Пе́снь 1.

Ирмо́с: Помо́гшему Бо́гу во Еги́пте Моисе́ови и те́м фарао́на со всево́инством погрузи́вшему, побе́дную пе́снь пои́м, я́ко просла́вися.

Я́ко богоглаго́льник вои́стинну, я́ко проро́к, Оси́е, Жизнода́телю предстоя́, приле́жно моли́ся изба́вити искуше́ний ве́рно восхваля́ющия тя́.

Твоея́ души́ ви́дительное очи́стив от скве́рн, сподо́бился еси́ прозира́ти све́тло бу́дущая и предглаго́лати нело́жно, сла́вне, сбыва́ющаяся.

Прозре́ния исто́чник му́дрость Бо́жия боговеща́ннаго Оси́ю проро́чества показа́ реку́ неоску́дну, кипя́щу боже́ственная уче́ния.

Богоро́дичен: Я́вльшагося Христа́ от Де́вы на́с ра́ди от Еги́пта явле́нно Оте́ц призва́, я́коже прорече́ Оси́я дре́вле богови́дительнейший.

Пе́снь 3.

Ирмо́с: Утверди́ мене́, Христе́, на недви́жимом ка́мени за́поведей Твои́х и просвети́ мя све́том лица́ Твоего́: не́сть бо свя́т па́че Тебе́, Человеколю́бче.

Уче́нием боголе́пным науче́н Бо́жия изъявле́ния, язы́ков зва́ние я́ве провозгласи́л еси́, проро́че, Ду́хом Святы́м вообража́емь.

Бу́дущая предзре́ти я́ко настоя́щая, богому́дре, сподо́бился еси́, иуде́йское я́сно отпаде́ние возвеща́я и зако́нных потребле́ние.

Изба́витися Изра́илю не бра́нию, ни лу́ком, ни всеору́жием, но в Го́споде Бо́зе Вседержи́тели проре́кл еси́, воплоще́ние Сло́ва зна́менуя на́м.

Богоро́дичен: Ра́дуйся, Де́во Честна́я, заче́ншая Сло́во Воплоще́нное, Свое́ю ны́ изба́вльшаго от ле́сти кро́вию свято́ю и те́лом.

Седа́лен, гла́с 8.

Чи́сто се́рдце от страсте́й, проро́че, стяжа́в, я́ко и́стинно орга́н бы́л еси́ сли́чный Ду́ха, от Него́ бога́тно, му́дре, просвеща́емь, и бу́дущих все́х зна́ние прии́м. Те́м, соше́дшеся, святу́ю твою́ па́мять ве́рно соверша́ем, Спа́са сла́вяще, Оси́е приснопа́мятне: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.

Крестобогоро́дичен: Из Безнача́льнаго Отца́ рожде́ннаго, напосле́док Тя́ пло́тию Ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́ распина́ешися? Пою́ Тя, долготерпели́ве.

Пе́снь 4.

Ирмо́с: Разуме́х, Всеси́льне, Твое́ смотре́ние и со стра́хом просла́вих Тя́, Спа́се.

Оси́е, богови́днейшее о́ко церко́вное, бе́д изба́ви хва́лящия тя́.

Светле́йшее и тверде́йшее Ду́ха прия́телище, моли́ся спасти́ воспева́ющия тя́.

Судии́ ты́ все́х предстоя́, я́ко боже́ствен проро́к, страсте́й мя́ изба́ви моли́твами твои́ми.

Богоро́дичен: Превозшла́ еси́, Присноде́во, а́нгельския чи́ны, Творца́ си́х чревоноси́вши.

Пе́снь 5.

Ирмо́с: От но́щи у́тренююще, воспева́ем Тя́, Христе́ Бо́же, обнища́вшаго на́с ра́ди, и кре́ст и сме́рть пло́тию претерпе́вшаго.

Ми́лостивно дви́жимь, научи́л еси́ на́с Бо́жию долготерпе́нию, благоутро́бию же и бла́гости, е́юже вся́ щади́т, проро́че богоглаго́ливе.

Умертви́в сме́рть, воста́ Христо́с, я́коже му́дрое твое́ прорече́ние, богогла́се, провозвести́, и жи́знь су́щим во а́де душа́м дарова́.

От глубины́ мя́ грехо́вныя, проро́че Оси́е, твои́ми моли́твами исхи́ти, дерзнове́ние беззазо́рное ко Христу́ име́я, богому́дре пребога́те.

Богоро́дичен: Все́х Госпо́дь и все́х Ца́рь, Отцу́ Собезнача́льный, под ле́том из Тебе́ бы́сть, Богоро́дице Де́во, и пло́ть показа́ся.

Пе́снь 6.

Ирмо́с: Проро́ка спа́сл еси́ от ки́та, Человеколю́бче, и мене́ из глубины́ прегреше́ний возведи́, молю́ся.

Провозглаша́я бу́дущая, Оси́е всеблаже́нне, е́же к челове́ком Сло́ва возвести́л еси́ соше́ствие.

Умерщвле́нныя греха́ми, Жи́знь Безсме́ртная, от а́довых преде́л, я́коже проре́кл еси́, возведе́.

Зако́нных отъя́тие, иуде́ев отпаде́ние и язы́ков введе́ние, проро́че, яви́л еси́.

Богоро́дичен: Из чре́ва Твоего́ возсия́ Бо́г Сло́во, Всенепоро́чная, пло́тию на́с ра́ди неизрече́нно обло́жся я́ко Благоутро́бен.

Пе́снь 7.

Ирмо́с: Авраа́мстии о́троцы в пещи́ Тро́ицу прообрази́вше, о́гненный пла́мень на ро́су преложи́ша, и пою́ще, вопия́ху: благослове́н еси́, Бо́же оте́ц на́ших.

Па́че естества́ просвеще́нием, Оси́е, у́м просвети́в тво́й, бу́дущих, блаже́нне, зна́нием обогати́лся еси́, Влады́це зовы́й: благослове́н еси́, Бо́же оте́ц на́ших.

Ты́ в рука́х проро́ков уподо́бився, умно́жил еси́, Безсме́ртне, виде́ния, Спа́се, разли́чно образу́емь, Тебе́ ве́рно вопию́щим: благослове́н еси́, Бо́же оте́ц на́ших.

Изра́илев ты́ исто́чник, спасе́ния пролива́ющий во́ды, реку́ ми́рную — Христа́ пропове́дая, Оси́е, Ему́же вопие́м: благослове́н еси́, Бо́же оте́ц на́ших.

Богоро́дичен: Из Безнача́льнаго Отца́ возсия́в, из Тебе́ воплоти́ся, Богома́ти Отрокови́це, за ми́лость неизрече́нную, Ему́же пою́ще, вопие́м: благослове́н еси́, Бо́же оте́ц на́ших.

Пе́снь 8.

Ирмо́с: В пла́мени о́гненне горя́щия пе́щи сохра́ншаго де́ти, и во зра́це а́нгела снизше́дшаго к ни́м, по́йте Го́спода и превозноси́те Его́ во ве́ки.

Па́че постиже́ния проро́ком да́нная от Боже́ственнаго да́ра предзна́тельное де́йство и бу́дущих зна́ние, пе́ти Го́спода и превозноша́ти Его́ во ве́ки.

Уста́ богодохнове́нная стяжа́в и язы́к богоглаго́лив, Оси́е, богоче́стия све́т просвеща́ющь пое́ши: по́йте Го́спода и превозноси́те Его́ во ве́ки.

Словесы́ и дея́ньми проро́чествуя, облича́еши лю́ди блу́дствовавшия, обра́зно, пребога́те, науча́я пе́ти: по́йте Го́спода и превозноси́те Его́ во ве́ки.

Богоро́дичен: Соприсносу́щное Бо́жие Бо́г Сло́во, от Святы́я Де́вы вопло́щся, яви́ся ве́рою вопию́щим: по́йте Го́спода и превозноси́те Его́ во ве́ки.

Пе́снь 9.

Ирмо́с: Ра́дуйся, де́вственная похвало́, ра́дуйся, Ма́ти Пречи́стая, Ю́же вся́ тва́рь боже́ственными пе́сньми велича́ем.

Че́сть, я́ко проро́к, прия́л еси́, Оси́е, прие́м вене́ц благоле́пия от Бо́га, всеблаже́нне.

Все́м све́том озаря́емь Христо́вым всеизря́дне, да́ждь твои́ми моли́твами Сего́ ми́лостива пою́щим тя́.

Хвала́ми с чи́нми а́нгельскими, Оси́е, предстои́ши, Влады́ку хваля́, пожи́в житие́ равноа́нгельное.

Богоро́дичен: Спасти́ восхоте́в челове́ка Спа́с и Госпо́дь, от Пречи́стыя Де́вы в пло́ть на́шу оде́яся.