Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Душе́вное сохрани́в, Ио́но блаже́нне, досто́инство, богови́дный бы́л еси́ о́браз и преми́рное сподо́бился еси́ прообрази́ти Христо́во Воскресе́ние, е́же песносло́вим вси́, сла́вно бо просла́вися.

Вся́чески любо́вию к Бо́гу преклони́лся еси́, приснопа́мятне, и сия́нии су́щими отту́ду просвети́вся, и проро́к язы́ком велегла́сен от Него́ устро́ен еси́, покая́ния врачевству́ уча́ спаси́тельному.

Богоро́дичен: Возсия́ Со́лнце из Тебе́, Ма́ти Присноде́во, И́же из Отца́ пре́жде ве́к неви́димый и ви́димым же пресла́вно опису́емь Те́лом, благоче́стия заре́ю челове́ки просвети́.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть Свя́т, я́коже Бо́г на́ш, и не́сть пра́веден, па́че Тебе́, Го́споди.

Проро́к, предзря́ си́лою Боже́ственною благода́ть, преходя́щую в язы́ки, в пучи́ну уны́ния низведе́ся, вопия́ Тебе́, Влады́ко: Ты́ еси́ Бо́г на́ш, и не́сть пра́веден па́че Тебе́, Го́споди.

Изре́к благоче́стие кора́бленником и ра́б Высоча́йшаго тя́ сама́го научи́в, в пучи́ну вве́ржен бы́л еси́, вопия́, проро́че сла́вне: Ты́ еси́ Бо́г на́ш, и не́сть пра́веден па́че Тебе́, Го́споди.

Богоро́дичен: Ты́ еди́на па́че все́х су́щих от ве́ка вели́ких сподо́билася еси́ и па́че естества́, Бо́га бо невмести́маго все́й тва́ри во утро́бе понесла́ еси́ и воплоти́ла еси́. Те́м Богоро́дицу Тя́ вси́ почита́ем.

Седа́лен, гла́с 4.

Проро́к бы́в прише́ствия Христо́ва, Того́ тридне́вное, блаже́нне, воста́ние я́ве провозвести́л еси́, в ки́тове чре́ве тридне́вновав невре́дно, зовя́: ны́не да взы́дет от тли́ живо́т мо́й к Тебе́, от тле́ния хотя́щаго земны́я изба́вити.

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ Ти́: сла́ва си́ле Твое́й, Го́споди.

Не терпя́ зре́ти люде́й твои́х отпаде́ния, Ио́но богоглаго́ливе, те́м и бежа́ти произво́лив, ки́том я́т бы́л еси́, погребе́ние тридне́вное, блаже́нне, прообразу́я Христо́во.

Человеколю́бца ве́дый Влады́ку, не терпя́ше проро́ческа да́ра зре́ти укоря́ема, те́м отлага́ше Бо́жие повеле́ние, бежа́, богоглаго́ливе.

Богоро́дичен: Исцеля́я Е́вино дре́внее преступле́ние, в Тя́, Всенепоро́чную и Всесвяту́ю, всели́ся, всего́ мя́ челове́ка вообрази́в па́дшаго, Пребоже́ственный.

Пе́снь 5.

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо ра́зве Тебе́ бо́га не зна́ю.

Ио́на, проро́к вели́кий, тридне́внаго бы́сть проображе́ние в ка́мени, Христе́, погребе́ния Твоего́, и́мже спа́сл еси́, Сло́ве, ве́рою и любо́вию Тебе́ зову́щия: ино́го, ра́зве Тебе́, бо́га не зна́ем.

Не терпя́ презре́ти, Христе́ мо́й, ниневи́тян, в ро́ве лежа́щих грехо́внем, но, уще́дрив, посла́л еси́ и́м проро́ка Ио́ну, Влады́ко, пропове́дника, провозвеща́ющаго я́ве покая́ние.

Богоро́дичен: Еди́ну на́м во дву́ существа́х ви́димую Ипоста́сь, еди́на Благослове́нная, ражда́еши неизрече́нно, Бо́жия Бо́га Сло́ва, воплоти́вшагося за ми́лость неизрече́нную. Того́ моли́ сохрани́тися пою́щим Тя́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Я́ко Ио́ну от ки́та спа́сл еси́, Спа́се, па́че ума́ неврежде́нна, та́ко и ны́не спаси́ ду́шу мою́ от се́тей змии́ных.

Спасе́ния ты́, проро́че, хода́тай бы́л еси́ ве́ровавшим твоему́ пропове́данию ниневи́тяном, сла́вне, покая́ния возопи́в пропове́дание.

Богоро́дичен: Неискусому́жно, Пречи́стая Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́к, гла́с 2.

Проро́к ди́вен показа́ся, Бо́жие повеле́ние прие́м, во о́браз тридне́внаго Воскресе́ния в ки́те тридне́вен бы́в, неврежде́н от зве́ря изы́де и яви́ся све́тел пропове́дник Ниневи́и, вели́кому гра́ду. Сего́ ра́ди тя́ ра́достно, Ио́но, почита́ем, я́ко человеколю́бия Бо́жия провозве́стника.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й Благослове́н и Препросла́влен.

Не терпя́ зре́ти тебе́ ско́рбию и печа́лию дручи́ма, проро́че всече́стне, а́бие простре́ ти́ пресла́вно се́нь, осла́бу нося́щу, сы́й Благослове́н и Препросла́влен.

Измла́да Творцу́ Твоему́ освяти́лся еси́, Ио́но всехва́льне, богому́дре, всеблаже́нне, моли́твы бо ты́ прозябе́ние бы́в, проро́чествия благода́ть Ду́ха прия́ти сподо́бился еси́, пребога́те.

Богоро́дичен: О́блак Де́ва Тя́, Пра́вды Со́лнце, роди́, Де́ва пребы́вши, дебе́лости плотски́я приобщи́вшася, Челове́ка бы́вша, Христе́, Ю́же воспева́ем, я́ко пресла́вную.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Я́ко в черто́зе, в зве́ре, богоглаго́ливый Ио́но, ру́це распросте́р, возопи́л еси́, глаго́ля Всеви́дцу Бо́гу: Спа́се мо́й, от тли́ мя́ возведи́, па́ки да взы́дет ны́не к Тебе́ живо́т мо́й.

У́мное твоея́ души́ очи́стив от скве́рны, спримеси́лся еси́ жела́емому, блаже́нне, и богови́ден бы́л еси́, Боже́ственным ра́зумом обожа́емь, поя́: вся́ дела́, Го́спода по́йте и превозноси́те во вся́ ве́ки.

Богоро́дичен: Свяще́ннейшими Тя́ гла́сы свяще́ннейшии Бо́жии проро́цы, Чи́стая, бу́дущую Ма́терь провозгласи́ша я́сно все́ми Влады́чествующаго, Пречи́стая, Его́же превозно́сим во вся́ ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Луча́ми благода́ти просвети́вся, бы́л еси́, Ио́но богоявле́нне, Христо́во проображе́ние, те́м я́ко проро́ка тя́ вси́, и́же благочести́во твои́х наслажда́ющеся всему́дрых уче́ний, благохва́лим, досточу́дне.

Боже́ственными пе́сньми всеблагочести́во пое́м тя́, Христо́ва я́ко я́вльшася погребе́ния проображе́ние и Воскресе́ния, блаже́нне, па́че ума́ зна́мение бы́вшаго, его́же да наслади́мся хода́тайствы твои́ми, богоприя́тне.

Богоро́дичен: Черто́г была́ еси́ па́че ума́ воплоще́ния Сло́ва, Де́во Богороди́тельнице, оде́яна сла́вою доброде́телей и укра́шена, те́м Тя́, Всенепоро́чную Богоро́дицу, велича́ем.