Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Да́р Бо́гу, всеблаже́нне, тебе́ сама́го прине́сл еси́ чисте́йший, житие́м соверше́нным и честны́м муче́нием, Дорофе́е.

Я́коже зре́л гро́зд, о́тче, изгне́т мы́сль, весе́лия ча́шу — ве́рным уче́ния предложи́л еси́.

То́ки ле́стныя уста́вил еси́, Дорофе́е, тече́ньми прему́драго твоего́ язы́ка и ве́рных мы́сли напои́л еси́.

Богоро́дичен: Одожди́ ми, Де́во, молю́ся, ка́пли умиле́ния, прибы́вшую ми́ скве́рну отмыва́ющия, я́ко да сла́влю Тя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Но́щь отгна́л еси́ су́етства вся́ку блиста́нии, о́тче святи́телю, прему́драго пропове́дания.

Чудесы́ утверди́л еси́ и свяще́нными, му́дре, уче́нии ве́рных все́х мы́сли, я́ко па́стырь свяще́нен.

Пома́за тя́ Госпо́дь свяще́нным, о́тче, пома́занием и Своея́ боже́ственныя Це́ркве пастыренача́льника поста́ви.

Богоро́дичен: Все́ се́рдце мое́ боже́ственным све́том просвети́, две́ре Све́та, грехо́вное омраче́ние отгоня́щи.

Седа́лен, гла́с 3.

Боже́ственными догма́ты при́сно сия́ющь да́р святы́й, тебе́ сама́го прине́сл еси́ Безсме́ртному Царю́, пострада́в, Дорофе́е, и обита́еши ны́не, при́сно веселя́ся, перворо́дных в го́рней митропо́лии. О́тче преподо́бне, Христа́ Бо́га моли́ дарова́ти на́м ве́лию ми́лость.

Богоро́дичен: Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, И́же по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь. Того́ приле́жно моли́ дарова́ти на́м ве́лию ми́лость.

Крестобогоро́дичен: Нескве́рная А́гница Сло́ва, Нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Возноси́мую оплева́л еси́, преподо́бне, зи́му безбо́жия и теплото́ю Боже́ственнаго Ду́ха невреди́мо се́рдце соблю́л еси́.

Сокруши́шася, Дорофе́е блаже́нне, пред лице́м твои́м го́ры ну́ждныя де́монския и иста́яша злочести́вых челове́к шата́ния.

Терпе́л еси́, оскорбля́емь, от гра́да во гра́д изгони́мь, те́мже блаже́нную улучи́л еси́ му́ченик сла́ву и све́тлость.

Богоро́дичен: Искуше́ний мя́ спаси́ и душетле́нныя страсте́й бу́ри, я́ко да ве́рою ублажа́ю Тя́, Пресвята́я Отрокови́це, Ма́ти Де́во.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Смотря́я разу́мно воздая́ния боже́ственная, Дорофе́е, вели́кия беды́ и напа́сти претерпе́л еси́.

Еди́нством Божества́ пропове́дая Тро́ицу, Дорофе́е, многобо́жнаго неи́стовства су́етное погуби́л еси́ шата́ние.

Не поклони́вся, му́чениче, дело́м ру́к беззако́нных, терпе́л еси́ искуше́ния, и беды́, и ра́ны, и боле́зни, Дорофе́е.

Богоро́дичен: Восто́к Со́лнца, пре́жде денни́цы возсия́вшаго, была́ еси́, И́мже све́т су́щий во тме́ лю́тых, Чи́стая, ви́деша.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Се́рдце, разжже́но дыха́нии Ду́ха, стяжа́л еси́, духо́в, Дорофе́е, сопроти́вных стремле́ние разруша́ющо.

Святы́х жития́ свяще́нными списа́ньми яви́л еси́, о́тче богодохнове́нне, боже́ственным ра́зумом ду́шу просвеща́я.

Глаго́л твои́х веща́ние и кра́сных уче́ний си́ла всю́ обтече́, преблаже́нне, зе́млю Боже́ственною благода́тию.

Богоро́дичен: Де́во, Его́же родила́ еси́, Бо́га, Челове́ка бы́вша, Того́ моли́ изба́вити мя́ огня́ и му́ки.

Конда́к, гла́с 5:

Доброде́тельми сия́я, и боже́ственными уче́нии па́че со́лнца, и страда́нии, блаже́нне, облиста́л еси́, просвети́л еси́ зе́млю, Дорофе́е, отгна́в мглу́ многобо́жия и лю́тыя е́реси. Сего́ ра́ди па́мять твою́ све́тло пра́зднуем.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Звезда́ многосве́тлая яви́лся еси́, светлостьми́ страда́ний твои́х просвеща́я ду́ши ве́рно, Дорофе́е, вопию́щих: благослове́н еси́, Го́споди Бо́же, во ве́ки.

Стезя́ми пра́выми ходя́, низве́ргл еси́ де́бри льсти́ваго, к путе́м живо́тным наставля́я вопию́щия: благослове́н еси́, Го́споди Бо́же, во ве́ки.

Угаси́л еси́ ту́чами крове́й твои́х, всесла́вне, пе́щь преле́стную и на воде́ жи́зни всели́лся еси́, взыва́я: благослове́н еси́, Го́споди Бо́же, во ве́ки.

Богоро́дичен: Изба́ви соу́з греха́ окая́нную мою́ ду́шу, Богороди́тельнице, и любви́ Бо́жией припрязи́ соверше́нне, да ве́рно сла́влю Тя́, Богоро́дице, во ве́ки.

Пе́снь 8.

Ирмо́с: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Хва́лящагося зми́я в зло́бе, смири́вся о Го́споде, о́тче, смири́л еси́, вопия́: благослови́те, вся́ дела́ Госпо́дня, Го́спода.

Во глубо́цей тя́ ста́рости в нестаре́ющихся поко́йных ме́стех Зижди́тель всели́, свяще́нный о́тче, му́чеников украше́ние.

Житие́ равноа́нгельно име́я, со а́нгелы Влады́ки твоего́ престо́лу ны́не предстои́ши, вопия́: благослови́те, вся́ дела́ Госпо́дня, Го́спода.

Богоро́дичен: Кра́сная, Де́во, яви́лася еси́, прекра́сное Сло́во поро́ждши, Ему́же пое́м: благослови́те, вся́ дела́ Госпо́дня, Го́спода.

Пе́снь 9.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Испра́вил еси́ ста́до Христо́во к боже́ственным приста́нищем, невре́дно соблю́д е́ от бу́ри сопроти́вныя, я́ко преизря́ден святи́тель и боже́ственных, о́тче, испо́лнитель, му́дре, повеле́ний.

Я́ко священноде́йственник чи́ст, я́ко му́ченик до́бль, я́ко чудоде́йственник чу́ден, я́ко боже́ственных словопи́сец, я́ко ве́ры непоколеби́мь сто́лп, сла́ву ве́чную, о́тче, улучи́л еси́.

На суди́щи подъе́м мно́ги труды́ и боле́зни, к неболе́зненней и боже́ственней жи́зни, ра́дуяся, преше́л еси́, обоже́нием ны́не чи́сто прича́щся, му́чениче досточу́дне Дорофе́е.

Богоза́рная па́мять твоя́ возсия́ ми́ру, озаря́ющи ве́рныя луча́ми дарова́ний, ю́же сла́вящия о́бщники ны́ покажи́, о́тче, в тебе́ боже́ственныя све́тлости.

Богоро́дичен: Нося́щи Христа́ на рука́х, нося́щаго вся́ ма́нием боже́ственным, Чи́стая, Того́ при́сно моли́ ру́к на́ших воздея́ния испра́вити, я́ко фимиа́м, пред лице́м Его́.