Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Песносло́вити достохва́льную па́мять твою́ усе́рдствующему, преподо́бне, благода́ть да́ти мне́ моли́ся, Венеди́кте, и все́х прегреше́ний избавле́ние.

Мона́шески, тво́й от младе́нства взе́м кре́ст, после́довал еси́ Вседержи́телю и, умертви́в пло́ть, жи́зни сподо́бился еси́, преблаже́нне.

Зако́ну Бо́жию повину́вся, досточу́дне, и страсте́й взыгра́ния увяди́л еси́ воздержа́ния по́двиги, и безстра́стия благода́тию обогати́лся еси́.

Богоро́дичен: И́же Тебе́ ра́ди нетле́нием обога́щшеся, Богороди́тельнице Всечи́стая, ра́дуйся, вопие́м Ти́, обра́дованней, преподо́бных и пра́ведных удобре́ние.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Во́д живо́тных Боже́ственнаго Ду́ха испо́лнившися, богоно́се, душа́ твоя́ ре́ки чуде́с источи́, неду́гов изсуша́ющия тече́ние.

К широте́ ра́йстей пресели́лся еси́, всеблаже́нне, те́сную ше́ствовав стезю́, и де́монов кова́рствия, и ше́ствия безчи́нная утесни́л еси́.

Тече́нии твои́х сле́з напая́емь, я́ко дре́во, Венеди́кте, плодоно́сно, благопло́дие Боже́ственно прине́сл еси́ доброде́телей и чуде́с Боже́ственною благода́тию.

Богоро́дичен: Еди́н Благи́й Твою́, воплоща́емь, про́йде, Пренепоро́чная, утро́бу и Челове́к ви́ден бы́сть соверше́н, Его́же моли́ спасти́ пою́щия Тя́.

Седа́лен, гла́с 1.

Мона́шествовав богоуго́дно, доброде́тельно пожи́л еси́ и благода́ть исцеле́ний прия́л еси́, Венеди́кте, чудеса́ соверши́в стра́шна, оби́тель же совоку́пль свяще́нну, приве́л еси́ Го́споду спаса́емых мно́жества, пребога́те. Сла́ва Бо́гу, просвети́вшему тя́, сла́ва Венча́вшему тя́, сла́ва святу́ю твою́ па́мять Просла́вльшему.

Богоро́дичен: Ру́це Твои́ боже́ственныя, и́миже Созда́теля понесла́ еси́, Де́во Пресвята́я, вопло́щшагося благосты́нею, просте́рши, умоли́ Его́ изба́вити на́с от искуше́ний, и страсте́й, и бе́д, хва́лящих Тя́ любо́вию и вопию́щих: сла́ва Все́льшемуся в Тя́, сла́ва Проше́дшему из Тебе́, сла́ва Изба́вльшему на́с рождество́м Твои́м.

Крестобогоро́дичен: На Кресте́ Тебе́ распе́ншуся от беззако́нных, и от во́ин, Спа́се, копие́м ре́бром Твои́м прободе́нным, Пречи́стая рыда́ше го́рько и, мно́гому Твоему́ и стра́шному терпе́нию ужаса́шеся, вопия́ше: сла́ва к челове́ком Твое́й любви́, сла́ва Твое́й бла́гости, сла́ва сме́ртию Твое́ю челове́ки обезсме́ртившему.

Пе́снь 4.

Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Распе́н себе́ сама́го страсте́м и ми́ру, богому́дре о́тче, на Кресте́ просте́ршему во́лею дла́ни Христу́ угоди́л еси́, Венеди́кте. Его́же моли́ спасти́ ду́ши на́ша.

По́двиги воздержа́ния, преподо́бне, плотски́я умертви́л еси́ у́ды, ме́ртвыя же моли́твою возста́вил еси́, и разсла́бленным благотече́ние, ве́рно чуди́мь, дарова́л еси́, и вся́к неду́г, о́тче, исцели́л еси́.

Сухи́я же и невла́жныя, преподо́бне, соде́лал еси́ ду́ши ро́дны живи́тельным сло́вом твои́м, плодо́в духо́вных и боже́ственных, му́дре, богопрови́ден бы́в и мона́шествующих красота́, свяще́ннейший.

Богоро́дичен: Я́ко до́ждь на руно́, Чи́стая, в честно́е чре́во Твое́ Сло́во сни́де, воплоща́емо, и уста́ви многобо́жия я́ве одожде́ния, Всенепоро́чная, и го́рькую зи́му разори́ло е́сть.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Су́щаго в ми́лости Бо́га моля́, о́тче преподо́бне, напо́лнил еси́, я́коже Илия́ чва́нец еле́я, сосу́д вели́к, от зря́щих ве́рно удивля́емь.

Я́ко чи́ст душе́ю, ты́, во изступле́нии бы́в, ви́дел еси́ всю́ зе́млю, я́ко под заре́ю сия́ющу еди́ною, Бо́гу тя́ почита́ющу, всеблаже́нне Венеди́кте.

Чудоде́йствуя о Христе́, воде́ истещи́ моли́твою, преподо́бне, мо́лиши Подвигополо́жника, я́же пребыва́ет, возпропове́дающи чудеса́, Венеди́кте.

Богоро́дичен: Живы́й на небесе́х, хотя́й всели́ся в ложесна́ Твоя́, Чи́стая, я́ко да на́с до́мы Тро́ице сотвори́т, Тя́, Богоро́дицу, пропове́дающих, Чи́стая.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Светозаре́ньми просвеща́емь Ду́ха, тму́ лука́вых де́монов отгна́л еси́, чудотво́рче Венеди́кте, мона́шествующих свети́льниче светле́йший.

Я́ко пресла́вно, блаже́нне, житие́ твое́, я́ко пресве́тло честно́е жи́тельство твое́, и́мже стада́ привле́кл еси́ мона́шествующих к ра́зуму спаси́тельному.

Ца́рствия жи́тель бы́в небе́снаго, богому́дре Венеди́кте, сего́ улучи́ти моли́ ве́рно тя́ при́сно блажа́щим.

Богоро́дичен: Из утро́бы Твоея́ святы́я возсия́ Пра́вды невече́рнее Со́лнце и ве́рныя просвети́, Богоро́дице Де́во Всепе́тая.

Конда́к, гла́с 6:

Благода́тию Бо́жиею обогати́лся еси́, де́лы же извести́л еси́ зва́ние, и яви́лся еси́, Венеди́кте, уго́дниче Христа́ Бо́га, в моли́твах и посте́х дарова́ний Бо́жия Ду́ха испо́лнен, и бы́л еси́ неду́жным исцели́тель, и прогони́тель враго́м, и засту́пник ско́рый душа́м на́шим.

Пе́снь 7.

Ирмо́с: Вети́и яви́шася о́троцы любому́дрейшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́.

Ме́ртвость живоно́сну стяжа́л еси́ сласте́й отложе́нием. Те́мже ме́ртвыя возставля́ти сподо́бился еси́, блаже́нне Венеди́кте, вопия́: Пребоже́ственный отце́в и на́ш Бо́же, благослове́н еси́.

Удивля́емь от мно́жества ве́рных, я́ко Илия́ вели́кий, соде́лал еси́ преподо́бными твои́ми труды́ огра́ду, водрузи́в, мона́хом, я́же при́сно пребыва́ет, остеня́ема моли́твами твои́ми, блаже́нне.

Непщева́вше умори́ти без ума́ чарова́ньми, о́тче, лука́вными тя́, блюдо́маго Боже́ственною Вседе́теля дла́нию, несмы́сленнии постыде́шася, обличе́ни бы́вше су́щим в тебе́, Венеди́кте, проразуме́нием.

Богоро́дичен: Исцели́ души́ моея́ стра́сти безстра́стия исто́чника заче́ншая несказа́нно, Де́во, и умиле́ния ту́чу пода́ждь ми́, хода́тайствующую ми́ утеше́ние та́мо, Свята́я Богоро́дице.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Над страстьми́ тлетво́рными ца́рствовав о Христе́, богому́дре о́тче, в небе́снем Ца́рствии сподо́бился еси́ жи́ти со все́ми, до́бре пожи́вшими и Всеви́дца Бо́га возлюби́вшими.

Твоя́ святы́я моли́твы прие́мля, Бо́г су́щим во оскуде́нии тобо́ю подава́ше, я́же к житию́ вины́, вельми́ на земли́ прославля́я тя́ чудоде́йствы, Венеди́кте треблаже́нне.

Украси́вся добро́тами боже́ственных доброде́телей, к кра́сным черто́гам преста́вился еси́, о́тче, пребыва́ти с Бо́гом и сего́ Боже́ственныя красоты́ в безконе́чныя ве́ки наслажда́тися.

Богоро́дичен: Се́ роди́ся из Тебе́, я́коже вопие́т Иса́ия, Чи́стая, Отроча́, Сы́н Вы́шняго и Тво́й зри́мь е́сть Сы́н, Де́во, сы́ны сотворя́я Небе́снаго Отца́, Тя́ почита́ющия.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Яви́лся еси́, я́ко со́лнце вели́кое, озаря́я зда́ние зна́меньми, богоно́се, стра́шными и доброде́телей сия́нии, сего́ ра́ди, соверша́юще па́мять твою́, пои́стинне светоза́рную, просвеща́емся, о́тче, серде́чными чу́вствы.

Тя́ мона́шествующих стада́, тобо́ю собра́нна, де́нь восхваля́ют и но́щь, посреди́ те́ло твое́ иму́ще, источа́ющее бога́тно чуде́с ре́ки, о́тче му́дре, и просветя́ще си́х непреста́нно стопы́.

Па́че со́лнечных лу́чь облиста́л еси́, о́тче, испо́лнив Бо́жия за́поведи, и к Све́ту невече́рнему преста́вился еси́, моля́ пода́тися оставле́нию грехо́в ве́рно тя́ чту́щим, приснопа́мятне Венеди́кте.

Богоро́дичен: Светороди́тельнице Де́во, души́ моея́ стра́сти отжени́ и да́ждь чи́сто зре́ти, Влады́чице, спаси́тельную добро́ту возсия́вшаго неизрече́нно из Твоея́ пречи́стыя утро́бы во све́т язы́ков, Всепе́тая.