богоро́дичен: Тле́нную мою́ пло́ть, Богоневе́сто, прие́м от Твои́х крове́й Безпло́тный и, в я́слех возлеги́й во́лею, сию́, ю́же прия́т, обожа́ет пло́ть, Богома́ти, от соедине́ния ея́ Преблаги́й.

Пе́снь 3.

Ирмо́с: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

О, твоего́ му́жества! О, душе́вныя до́блести, сла́вне! Ты́ бо, члено́вныя льво́в сокруши́ти неви́димых жела́я, два́ ка́меня носи́л еси́ превели́ка во вре́мя но́щи, тяготу́ на ра́менах.

Кто́ твоя́ по́двиги изрещи́ по достоя́нию возмо́жет? Ты́ бо, пути́ жесто́кия в пусты́ни ше́ствуя, суро́выя же́луди е́л еси́, вкуше́ние навыца́я твое́ услажда́ти боле́зньми воздержа́ния.

Богови́дец дре́вле Моисе́й в купине́ сподо́бися та́инственнаго виде́ния, всечестны́й же Па́вел, огню́ я́вльшуся свы́ше, са́м позна́ я́ве себе́ сама́го, неопа́льно распаля́ема.

Богоро́дичен: Безнача́лен Сы́й естество́м я́ко Бо́г и Отцу́ Сло́во равноче́стное, е́же под ле́том прия́л еси́, ро́ждся от Де́вы, нача́ло, естество́м я́влься Челове́к, и, младе́нствовав, я́ко Отроча́, Ты́, Христе́, яви́лся еси́, пелена́ми пови́т.

Седа́лен, гла́с 8.

Окормля́емь си́лою вседе́тельною и ве́трилом вкриля́емь кре́стным, легко́ преплы́л еси́ жите́йскую бу́рю и к боже́ственным и́стинно приста́нищем дости́гл еси́, доброде́телей ку́плю мно́гу стяжа́в, ю́же Влады́це все́х прине́сл еси́ и е́же, благи́й ра́бе, слы́шал еси́ и си́м после́дующая. Те́мже, Па́вле блаже́нне, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: Де́ва и Ма́ти Изба́вителя, Кресту́ предстоя́ще, боле́зненно со слеза́ми рыда́ющи, ма́терски вопия́ше: что́ стра́нное сие́ и пресла́вное, Сы́не? Источа́яй все́м челове́ком безстра́стие, посреде́ осужде́нною на Кресте́ распя́тся, в ре́бра пробода́емь и же́лчию напоя́емь от ру́к, я́же созда́л еси́. Но воста́ни и да́руй прегреше́ний оставле́ние ве́рою пою́щим Боже́ственная Твоя́ страда́ния.

Пе́снь 4.

Ирмо́с: Же́зл из ко́рене Иессе́ова и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Сно́м победи́вшуся тебе́ иногда́ во вре́мя ю́ности и ко всено́щному осла́бившуся стоя́нию, тво́й, ви́дев, честны́й учи́тель Пе́тр по лицу́, о́тче, ударя́ет и, тебе́ зауше́ние да́в, дае́т а́бие исцеле́ние.

Бо́гу осо́бь бесе́дуя и Сему́ прибли́жився несре́дственне, Па́вел, оте́ц на́ш, никогда́же победи́вся, от сна́ пребы́сть по я́зве учи́телеве, но, я́коже безпло́тен сы́й, бо́др при́сно бы́сть.

Сосу́д свяще́ннейший я́влься, ми́ро небе́сное — Христа́ прия́л еси́ се́рдцем твои́м и, свещу́ твоего́ терпели́внаго воздержа́ния жи́тельством доброде́тельным вже́г све́тло, к неве́стнику Боже́ственному восте́кл еси́.

Богоро́дичен: Име́я, Сло́ве, престо́л не́бо, зе́млю же подно́жие, в ложесна́ Де́вы, воплоща́яся, вше́л еси́ и во убо́г верте́п всели́лся еси́; от волхво́в же, царе́й перси́дских, я́ко Ца́рь да́ры и Богочелове́к прия́л еси́.

Пе́снь 5.

Ирмо́с: Бо́г Сы́й ми́ра, Оте́ц щедро́т, вели́каго Сове́та Твоего́ А́нгела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

От ка́ла страсте́й очи́стив у́м, нескве́рно зерца́ло бы́л еси́, осия́ния Ду́ха прие́м при́сно. Те́мже тебе́ искуси́тель посрами́ся, прирази́вся, и́же са́да зло́бы не́мощь изучи́вый.

Му́дрость су́що — Христа́ Бо́га во твое́м се́рдцы стяжа́в обита́ющую, нему́драго низложи́л еси́ зло́бы мудреца́ нога́ми твои́ми кра́сными, мудростьми́ разли́чными прельсти́ти тя́, Па́вле богому́дре, покуша́ющася.

Све́та сы́й прия́телище, дне́ сы́н, тмы́ прельсти́л еси́ нача́льника, я́коже льва́, на тя́ наве́тующа, земны́ми тру́сы и колеба́нии ка́мений, безсту́дием устраша́юща, Па́вле, и мечта́нии свире́пствующа.

Богоро́дичен: Изве́рженна пе́рваго Ада́ма из Еде́ма, Присноде́во Отрокови́це Богоневе́сто, Сло́во Пребезнача́льное, из Тебе́ вопло́щся и в я́сли безслове́сных восклони́вся я́ко Младе́нец, на́ш ро́д от безслове́сия изба́ви.

Пе́снь 6.

Ирмо́с: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Я́коже Спа́с, Христо́с Бо́г на́ш, ма́лыми хле́бы наро́д насы́ти многочи́слен, та́кожде и Па́вел, таи́нник Христо́в, скуде́ла мале́йшаго ма́лою водо́ю мно́жества до сы́тости возвесели́, и сы́тость явля́ет оби́лие.

Уставля́еши зно́й моли́твами твои́ми, чу́дне, и реши́ши гла́д прети́мый: вода́ми же, свы́ше пролия́вшимися, упая́еши зе́млю и напая́еши сухи́я сея́ бразды́, прозяба́я и богатя́ дарова́нии и умножа́яй сея́ де́лание.

Неболе́зненную жи́знь в боле́знех восприя́л еси́ и боле́зней лю́тых уставля́еши озлобле́ние, ве́рою прося́щим прия́ти врачева́ния от тебе́, всече́стне, отце́в добро́то. Те́мже разреши́ боле́зни моя́ душе́вныя и теле́сныя, молю́ся.

Богоро́дичен: Сло́во О́тчее, Сы́не Бо́жий безле́тне и порожде́ние Ма́тере Чи́стыя Богоотрокови́цы преве́чное, я́ко Бо́г и я́ко Челове́к младе́нец Сы́й в верте́пе вмести́ся Невмести́мый. Те́мже вси́, дивя́щеся, покланя́емся вели́кому та́инству.

Конда́к, гла́с 8.

От ю́ности, му́дре, я́же па́че смы́сла вожделе́л еси́ му́жески, мирски́й мяте́ж оста́вил еси́, и бы́л еси́ Боже́ственнаго ра́ди жи́тельства Тро́ицы жили́ще, и просвети́л еси́ ве́рою приступа́ющия тебе́. Те́м зове́м: ра́дуйся, Па́вле пребога́те.

Пе́снь 7.

Ирмо́с: О́троцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреде́ пла́мене стоя́ще, поя́ху: отце́в Бо́же, благослове́н еси́.

Я́ко со́лнце возсия́в, восто́к а́бие просвети́л еси́, на сто́лп же возше́д, я́ко посреде́ небесе́ стоя́, вселе́нную всю́ уче́нии возвесели́л еси́, — отце́в, — вопия́, — Бо́же, благослове́н еси́.

Удали́лся еси́, бе́гая мирски́х во́лн, и, в пусты́ни псало́мски водвори́вся, богоблаже́нне, прия́л еси́ Бо́га в се́рдцы твое́м, а́нгельским хране́нием тебе́ соблюда́юща.

Зре́л еси́ муче́ния та́мошняя мы́сленными очесы́ и, человеколю́бною твое́ю душе́ю се́рдцем боле́знуя, слеза́ми себе́ при́сно омака́л еси́, не я́ко Дави́д во вре́мя но́щи посте́лю.

Богоро́дичен: Безпло́тный воплоща́ется, и Безле́тный в ле́то быва́ет, и пелена́ми повива́ется на́с ра́ди, И́же зе́млю повива́яй Госпо́дь мгло́ю, пло́ть Са́м па́че постиже́ния неизме́нно яви́вся от Неискусому́жныя.

Пе́снь 8.

Ирмо́с: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Спротяже́ну с Дави́дом благогла́сну пе́снь всестро́йну пе́л еси́, глаго́ля: я́ко утеше́ния Твоя́ ду́шу мою́ боголе́пно человеколю́бным манове́нием, Всецарю́, возвесели́ша. Те́мже, ра́дуяся, взыва́л еси́: да благослови́т тва́рь вся́ Го́спода и превозно́сит Его́ во ве́ки.

Подава́яй тебе́ я́же проти́ву любви́ Зижди́тель, от ю́ности соблюда́я тя́ десни́цею, и треми́ пита́ет тя́ сала́тами боголе́пно, я́ко от младе́нства вся́ко похоте́ние попра́вша, руко́ю же а́нгела сия́ дае́т, я́ко а́нгельскому житию́ ревну́ющу, препросла́вленному тебе́, Па́вле богоно́се.

Возмого́ша убежа́ти осужде́ния трие́ осужде́ннии свя́зани му́жие, я́ко укло́ншеся служе́ния о́бщаго: у́з бо неви́димо и́менем разре́шшеся твои́м, о́тче всесла́вне, свя́занных от бе́д изба́ви, и еди́ною носи́мы руко́ю Содержа́щаго.

Богоро́дичен: Со́лнце пра́вды ро́ждшая звездо́ю созыва́ет волхвы́ со зла́том, и сми́рною же, и лива́ном, новоле́пно покланя́ющеся невра́щно Младе́нствовавшему, Его́же па́стырие возвели́чиша, и а́нгел мно́жества воспе́ша, сла́вяще, я́ко и по существу́ Бо́га и Челове́ка естество́м.

Пе́снь 9.

Ирмо́с: Та́инство стра́нное ви́жу и пресла́вное: не́бо — верте́п; престо́л херуви́мский — Де́ву; я́сли — вмести́лище, в ни́хже возлеже́ Невмести́мый — Христо́с Бо́г, Его́же, воспева́юще, велича́ем.

Пове́дует е́же к Бо́гу дерзнове́ние твое́ и я́же соверши́л еси́, по е́же к Нему́ отше́ствии, чу́дная дела́: мно́гих бо еле́ем твоего́ световожде́ния от неду́г разли́чных свободи́л еси́.

Всесве́тлу твою́ ду́шу име́я, преподо́бне, я́ко ми́ром благода́ти ве́сь напои́вся, еле́ем де́моны отго́ниши, прокаже́нныя очища́я и угрызе́нныя главы́ и кра́ст лю́тых уставля́я боле́зни.

Распа́дся, па́дает сатана́ вселука́вый о́бразом всесвире́па зве́ря, зря́ просте́рша тебе́ еле́й канди́ла твоего́, я́ко ми́ро, на исцеле́ние разли́чных неду́гов, и, стра́хом одержи́мь, исчезе́.

Богоро́дичен: Зачала́ еси́ в после́дняя ле́та в ложесна́х Твои́х, Его́же Оте́ц роди́, Сы́на, пре́жде ве́к нетле́нно, Неискусому́жная Ма́ти. Сего́ звездо́ю небеса́ показу́ют и земля́ пеще́рою земно́ю.

Свети́лен.

Дави́дски процве́л еси́ в дому́ Госпо́дни, я́ко фи́никс, о́тче преподо́бне, плоды́ твои́х трудо́в во сто́ ны́не умно́жив. Те́мже по́лк де́монов ту́чами сле́з твои́х, Па́вле блаже́нне, погру́жь, от Христа́ по́честь и вене́ц побе́ды прия́л еси́ и чуде́с, прему́дре, независтнобога́тую благода́ть.

Богоро́дичен: И́же горе́ сла́вимый Бо́жески от а́нгел, не́др Оте́ческих не отступи́в, Чи́стая, неизрече́нно с до́льними поживе́; Ты́ же сего́ была́ еси́ спасе́ния вино́вна, от чи́стых Твои́х крове́й Сему́, Чи́стая, па́че сло́ва пло́ть заимода́вши. Его́же моли́ рабо́м Твои́м избавле́ние да́ти прегреше́ний.

Пѣ́снь а҃.

І҆рмо́съ: Хрⷭ҇то́съ ражда́етсѧ, сла́вите. хрⷭ҇то́съ съ нб҃съ срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.

Но́вое тебѣ̀ пѣ́нїе похва́льное привнестѝ во ѿверзе́нїе ᲂу҆́стъ, па́ѵле бг҃оно́се, тща́щꙋсѧ, пода́ждь мѝ глаго́лати твои́ми моли́твами, прпⷣбне, благода́ть, ꙗ҆́кѡ да по́двиги твоѧ̑ честны̑ѧ проповѣ́мъ.

Ѿ ю҆́ности, прпⷣбне, ꙗ҆ре́мъ гдⷭ҇ень воспрїе́мь, и҆ въ бразда́хъ твоегѡ̀ се́рдца пшени́цꙋ сѣ́ѧвъ дꙋхо́внꙋю, кла́съ пожа́лъ є҆сѝ, ᲂу҆твержда́ющь дꙋ́шы, бг҃облаже́нне.

Пѡ́ты мно́жайшими воспрїѧ́лъ є҆сѝ вы́шнее црⷭ҇тво, ꙗ҆́кѡ безпло́тенъ на землѝ жи́въ, и҆ тѣ́ломъ пожи́въ а҆́гг҃льское житїѐ. и҆ ны́нѣ ᲂу҆́бѡ въ высоча́йшихъ трⷪ҇цѣ предстоѧ̀, на́съ помина́й.

Бг҃оро́диченъ: Тлѣ́ннꙋю мою̀ пло́ть, бг҃оневѣ́сто, прїе́мъ ѿ твои́хъ крове́й безпло́тный, и҆ въ ꙗ҆́слехъ возлегі́й во́лею, сїю̀, ю҆́же прїѧ́тъ, ѡ҆божа́етъ пло́ть, бг҃ома́ти, ѿ соедине́нїѧ є҆ѧ̀ пребл҃гі́й.

Пѣ́снь г҃.

І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.

Ѽ твоегѡ̀ мꙋ́жества! ѽ дꙋше́вныѧ до́блести, сла́вне! ты́ бо членѡ́вныѧ львѡ́въ сокрꙋши́ти неви́димыхъ жела́ѧ, два̀ ка́менѧ носи́лъ є҆сѝ превели́ка во вре́мѧ но́щи, тѧготꙋ̀ на ра́менахъ.

Кто̀ твоѧ̑ по́двиги и҆зрещѝ по достоѧ́нїю возмо́жетъ; ты́ бо пꙋти̑ жестѡ́кїѧ въ пꙋсты́ни ше́ствꙋѧ, сꙋрѡ́выѧ же́лꙋди ѣ҆́лъ є҆сѝ, вкꙋше́нїе навыца́ѧ твоѐ ᲂу҆слажда́ти болѣ́зньми воздержа́нїѧ.

Бг҃ови́децъ дре́вле мѡѷсе́й въ кꙋпинѣ̀ сподо́бисѧ та́инственнагѡ видѣ́нїѧ: всечестны́й же па́ѵелъ, ѻ҆гню̀ ꙗ҆́вльшꙋсѧ свы́ше, са́мъ позна̀ ꙗ҆́вѣ себѐ сама́го, неѡпа́льнѡ распалѧ́ема.

Бг҃оро́диченъ: Безнача́ленъ сы́й є҆стество́мъ ꙗ҆́кѡ бг҃ъ, и҆ ѻ҆ц҃ꙋ̀ сло́во равноче́стное, є҆́же под̾ лѣ́томъ прїѧ́лъ є҆сѝ ро́ждсѧ ѿ дв҃ы нача́ло, є҆стество́мъ ꙗ҆́вльсѧ чл҃вѣ́къ, и҆ младе́нствовавъ, ꙗ҆́кѡ ѻ҆троча̀ ты̀, хрⷭ҇тѐ, ꙗ҆ви́лсѧ є҆сѝ пелена́ми пови́тъ.

Сѣда́ленъ, гла́съ и҃.

Ѡ҆кормлѧ́емь си́лою вседѣ́тельною, и҆ вѣ́триломъ вкрилѧ́емь крⷭ҇тнымъ, легкѡ̀ преплы́лъ є҆сѝ жите́йскꙋю бꙋ́рю, и҆ къ бжⷭ҇твєннымъ и҆́стиннѡ приста́нищємъ дости́глъ є҆сѝ, добродѣ́телей кꙋ́плю мно́гꙋ стѧжа́въ, ю҆́же влⷣцѣ всѣ́хъ прине́слъ є҆сѝ, и҆ є҆́же благі́й ра́бе, слы́шалъ є҆сѝ, и҆ си̑мъ послѣ̑дꙋющаѧ. тѣ́мже па́ѵле блаже́нне, молѝ хрⷭ҇та̀ бг҃а грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Крⷭ҇тобг҃оро́диченъ: Дв҃а и҆ мт҃и и҆зба́вителѧ, крⷭ҇тꙋ̀ предстоѧ́ще, болѣ́зненнѡ со слеза́ми рыда́ющи, мт҃рски вопїѧ́ше, что̀ стра́нное сїѐ и҆ пресла́вное, сн҃е; и҆сточа́ѧй всѣ̑мъ человѣ́кѡмъ безстра́стїе, посредѣ̀ ѡ҆сꙋждє́нною на крⷭ҇тѣ̀ распѧ́тсѧ, въ ре́бра пробода́емь, и҆ же́лчїю напоѧ́емь ѿ рꙋ́къ, ꙗ҆̀же созда́лъ є҆сѝ. но воста́ни, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєннаѧ твоѧ̑ страда̑нїѧ.

Пѣ́снь д҃.

І҆рмо́съ: Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.

Сно́мъ побѣди́вшꙋсѧ тебѣ̀ и҆ногда̀ во вре́мѧ ю҆́ности, и҆ ко всено́щномꙋ ѡ҆сла́бившꙋсѧ стоѧ́нїю, тво́й ви́дѣвъ честны́й ᲂу҆чи́тель пе́тръ, по лицꙋ̀, ѻ҆́тче, ᲂу҆дарѧ́етъ: и҆ тебѣ̀ заꙋше́нїе да́въ, дае́тъ а҆́бїе и҆сцѣле́нїе.

Бг҃ꙋ ѻ҆со́бь бесѣ́дꙋѧ, и҆ семꙋ̀ прибли́живсѧ несре́дственнѣ па́ѵелъ, ѻ҆ц҃ъ на́шъ, никогда́же побѣди́всѧ ѿ сна̀ пребы́сть по ꙗ҆́звѣ ᲂу҆чи́телевѣ: но ꙗ҆́коже безпло́тенъ сы́й, бо́дръ при́снѡ бы́сть.

Сосꙋ́дъ свѧще́ннѣйшїй ꙗ҆́вльсѧ, мѵ́ро нбⷭ҇ное хрⷭ҇та̀ прїѧ́лъ є҆сѝ се́рдцемъ твои́мъ, и҆ свѣщꙋ̀ твоегѡ̀ терпѣли́внагѡ воздержа́нїѧ жи́тельствомъ добродѣ́тельнымъ вже́гъ свѣ́тлѡ, къ невѣ́стникꙋ бжⷭ҇твенномꙋ восте́клъ є҆сѝ.

Бг҃оро́диченъ: И҆мѣ́ѧ, сло́ве, прⷭ҇то́лъ нб҃о, зе́млю же подно́жїе, въ ложесна̀ дв҃ы воплоща́ѧсѧ вше́лъ є҆сѝ, и҆ во ᲂу҆бо́гъ верте́пъ всели́лсѧ є҆сѝ: ѿ волхвѡ́въ же, царе́й персі́дскихъ, ꙗ҆́кѡ цр҃ь да́ры и҆ бг҃очеловѣ́къ прїѧ́лъ є҆сѝ.

Пѣ́снь є҃.

І҆рмо́съ: Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Ѿ ка́ла страсте́й ѡ҆чи́стивъ ᲂу҆́мъ, нескве́рно зерца́ло бы́лъ є҆сѝ, ѡ҆сїѧ́нїѧ дх҃а прїе́мъ при́снѡ. тѣ́мже тебѣ̀ и҆скꙋси́тель посрами́сѧ прирази́всѧ, и҆́же са́да ѕло́бы не́мощь и҆з̾ꙋчи́вый.

Мꙋ́дрость сꙋ́щѡ, хрⷭ҇та̀ бг҃а во твое́мъ се́рдцы стѧжа́въ ѡ҆бита́ющꙋю, немꙋ́драго низложи́лъ є҆сѝ ѕло́бы мꙋдреца̀, нога́ми твои́ми кра́сными, мꙋдростьмѝ разли́чными прельсти́ти тѧ̀, па́ѵле бг҃омꙋ́дре, покꙋша́ющасѧ.

Свѣ́та сы́й прїѧ́телище, днѐ сы́нъ, тмы̀ прельсти́лъ є҆сѝ нача́льника ꙗ҆́коже льва̀, на тѧ̀ навѣ́тꙋюща, земны́ми трꙋ́сы и҆ колеба̑нїи ка́менїй, безстꙋ́дїемъ ᲂу҆страша́юща, па́ѵле, и҆ мечта̑нїи свирѣ́пствꙋюща.

Бг҃оро́диченъ: И҆зве́рженна пе́рваго а҆да́ма и҆зъ є҆де́ма, приснодв҃о ѻ҆трокови́це бг҃оневѣ́сто, сло́во пребезнача́льное и҆зъ тебє̀ вопло́щсѧ, и҆ въ ꙗ҆́сли безслове́сныхъ восклони́всѧ, ꙗ҆́кѡ млⷣнецъ, на́шъ ро́дъ ѿ безслове́сїѧ и҆зба́ви.

Пѣ́снь ѕ҃.

І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Ꙗ҆́коже сп҃съ, хрⷭ҇то́съ бг҃ъ на́шъ ма́лыми хлѣ̑бы наро́дъ насы́ти многочи́сленъ, та́кожде и҆ па́ѵелъ таи́нникъ хрⷭ҇то́въ, скꙋде́ла малѣ́йшагѡ ма́лою водо́ю мно́жєства до сы́тости возвеселѝ: и҆ сы́тость ꙗ҆влѧ́етъ ѻ҆би́лїе.

Оу҆ставлѧ́еши зно́й моли́твами твои́ми, чꙋ́дне, и҆ рѣши́ши гла́дъ прети́мый: вода́ми же свы́ше пролїѧ́вшимисѧ ᲂу҆паѧ́еши зе́млю, и҆ напаѧ́еши сꙋхі̑ѧ сеѧ̀ бразды̑, прозѧба́ѧ и҆ богатѧ̀ дарова̑нїи, и҆ ᲂу҆множа́ѧй сеѧ̀ дѣ́ланїе.

Неболѣ́зненнꙋю жи́знь въ болѣ́знехъ воспрїѧ́лъ є҆сѝ, и҆ болѣ́зней лю́тыхъ ᲂу҆ставлѧ́еши ѡ҆ѕлобле́нїе, вѣ́рою просѧ́щымъ прїѧ́ти врачева̑нїѧ ѿ тебє̀, всече́стне, ѻ҆тцє́въ добро́то. тѣ́мже разрѣшѝ болѣ̑зни моѧ̑ дꙋшє́вныѧ и҆ тѣлє́сныѧ, молю́сѧ.

Бг҃оро́диченъ: Сло́во ѻ҆́ч҃ее, сн҃е бж҃їй безлѣ́тне, и҆ порожде́нїе мт҃ре чⷭ҇тыѧ бг҃оѻтрокови́цы превѣ́чное, ꙗ҆́кѡ бг҃ъ, и҆ ꙗ҆́кѡ человѣ́къ млⷣнецъ сы́й, въ верте́пѣ вмѣсти́сѧ невмѣсти́мый. тѣ́мже всѝ дивѧ́щесѧ покланѧ́емсѧ вели́комꙋ та́инствꙋ.

Конда́къ, гла́съ и҃.

Ѿ ю҆́ности, мꙋ́дре, ꙗ҆̀же па́че смы́сла вожделѣ́лъ є҆сѝ мꙋ́жески, мїрскі́й мѧте́жъ ѡ҆ста́вилъ є҆сѝ, и҆ бы́лъ є҆сѝ бжⷭ҇твеннагѡ ра́ди жи́тельства трⷪ҇цы жили́ще и҆ просвѣти́лъ є҆сѝ вѣ́рою пристꙋпа́ющыѧ тебѣ̀. тѣ́мъ зове́мъ: ра́дꙋйсѧ, па́ѵле пребога́те.

Пѣ́снь з҃.

І҆рмо́съ: Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Ꙗ҆́кѡ со́лнце возсїѧ́въ, восто́къ а҆́бїе просвѣти́лъ є҆сѝ, на сто́лпъ же возше́дъ, ꙗ҆́кѡ посредѣ̀ нб҃сѐ стоѧ̀, вселе́ннꙋю всю̀ ᲂу҆чє́нїи возвесели́лъ є҆сѝ, ѻ҆тцє́въ, вопїѧ̀, бж҃е, бл҃гослове́нъ є҆сѝ.

Оу҆дали́лсѧ є҆сѝ, бѣ́гаѧ мїрски́хъ во́лнъ, и҆ въ пꙋсты́ни ѱало́мски водвори́всѧ, бг҃облаже́нне, прїѧ́лъ є҆сѝ бг҃а въ се́рдцы твое́мъ, а҆́гг҃льскимъ хране́нїемъ тебѐ соблюда́юща.

Зрѣ́лъ є҆сѝ мꙋчє́нїѧ та́мѡшнѧѧ мы́сленными ѻ҆чесы̀, и҆ чл҃вѣколю́бною твое́ю дꙋше́ю се́рдцемъ болѣ́знꙋѧ, слеза́ми себѐ при́снѡ ѡ҆мака́лъ є҆сѝ, не ꙗ҆́кѡ дв҃дъ во вре́мѧ но́щи посте́лю.

Бг҃оро́диченъ: Безпло́тный воплоща́етсѧ, и҆ безлѣ́тный въ лѣ́то быва́етъ, и҆ пелена́ми повива́етсѧ на́съ ра́ди, и҆́же зе́млю повива́ѧй гдⷭ҇ь мгло́ю, пло́ть са́мъ па́че постиже́нїѧ неизмѣ́ннѡ ꙗ҆ви́всѧ ѿ неискꙋсомꙋ́жныѧ.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Спротѧже́нꙋ съ дв҃домъ благогла́снꙋ пѣ́снь всестро́йнꙋ пѣ́лъ є҆сѝ, глаго́лѧ: ꙗ҆́кѡ ᲂу҆тѣшє́нїѧ твоѧ̑ дꙋ́шꙋ мою̀ бг҃олѣ́пнѡ чл҃вѣколю́бнымъ манове́нїемъ, всецр҃ю̀, возвесели́ша. тѣ́мже ра́дꙋѧсѧ взыва́лъ є҆сѝ: да благослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.

Подава́ѧй тебѣ̀ ꙗ҆̀же проти́вꙋ любвѝ зижди́тель, ѿ ю҆́ности соблюда́ѧ тѧ̀ десни́цею, и҆ тремѝ пита́етъ тѧ̀ сала́тами бг҃олѣ́пнѡ, ꙗ҆́кѡ ѿ младе́нства всѧ́ко похотѣ́нїе попра́вша: рꙋко́ю же а҆́гг҃ла сїѧ̑ дае́тъ, ꙗ҆́кѡ а҆́гг҃льскомꙋ житїю̀ ревнꙋ́ющꙋ, препросла́вленномꙋ тебѣ̀, па́ѵле бг҃оно́се.

Возмого́ша ᲂу҆бѣжа́ти ѡ҆сꙋжде́нїѧ трїѐ ѡ҆сꙋжде́ннїи свѧ́зани мꙋ́жїе, ꙗ҆́кѡ ᲂу҆кло́ншесѧ слꙋже́нїѧ ѻ҆́бщагѡ: ᲂу҆́зъ бо неви́димѡ и҆́менемъ разрѣ́шшесѧ твои́мъ, ѻ҆́тче всесла́вне, свѧ́занныхъ ѿ бѣ́дъ и҆зба́ви, и҆ є҆ди́ною носи́мы рꙋко́ю содержа́щагѡ.

Сл҃нце пра́вды ро́ждшаѧ, ѕвѣздо́ю созыва́етъ волхвы̀ со зла́томъ, и҆ смѵ́рною же и҆ лїва́номъ, новолѣ́пнѡ покланѧ́ющесѧ невра́щнѡ млⷣнствовавшемꙋ: є҆го́же па́стырїе возвели́чиша, и҆ а҆́гг҃лъ мно́жества воспѣ́ша сла́вѧще, ꙗ҆́кѡ и҆ по сꙋществꙋ̀ бг҃а, и҆ чл҃вѣ́ка є҆стество́мъ.

Пѣ́снь ѳ҃.

І҆рмо́съ: Та́инство стра́нное ви́жꙋ и҆ пресла́вное: нб҃о, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще, велича́емъ.

Повѣ́дꙋетъ є҆́же къ бг҃ꙋ дерзнове́нїе твоѐ, и҆ ꙗ҆̀же соверши́лъ є҆сѝ, по є҆́же къ немꙋ̀ ѿше́ствїи, чꙋ̑днаѧ дѣла̀: мно́гихъ бо є҆ле́емъ твоегѡ̀ свѣтовожде́нїѧ, ѿ недꙋ̑гъ разли́чныхъ свободи́лъ є҆сѝ.

Всесвѣ́тлꙋ твою̀ дꙋ́шꙋ и҆мѣ́ѧ, прпⷣбне, ꙗ҆́кѡ мѵ́ромъ благода́ти ве́сь напои́всѧ, є҆ле́емъ де́мѡны ѿго́ниши, прокажє́нныѧ ѡ҆чища́ѧ и҆ ᲂу҆грызє́нныѧ главы̑, и҆ кра́стъ лю́тыхъ ᲂу҆ставлѧ́ѧ болѣ̑зни.

Распа́дсѧ па́даетъ сатана̀ вселꙋка́вый, ѻ҆́бразомъ всесвирѣ́па ѕвѣ́рѧ, зрѧ̀ просте́рша тебѐ є҆ле́й канди́ла твоегѡ̀, ꙗ҆́кѡ мѵ́ро, на и҆сцѣле́нїе разли́чныхъ недꙋ́гѡвъ, и҆ стра́хомъ ѡ҆держи́мь и҆счезѐ.

Бг҃оро́диченъ: Зачала̀ є҆сѝ въ послѣ̑днѧѧ лѣ̑та въ ложесна́хъ твои́хъ, є҆го́же ѻ҆ц҃ъ родѝ сн҃а пре́жде вѣ̑къ нетлѣ́ннѡ, неискꙋсомꙋ́жнаѧ мт҃и. сего̀ ѕвѣздо́ю небеса̀ показꙋ́ютъ, и҆ землѧ̀ пеще́рою земно́ю.

Свѣти́ленъ:

Дв҃дски процвѣ́лъ є҆сѝ въ домꙋ̀ гдⷭ҇ни, ꙗ҆́кѡ фі́нїѯъ, ѻ҆́тче прпⷣбне, плоды̀ твои́хъ трꙋдѡ́въ во сто̀ ны́нѣ ᲂу҆мно́живъ. тѣ́мже по́лкъ де́мѡнѡвъ тꙋ́чами сле́зъ твои́хъ, па́ѵле блаже́нне, погрꙋ́жь, ѿ хрⷭ҇та̀ по́честь и҆ вѣне́цъ побѣ́ды прїѧ́лъ є҆сѝ, и҆ чꙋде́съ, премꙋ́дре, независтнобога́тꙋю бл҃года́ть.

Бг҃оро́диченъ: И҆́же горѣ̀ сла́вимый бж҃ески ѿ а҆́гг҃лъ, нѣ́дръ ѻ҆те́ческихъ не ѿстꙋпи́въ, чⷭ҇таѧ, неизрече́ннѡ, съ до́льними поживѐ: ты́ же сегѡ̀ была̀ є҆сѝ спасе́нїѧ вино́вна, ѿ чⷭ҇тыхъ твои́хъ крове́й семꙋ̀, чⷭ҇таѧ, па́че сло́ва пло́ть заимода́вши. є҆го́же молѝ, рабѡ́мъ твои̑мъ и҆збавле́нїе да́ти прегрѣше́нїй.

Пре­по­доб­ный Па­вел Ла­трий­ский был уро­жен­цем го­ро­да Элен в Пер­га­ме. Ра­но по­те­ряв от­ца, он вос­пи­ты­вал­ся в оби­те­ли свя­то­го Сте­фа­на во Фри­гии, а по­сле смер­ти ма­те­ри все­це­ло по­свя­тил се­бя ино­че­ским по­дви­гам в мо­на­сты­ре на го­ре Латр, близ Ми­ле­та. Же­лая до­стичь еще бо­лее вы­со­ко­го со­вер­шен­ства, он за­тво­рил­ся в пе­ще­ре. Сво­и­ми по­дви­га­ми он стя­жал дар про­зре­ния и чу­до­тво­ре­ния. Им­пе­ра­тор Кон­стан­тин Баг­ря­но­род­ный (912–959) ча­сто пи­сал пре­по­доб­но­му, про­ся его мо­литв и со­ве­тов. Два­жды пре­по­доб­ный Па­вел уда­лял­ся на ост­ров Са­мос, где ос­но­вал Лав­ру и вос­ста­но­вил три мо­на­сты­ря, ра­зо­рен­ные ага­ря­на­ми. Пред­ска­зав свою кон­чи­ну, ста­рец пре­ста­вил­ся к Бо­гу в 955 го­ду.


См. так­же: "Па­мять пре­по­доб­но­го Пав­ла Ла­тр­ско­го" в из­ло­же­нии свт. Ди­мит­рия Ро­стов­ско­го.