Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Отверза́я ра́зума сокро́вища, Пода́тель и си́х благода́ть подава́ет оби́льно слове́с ве́рою восхваля́ющим страда́льца Его́ Арте́мона.

Стрело́ю пресла́дкия любве́ Христо́вы уя́звена от ю́ности тя́, му́дре, теле́сное пристра́стие, Арте́моне, Сего́ любве́ не отсече́.

В писа́ния прини́к приле́жно боже́ственнаго во глубину́, Арте́моне, извле́кл еси́ му́дре ра́зума лу́чшаго бога́тство, и́мже вся́ ве́рныя обогати́л еси́.

Богоро́дичен: Земноро́днии рождество́м Твои́м от земли́ к высоте́ небе́сней вознесо́хомся вои́стинну, Чи́стая Богоро́дице, и а́нгельским ликостоя́нием причто́хомся.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Си́лою Ду́ха оде́ян, победи́л еси́ ополче́ния, я́же на Зижди́теля, Арте́моне вседо́блий.

Угаси́л еси́ пе́щь безбо́жия, преподо́бне, страда́льческих крове́й твои́х одожде́нии, Арте́моне пресла́вне.

Кипя́ боже́ственным раче́нием и разжига́емь боже́ственною любо́вию, преподо́бне, за сию́ пострада́л еси́.

Богоро́дичен: Разреши́ рождество́ Твое́ грехо́в на́ших, Чи́стая, вины́ и пра́вдою вся́ ве́рныя связа́.

Седа́лен, гла́с 4.

Испове́дании свяще́нными подо́бствовав и му́ченически жи́знь соверши́в, к небеси́ восте́кл еси́, Арте́моне му́дре, вене́ц неувяда́емый от Бо́га прие́мь. Те́м святу́ю твою́ пра́зднуем па́мять, вопию́ще: помяни́ ны́, священному́чениче, Христу́ предстоя́.

Сла́ва, и ны́не, богоро́дичен: Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.

Крестобогоро́дичен: На Кресте́ Тя́ возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко, Жи́знь все́х, вкуша́еши сме́рти, оживи́ти ме́ртвыя хотя́, я́ко Милосе́рд?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Же́ртва твоя́, сла́вне, на же́ртвенник небе́сный вознесе́ся и благоприя́тна Влады́це все́х ны́не бы́сть.

В виде́ние лу́чшее возне́с у́м, Арте́моне преподо́бне, научи́лся еси́ та́ин Христо́вых, за ни́хже и пострада́л еси́.

Водрузи́вся на недви́жимем ка́мени Зижди́телевы, преподо́бне, любве́, прило́ги и треволне́нии враго́в не поколеба́лся еси́ весьма́ мы́слию.

Богоро́дичен: Я́ко неистоща́емое, Влады́чице, Тя́ дарова́ний сокро́вище иму́ще, незави́стныя да́ры чуде́с от Тебе́ вси́ прие́млем.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Волна́м, му́дре, безбо́жия запрети́в, спа́сл еси́ лю́ди благопокорли́выя, наста́вль во приста́нище ве́ры.

Свети́льник све́тел, в нощи́ ле́сти, преподо́бне, возсия́в доброде́телей све́том богоразу́мия, на све́т челове́ки напра́вил еси́.

Таи́нник Христо́в бы́в, Арте́моне преподо́бне, неизрече́нных та́ин, себе́ прине́сл еси́ Тому́ прия́тну же́ртву страда́нием.

Богоро́дичен: От скве́рны мя́ страсте́й и окаля́ния очи́щши, ду́шу мою́, Богоневе́сто, Твои́ми моли́твами чи́сту Бо́гу предста́ви.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Зако́нно за Христа́ страда́в, Арте́моне, обличи́л еси́ беззако́ннующих вра́г злочести́вое веле́ние, те́мже зако́нен му́ченик показа́лся еси́, боже́ственными побе́дами венча́емь.

Изсуши́в му́тныя пото́ки безбо́жия слове́с твои́х огне́м, све́тлыя источи́л еси́ ре́ки ве́ры богоразу́мия ве́рным, Арте́моне преподо́бне.

Вооружи́в, сла́вне, по́мысл на бори́теля зми́я, до́блим соплете́нием, Арте́моне, низложи́в его́, ме́ртва показа́л еси́ и от Го́спода побе́ды вене́ц прия́л еси́.

Богоро́дичен: Бы́хом ме́ртвии, безсме́ртнии Боже́ственною благода́тию рождества́ Твоего́ и тле́ния пе́рваго изба́вихомся, Богоро́дице Чи́стая, и нетле́ния оде́ждею украси́хомся.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Огне́м распала́емь боже́ственною Влады́ки любо́вию, му́чениче сла́вне, в по́двиг трудо́в усе́рдно во́лею вте́кл еси́, зовы́й: оте́ц на́ших Бо́же, благослове́н еси́.

Си́лою Паракли́товою облече́н, му́чениче, я́ко апо́столи, пре́лести ополче́ния до́блим терпе́нием победи́в, пе́л еси́: оте́ц на́ших Бо́же, благослове́н еси́.

Целому́дрием житие́ украси́в и те́ло чистото́ю, чи́сто Христу́, Арте́моне, священноде́йствовал еси́, поя́ и воспева́я благода́рственная: оте́ц на́ших Бо́же, благослове́н еси́.

Богоро́дичен: Да вся́ привлече́т к небе́сней сла́ве Творе́ц всего́, из Тебе́, Богороди́тельнице, благоизво́ли роди́тися и с на́ми я́ко Человеколю́бец и Благоде́тель Бо́г пло́тию пожи́ти.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Царя́ Небе́снаго, я́коже предпоче́л еси́ по достоя́нию от все́х земны́х, с Си́м во ве́ки, Арте́моне, сра́дуешися.

Превознесе́на тя́ душе́ю к Зижди́телю, прило́зи мучи́телей, страстоно́сче, ника́коже Сего́ отвлеко́ша любве́.

Све́та боже́ственнаго блиста́ньми, страстоте́рпче, просве́щся, вше́д в незаходи́мый же́ртвенник та́ин, я́ко таи́нник неизрече́нных.

Богоро́дичен: И́же челове́ческое естество́ прие́мый, Богоро́дице, из Тебе́ па́че ума́ и сло́ва сы́ны челове́ческия соде́ла сво́йственны.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Зи́му безбо́жия, му́чениче, прете́к, во благоче́стия ве́сну дости́гл еси́ и со́лнца сла́вы све́та сподо́бился еси́.

Душе́вными и разу́мными очесы́ прови́дев одесну́ю тебе́ стоя́ща Го́спода, не поколеба́лся еси́ му́к, Арте́моне, волна́ми.

Я́ко боже́ственныя неизрече́нныя сла́вы, страстоте́рпче, сподо́блься со страстоте́рпцы и ученики́ Христо́вы, о на́с умоли́ Сего́, я́ко Благоутро́бнаго.

Богоро́дичен: Свы́ше, Богоро́дице, Твои́м благоутро́бием на́шу нищету́ посети́ и от тли́ и бе́д на́с изба́ви.