Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Па́мять, проро́че, твою́ восхвали́ти Ду́ха благода́ть молю́, помощи́ мне́ твои́м хода́тайством, взыва́я: Изба́вителю Бо́гу на́шему воспои́м.

Житие́ твое́ непоро́чно обре́теся, свяще́нства украси́ся оде́ждею и проро́чества светоно́сными сия́нии, богоглаго́ливе, блаже́нне.

Зако́нным венце́м главу́ украси́в, Заха́рие, яви́лся еси́ священноявле́нен, вопия́: Изба́вителю Бо́гу на́шему пои́м.

Богоро́дичен: Поди́ра оде́ждею, я́ко Ааро́н, оде́ян, Ю́же от ко́рене Иессе́ева прозя́бшую Отрокови́цу прия́л еси́, Изба́вителя во чре́ве носи́вшую.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Егда́ кади́ло сложе́ния приноси́л еси́, архиере́е, тогда́ Предте́чи прия́л еси́ провозвеще́ние.

Ми́ром свяще́ния свяще́нствовати тя́ пома́за, я́ко Ааро́на, те́м виде́ния а́нгелова сподо́бился еси́.

У́тро, провозвеща́ющее вселе́нней Тя́, Со́лнца Разу́мнаго, Спа́се, Заха́рия Иоа́нна роди́л е́сть.

Богоро́дичен: Упра́ви житие́ мое́, Богороди́тельнице Всечи́стая и жи́знь, Я́же Заха́риин до́м уясни́вшая.

Седа́лен, гла́с 8.

Свяще́нствовав Бо́гу по зако́ну и проро́чествовав Христа́ из Де́вы, Заха́рие, воплоще́нна от Ду́ха Свя́та, яви́лся еси́ вселе́нней сто́лп све́тел, с высоты́ Пра́вды Восто́ка, ве́сь ми́р осия́юща и в пу́ть ми́рен направля́юща но́ги на́ша, ре́кл еси́, спаса́юща ро́д на́ш.

Богоро́дичен: Я́же непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами Ма́терними Твои́ми, я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Крестобогоро́дичен: Сы́на Твоего́ и Бо́га Кресто́м, Де́во, соблюда́еми при́сно, де́монския прило́ги побежда́ем и кова́рствия, госпо́дственно Тя́ Богоро́дицу и и́стинно пою́ще, и любо́вию, вси́ ро́ди, ублажа́ем, Чи́стая, я́коже прорекла́ еси́. Те́м согреше́ний на́м оставле́ние моли́твами Твои́ми да́руй.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Проро́к Тво́й, Влады́ко, о́бразы зако́нными ве́рно служа́ше Тебе́ и благода́ти сподо́бися усмотри́ти Твою́ и́стину.

Све́том Све́т прия́л еси́, мра́чнейшим ты́ ясне́йший, преблаже́нне: зако́ном бо и благода́ть ны́не тебе́ приложи́ся.

Бо́гу предстоя́й, боже́ственный Гаврии́л, благовеству́я, яви́ тебе́, блаже́нне, гла́с Сло́ва и Предте́чу.

Богоро́дичен: Чи́стое жили́ще Соде́тель, Де́во, тва́ри обре́т Тя́, всели́ся, Елисаве́тино разреши́вый непло́дство.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́ ино́го не ве́мы.

Кида́рь положи́ся на главе́ твое́й, о проро́че, в начерта́нии иму́щь и́стинное Боже́ственное свяще́ние.

Ра́дуется тва́рь рождество́м твои́м, архиере́е, ты́ бо прозя́бл еси́ покая́ния пропове́дника.

Укра́шено твое́ житие́ препроводи́в, за́поведи бо вся́ Госпо́дня с Елисаве́тою соверши́л еси́.

Богоро́дичен: Направля́ется к пе́нию язы́к тво́й, богоглаго́ливе, Неискусобра́чную бо во чре́ве нося́щу ви́дел еси́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Зако́на служа́й се́ни, яви́ся и благода́ти пропове́дник, Спа́се на́ш, сподо́бися бо ви́дети Твое́ воплоще́ние.

Су́дными словесы́ укра́шся, Сло́во присносу́щное, пло́ть нося́що, Заха́рие свяще́нне, прия́л еси́.

Яви́лся еси́ вну́трь хра́ма, служа́ Бо́гу, таи́нниче богодухнове́нне, иере́й бы́в досточу́ден.

Богоро́дичен: Спа́са, Богома́ти, во утро́бе, Де́во, нося́щи, Сло́ва Безнача́льнаго, Елисаве́ти позна́лася еси́ проро́чице.

Конда́к, гла́с 3.

Проро́к дне́сь и свяще́нник Вы́шняго, Заха́рия предложи́, Предте́чев роди́тель, трапе́зу своея́ па́мяти, ве́рныя пита́я, питие́ бо пра́вды все́м раствори́в, сего́ ра́ди скончава́ется, я́ко боже́ственный таи́нник Бо́жия благода́ти.

И́кос:

Зако́на молча́нием иера́рх связа́ся, а́нгела гла́сом, а́нгела прие́м Христо́ва прише́ствия, проро́ка и таи́нника, с Елисаве́тию непло́дною и целому́дренною, и Того́ Рождество́м обнови́ся благода́ть и избавле́ние, и примире́ние на́ше всеми́рное. Сего́ пропове́да А́гнца, и Соде́теля, и естеству́ Обнови́теля, от непло́дныя утро́бы пло́д подаю́ща, Сы́на же, я́вльшася из Де́вы, я́ко боже́ственный таи́нник Бо́жия благода́ти.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Егда́ гла́с вопию́щаго прии́де от непло́дныя, па́че естества́, твоего́ язы́ка у́зы разреши́, зва́ти: благослове́н еси́, Го́споди Бо́же, во ве́ки.

Люби́мичь роди́ся Женихо́в от непло́дове, Рождество́ Де́вы провозвеща́я я́ве Предте́ча, ве́рою зову́щим: благослове́н еси́, Го́споди Бо́же, во ве́ки.

Ве́сь бы́л еси́, Заха́рие, боже́ственный орга́н Ду́ха, треблаже́нне, и проро́ка твое́ провозвеща́ше отроча́, благослове́н еси́, зову́ща, Го́споди Бо́же, во ве́ки.

Богоро́дичен: Зако́на исполне́ние Тя́, Отрокови́це, глави́зну всего́ проро́чествия Заха́рия зря́, позна́ше, вопия́: благослове́н, Пречи́стая, Пло́д Твоего́ чре́ва.

Пе́снь 8.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

И́стины показа́ся проро́к, Христо́вы бо стези́ Иоа́нн предгряды́й угото́ва Предте́ча, блаже́нне иера́рше, Его́же превозно́сим во вся́ ве́ки.

Вити́йствуя, благослови́л еси́ Влады́ку, спасе́ние на́м пода́вшаго, от Дави́да возсия́вшаго на́м пло́тию Го́спода сла́вы, Его́же превозно́сим во вся́ ве́ки.

Дарова́ний вели́ких сподо́бися, богоявле́нне, Предте́чу роди́в, проро́ков все́х вы́шшаго, Го́спода пою́ща и превознося́ща во вся́ ве́ки.

Богоро́дичен: Иера́рх ку́пно и богопропове́дник, Заха́рия Де́ве и Ма́тери, Го́спода нося́щей тва́ри, ра́дуяся, поклони́ся, Ю́же превозно́сим во вся́ ве́ки.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Испо́лнился еси́ вдохнове́ния Уте́шителева и благослови́ти нача́т Го́спода, священнотаи́нниче богому́дре и богоблаже́нне.

Глаго́лов исхожде́ния арха́нгеловых узре́в, богоглаго́ливе прехва́льне, к благослове́нию язы́к а́бие подви́гнул еси́.

Страда́ния венцы́ и свяще́нства и просвеще́нием проро́чества украси́лся еси́, о Заха́рие преблаже́нне и богоглаго́ливе!

Богоро́дичен: Све́та су́щи прия́телище, просвети́, Де́во, помраче́нную ду́шу мою́ страстьми́ и кроме́шния мя́ тмы́ изба́ви моли́твами Твои́ми.

Свети́лен:

Пе́рвее гла́сом а́нгела умолча́л еси́ в невхо́дных за хотя́щее бы́ти прозябе́ние из тебе́ гла́са вопию́щаго, и ны́не молчи́ши о́наго ра́ди, пред невхо́дными заколе́н бы́в, Заха́рие.

Богоро́дичен: Све́т из Све́та возсия́в, Сло́ве, пре́жде денни́цы безле́тно, Све́т из Ма́тере под ле́том непреме́нно проше́л еси́, сия́нии светолу́чными концы́ ми́ра просвеща́я, я́ко Све́т ми́ра.