Пе́снь 1.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Умудри́ мя, Го́споди Бо́же мо́й, Твоего́ проро́ка Авваку́ма пе́ти боже́ственнаго и благода́тию Твое́ю просвети́, Бла́же, се́рдце мое́.

Доко́ле, Го́споди, — проро́к глаго́лет, — возопию́ к Тебе́, и не услы́шиши? Вску́ю же ми́ показа́л еси́ суде́й нече́стие?

Честну́ю па́мять твою́, проро́че, соверша́ющия благоче́стно твои́ми мольба́ми от бе́д изба́ви и лю́тых обстоя́ний.

Богоро́дичен: Бо́г Святы́й яви́ся, внегда́ прибли́житися вре́мени, из Тебе́, Богоро́дице, бы́в Челове́к, да спасе́т челове́ка.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Воззре́нием к Бо́гу возвыша́емь и светодая́нии от Него́ просвеща́емь, бу́дущих предзре́л еси́, богоявле́нне, проображе́ние.

Вся́ку доброде́тель содержа́л еси́, вся́ку же зло́бу от ума́ возненави́дел еси́ и пра́ведно беззако́ннующих возгнуша́лся еси́, всеблаже́нне.

Рече́нием Свята́го Ду́ха ты́, я́ко чи́ст, вве́рился еси́, ясне́йше проро́чествуя бу́дущих сбытия́, досточу́дне.

Богоро́дичен: Гора́, доброде́тельми приосене́нная, из нея́же Влады́ка раболе́пно прии́де рабо́ты свободи́ти челове́ки, яви́лася еси́, Всечи́стая.

Седа́лен, гла́с 4.

На боже́ственней стра́жи ста́л еси́, блаже́нне, и уразуме́л еси́ Бо́жие прише́ствие проро́ческими очесы́, богодохнове́нне; те́мже и возопи́л еси́, Авваку́ме, со стра́хом: Го́споди, услы́шах стра́шное прише́ствие Твое́ и воспева́ю Тя́, пло́ть бре́нную от Де́вы понести́ восхоте́вшаго.

Богоро́дичен: По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: И́же из Безнача́льнаго Отца́ рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, — увы́ мне́, любе́знейший Иису́се, — вопия́ше, — ка́ко сла́вимый, я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя, Долготерпели́ве.

Пе́снь 4.

Ирмо́с: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

Светови́ден доброде́телию яви́лся, богодохнове́нне, и Све́т Невече́рний возвести́л еси́, Ему́же ны́не ве́рою зове́м: сла́ва си́ле Твое́й, Го́споди.

Всесве́тлая благода́ть Ду́ха, оби́льно все́льшися в тя́, всему́дре, проро́ка соверши́, все́м Спа́са возвеща́юща.

Слу́хом огласи́вся Вседержи́теля, благогове́йно убоя́лся еси́, о чу́дне! Разуме́в же дела́ Сего́, во у́жасе бы́л еси́.

Богоро́дичен: Киво́т свиде́ния Тя́, Де́во, пи́шет, Хле́б и́стинно жи́зни прие́мшую, Чи́стая, Сло́во, Отцу́ Соприсносу́щное.

Пе́снь 5.

Ирмо́с: Возсия́вый Све́т, и просвети́вый у́тро, и показа́вый де́нь, сла́ва Тебе́, сла́ва Тебе́, Иису́се, Сы́не Бо́жий.

Ны́не воздви́жена ви́дит честна́я Це́рковь Со́лнца на дре́ве, я́коже проре́кл еси́, Авваку́ме свяще́ннейше.

Впери́в у́м, на стра́жи твое́й ста́л еси́, пребога́те, и усмотри́л еси́ Госпо́дне прише́ствие.

Велегла́сно, му́дре, о Бо́зе Спа́се возра́дуюся, — возопи́л еси́, — и возвеселю́ся, — Авваку́ме всеблаже́нне.

Богоро́дичен: Отягче́н плени́цами мно́гих мои́х прегреше́ний, к Тебе́ прибега́ю, спаси́ мя, Влады́чице Богоро́дице, ве́рных похвало́.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

От ю́га Бо́г, вопло́щся, прии́де, я́ко проре́кл еси́, от Него́ све́тло просвеща́емь, Авваку́ме треблаже́нне, и ми́р све́том уясни́.

Озари́, Бо́же, ду́ши пою́щих Тя́ моли́твами Авваку́ма честна́го и богому́драго, и́же вдохнове́нием боже́ственным просвеще́й того́ помышле́ние.

Веща́ние Твое́ и глаго́л боже́ственных си́ла, богоглаго́ливе, про́йде вся́ концы́, Сло́ва Боже́ственное прише́ствие на́м проро́чествуя.

Богоро́дичен: Су́щаго Отцу́ Сы́на Единосу́щна и безнача́льно ро́ждшему я́ве сразумева́емаго, в после́док пло́ть бы́вша, Де́во, родила́ еси́.

Конда́к гла́с 8.

Возгласи́вый вселе́нней от ю́га прише́ствие Бо́жие от Де́вы, Авваку́ме богоглаго́ливе, и на боже́ственней стра́жи предстоя́нием слы́шания от светоно́сна а́нгела Христо́во Воскресе́ние возвести́л еси́ ми́ру, сего́ ра́ди ве́село зове́м ти́: ра́дуйся, проро́ков све́тлая добро́то.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Науча́емь, блаже́нне, па́че сло́ва зна́нию и проро́чествуя многосве́тлую Свещу́, взыва́еши ны́не: оте́ц на́ших Бо́же, благослове́н еси́.

Сия́ния Трисве́тлаго и Невече́рния Сла́вы прича́стия тебе́ даде́ Христо́с, Его́же просла́вил еси́, вопия́: оте́ц на́ших Бо́же, благослове́н еси́.

Богоро́дичен: В ро́дех родо́в Ма́ти Де́ва яви́лася еси́, Благослове́нная, па́че ума́ Сло́во ро́ждши воплоще́нное, те́мже, Чи́стая, воспева́ем Тя́.

Пе́снь 8.

Ирмо́с: Вся́ дела́ Бо́жия и вся́ тва́рь, благослови́те Го́спода, преподо́бнии и смире́ннии се́рдцем по́йте Его́, и превозноси́те Его́ во вся́ ве́ки.

Просвеще́н Све́том Трисо́лнечным, сподо́бился еси́, всеизря́дне, боже́ственных и преесте́ственных виде́ний, зовы́й: превозноси́те Бо́га во ве́ки вся́.

Пия́ от пото́ка сла́дости и невеще́ственнаго виде́ния исполня́емь, сла́вы же проро́ческия и председа́тельства причаща́яся, ра́дуяся, воспева́еши Бо́га во ве́ки.

О, боже́ственныя и честны́я проро́ка Авваку́ма красоты́! се́й бо, со а́нгельскими лику́я си́лами, ра́дуяся, Христа́ воспева́ет во ве́ки.

Богоро́дичен: Ма́ти яви́лася еси́ и́стинно пре́жде ве́к из Отца́ Возсия́вшаго, еди́на бо святе́йши все́х была́ еси́, Тя́ превозно́сим, Чи́стую, во ве́ки.

Пе́снь 9.

Ирмо́с: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Блиста́ет па́мять твоя́, проро́че, све́тлу испуща́ющи зарю́ твоего́ богоглаго́лания и твоего́ тайноуче́ния и проро́чества тя́ чту́щим, Авваку́ме блаже́ннейше.

Пропове́дав Го́спода Сла́вы и Сего́ проре́к прише́ствие, от Святы́я Де́вы проявле́нно бы́вшее, и пока́занное ви́дя, весели́ся, Авваку́ме богоблаже́нне.

Ра́дуются вси́ проро́цы, в ра́достный тво́й де́нь веселя́щеся, богому́дре, ра́дости твоея́ причаща́ющеся и боже́ственныя сла́вы, с ни́миже моля́ся, пою́щия тя́ спаса́й.

Богоро́дичен: Кропле́нием, Чи́стая, щедро́т Твои́х души́ моея́ омы́й скве́рну и то́ки сле́з источа́ти мне́ непреста́нно сотвори́, Отрокови́це, страсте́й мои́х пото́ки уставля́ющи.