Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Па́влом боже́ственным науче́н, небе́сных, Диони́сие, ви́дцем, небе́сный таи́нник а́бие и боговеща́тель бы́л еси́.

И́же благода́тию Бо́жиею озари́вся, просвети́, блаже́нне, пою́щих тя́ ду́ши твоя́ разуме́ти богодухнове́нная уче́ния, Диони́сие.

Умо́м преочище́нным и душе́ю, небе́сных удобре́ний сия́ния уве́дети сподо́бился еси́, и те́х ликостоя́ния, Диони́сие.

Богоро́дичен: Черто́г светоно́сный, па́че ума́ воплоще́ния яви́лася еси́ все́х Соде́теля: из Тебе́ бо пло́ть, Богома́ти, на́шу оде́ял е́сть.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Небе́сных круго́в превозше́д, о́тче, преми́рных чи́ны, и во́инства, и све́тлости, высоковеща́ньми слове́с и всему́дрыми уче́нии все́м изъясни́л еси́.

Высо́каго виде́ния насы́щся, преподо́бне, име́н Боже́ственных Боже́ственное разуме́ние богосло́вил еси́, Тро́ичный богосло́в бы́в благода́тию, богоблаже́нне Диони́сие.

Умертви́вся ны́нешним жела́нием, е́же к Бо́гу, и любому́дрию кре́пко научи́вся, су́щим па́че ума́ животво́рным дарова́нием богоно́сный орга́н, о́тче, бы́л еси́.

Богоро́дичен: Дея́нием, Де́во, Вседе́тельнаго Ду́ха, те́ло Влады́це все́х плодоноси́ла еси́, в Не́мже осуди́ся ми́ра гре́х и Жи́знь источи́ся ве́чнующая.

Седа́лен, гла́с 8.

В пучи́не прему́дрости уча́, Ду́ха глубины́, Тро́ицы еди́но Божество́ пропове́дал еси́, преподо́бне, списа́в вся́ а́нгельския чи́ны и та́йная те́х сия́ния, богому́дре. Те́м и ни́жнюю иера́рхию счиня́я, ко еди́ному вся́ возве́л еси́ еди́нству, иера́рше Диони́сие. Моли́ Христа́ Бо́га прегреше́ний оставле́ние дарова́ти честву́ющим любо́вию святу́ю па́мять твою́.

Богоро́дичен: Со́лнца о́блаче разу́мнаго, Боже́ственнаго Све́та свети́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослепле́нием страсте́й безстра́стия заре́ю просвети́, молю́ся. И оскверне́нное мое́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ Христа́ Бо́га, прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Крестобогоро́дичен: А́гнца, и Па́стыря, и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Церко́вное благочи́ние украси́л еси́: в ни́х бо, о́тче, живописа́л еси́ зра́чныя о́бразы я́вственно священнописа́нием безобра́зных си́л; и́миже тайново́дятся и просвеща́ются вся́ ве́рных, богому́дре, собо́ры.

Струи́ твоего́ богосло́вия, богоприя́тне, цветники́ напая́ют слове́сныя, присноцве́тущия зело́ и насажде́нныя на пра́вости богосло́вия: еди́нство бо Существа́ в Трие́х Ли́цех, честно́е Единонача́лие пропове́дал еси́.

А́нгельскаго священнонача́льства си́льное, святи́телю, жела́ние и раче́ние, е́же к Бо́гу, и неукло́нное ма́ние к высоте́ боже́ственней и непостижи́мей, научи́л еси́ богому́дренно, ве́рою вопию́щия: си́ле Твое́й сла́ва, Человеколю́бче.

Богоро́дичен: Священноде́йствитель спасе́ния бы́сть Сы́н Тво́й все́м пою́щим Тя́, и наста́вник, и просвети́тель, и пра́вда, Де́во, и избавле́ние. Те́м Тя́, Богоро́дицу, и́стинно и госпо́дьственно ве́рнии единому́дренно сла́вим.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Глаго́л твои́х веща́ние, я́ко не́кий небе́сный шу́м носи́мь, безбо́жныя ра́зумы огроми́ сло́вом благода́ти и веле́ний боже́ственных заря́ми светле́йшими ве́рных сердца́ просвети́.

Уподо́бился еси́ купцу́, и́щущему до́брыя би́серы, всебога́те, и обре́л еси́ еди́н Би́сер, и́стинно многоце́нен, и, уди́влься его́ боготво́рну световерже́нию, святи́телю, Бо́га испове́дал еси́.

Исто́чник му́дрости, любому́дрейше о́тче, возлюби́л еси́, и, тоя́ раче́нием и любо́вию одержи́мь, вели́к бы́л еси́, и ре́ки боже́ственных веле́ний всегда́ то́чиши, богогла́се.

Богоро́дичен: Я́ко Обра́дованная, добротворя́щее прия́ла еси́ благоле́пие, вся́ еди́нем хоте́нием Сотво́ршаго, и боже́ственною добро́тою и просвеще́нием благове́рия, Богома́ти, на́с Удобри́вшаго.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Зако́нно любому́дрствуя, му́дрости да́р получи́л еси́, боже́ственне богосло́вя правосла́вныя догма́ты, всеблаже́нне, оста́вил еси́, и́хже наслажда́ющеся, ве́рнии, тя́ блажи́м.

Ра́зумом боголе́пным, богому́дре, удобря́емь, боже́ственному учи́телю слу́х тво́й приклони́л еси́, и преми́рную от него́ му́дрость навы́кл еси́, Диони́сие.

Житие́ твое́ чу́дно, сло́во же ди́внейше, язы́к тво́й светоза́рен, уста́ огнедухнове́нна и духодви́жима, у́м же тво́й испы́тен, о́тче, богоблаже́нне.

Богоро́дичен: Гла́с Ти́ Гаврии́лов ра́достно, Де́во, взыва́ем ве́рнии, из Тебе́ бо неизрече́нно на́м живонача́льный Творе́ц изше́л е́сть и примеси́ся челове́ком, Человеколю́бец.

Конда́к, гла́с 8.

Небе́сная врата́ проше́д ду́хом, я́ко учени́к, до тре́тияго небесе́ дости́гшаго апо́стола, Диони́сие, неизрече́нных обогати́лся еси́ вся́ким ра́зумом и озари́л еси́ во тме́ неве́дения седя́щия. Те́мже зове́м: ра́дуйся, о́тче всеми́рный.

И́кос:

А́нгел от челове́ков, доброде́тельми бы́в вели́кий Диони́сий, ве́сь, я́ко крила́т, навы́че умо́м небе́сныя ра́зумы. Те́м пе́сньми, я́ко а́нгела, почти́м, вопию́ще к нему́ такова́я: ра́дуйся, уве́девый Христа́ Па́влом; ра́дуйся, мно́гия ко Христу́ обрати́вый; ра́дуйся, многобо́жия храмо́в губи́телю; ра́дуйся, богоразу́мнаго сове́та смотре́ние; ра́дуйся, кни́го богоначерта́нная та́йных сокро́вищ; ра́дуйся, скрижа́ль богозра́чная и зерца́ло небе́сное; ра́дуйся, я́ко Стра́сть Госпо́дню ви́дел еси́; ра́дуйся, я́ко усе́рдно Того́ ра́ди закала́ешися; ра́дуйся, исто́чниче, источа́я ра́зум; ра́дуйся, ка́пле, угаша́ющи безу́мие; ра́дуйся, стезе́ неле́стная спасе́ния; ра́дуйся, прегра́до нечести́вых прехо́да; ра́дуйся, о́тче всеми́рный.

Пе́снь 7.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Я́ко ту́ча небе́сная зе́млю жа́ждущую, твоя́ уче́ния ве́рных сердца́ при́сно жела́ющая умаща́ют и несы́тно вопи́ти науча́т: оте́ц на́ших Бо́же, благослове́н еси́.

Ра́зумом богому́дренным безпло́тныя умы́ расписа́л еси́ и те́х, преблаже́нне, песносло́вия, боже́ствен бы́в, Це́рковь пе́ти наказа́л еси́: благослове́н Бо́г оте́ц на́ших.

Прия́телище Ду́ха Всесвята́го яви́лся еси́ благоключи́мое, и Того́ вдохнове́ния и явле́ния проро́чески провозглаша́я, му́дре Диони́сие, вопия́ше ве́село: благослове́н Бо́г оте́ц на́ших.

Богоро́дичен: Се́ ны́не испо́лнися Иса́ии богоглаго́ливаго прорече́ние: Де́ва бо во чре́ве Бо́га Сло́ва име́ и породила́ е́сть Жизнода́вца; Ему́же вси́ зове́м: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Све́тел, я́ко зерца́ло, бы́в, Диони́сие, и вмести́телен чи́стых явле́ний у́м соде́лав, доброде́телию, всебога́те, лучи́ па́че ума́ сия́ния прие́мля, вопия́л еси́: свяще́нницы благослови́те, лю́дие превозноси́те во вся́ ве́ки.

Оби́льнейшая благода́ть излия́ся во устна́х твои́х, те́м боже́ственная уче́ния предложи́л еси́, и те́х ра́зумы па́че смы́сла на́м простира́я и ясне́е и све́тло отверза́я, ве́рою пою́щим: свяще́нницы благослови́те, лю́дие превозноси́те во вся́ ве́ки.

Зна́емейша бы́сть тобо́ю, Диони́сие, Афи́нская всесла́вная митропо́лия, Христу́ прине́сшая тя́ нача́ток всесвяще́нный Всецарю́, всегда́ пою́щи: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Богоро́дичен: Ма́ти Бо́жия Всенепоро́чная, души́ моея́ стру́пы и грехо́вныя я́звы потреби́: Сы́на бо родила́ еси́, вла́сть иму́щаго свя́занныя плени́цами грехо́вными удо́бь осла́бити от у́з нереши́мых, еди́наго Благоде́теля и еди́наго Жизнода́вца.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Святы́х апо́стол сподо́бился еси́ ви́дитель бы́ти и сострада́лец, и соо́бщник бы́л еси́ сла́вы, и с те́ми на виде́ние потща́лся еси́ телесе́ и́стинно живонача́льныя еди́ныя Богоро́дицы и честне́йшия, Ю́же досто́йно велича́ем.

Боже́ственнаго Ца́рствия на небесе́х насле́дник бы́л еси́, я́ко зако́нен архиере́й, о́тче, я́ко непобеди́мь страда́лец, свяще́нства ма́стию кро́вь сраствори́л еси́ му́ченическую. Те́м сугу́бым венце́м сподо́бился еси́ досто́йно, священнотаи́нниче Диони́сие.

Я́ко име́я дерзнове́ние ко Христу́, иера́рше, му́дре Диони́сие, всегда́ моли́ изба́витися от искуше́ния благоче́стно пою́щим тя́, учениче́ неизрече́нных виде́ний, я́ко тайноуче́нныя и богонача́льныя священноявле́нник бла́гости.

Богоро́дичен: Победи́вшу е́реси хра́брски, честну́ю Це́рковь яви́, ю́же Христо́с честно́ю Свое́ю кро́вию я́ко Бла́г стяжа́, Обра́дованная, Сы́н Тво́й и́стинно, и спаси́ от бе́д и от обстоя́ния, одержа́щаго на́с, Влады́чице.

Свети́лен.

Доброде́тельми восходя́, возвы́сився на небеса́, богоприя́тне, и позна́л еси́ а́нгелов чи́ны, и все́х вы́шних стоя́ния, и Трисо́лнечную Зарю́, навы́к от Па́вла.

Богоро́дичен: И́же жи́зни боже́ственней и блаже́нней позави́дев ми́ дре́вле в раи́, вра́г прелука́вый и злоко́зненный, и от Еде́ма изгна́в мя́, умерщвля́ется Рождество́м Твои́м, Богоро́дице.