Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Пе́сньми светоно́сную, и прехва́льную, и всесла́вную восхва́лим па́мять Ермола́я, Христа́ велича́юще.

Вели́ка твоя́ сла́ва бы́сть, Ермола́е всехва́льне, и́бо вели́каго Бо́га яви́лся еси́ уго́дник превели́к.

Зако́нно проше́д, сла́вне, по́двиг, попра́л еси́ беззако́ннующих на́глость, всесла́вный му́чениче Ермола́е.

Богоро́дичен: Ми́лостива ми́, Де́во, Христа́ сотвори́, Всенепоро́чная, в де́нь Суда́ стра́шнаго осужде́ния изыма́ющи.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Си́лою укрепля́емь Вседе́теля, му́дре, духо́вною, си́льнаго, му́чениче, в зло́бе кре́пость низложи́л еси́.

Зна́емь бы́л еси́ Вседержи́телю, свя́те, всезна́емы сло́вом твои́м боже́ственным в Не́м соде́лав.

Позна́, поуча́емь от твоего́, му́дре, ду́ха, Творца́ Пантелеи́мон и зако́нно пострада́.

Богоро́дичен: Изба́ви мя́, Всенепоро́чная, грехо́в лю́тыя бу́ри и по́мыслов, находя́щих неща́дно се́рдцу моему́.

Седа́лен, гла́с 8.

Свяще́нно житие́ твое́ соверши́в, свяще́нник показа́лся еси́ Изба́вителя, просвеща́я ве́рою к тебе́ приступа́ющия всегда́, и при кончи́не, блаже́нне, боже́ственней облиста́л еси́ муче́ния сия́нием, и ми́р озари́л еси́. Те́мже, светоно́сную и святу́ю твою́ па́мять соверша́юще, пое́м тя́ и ве́рно ублажа́ем, страстоте́рпче Ермола́е. Моли́ Христа́ Бо́га, грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Крестобогоро́дичен: А́гнца и Па́стыря и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Ше́ствия твоя́, Ду́хом Боже́ственным иду́ще, запя́ша ше́ствия лука́ваго и пу́ть пра́в мно́гим яви́шася.

Свяще́нник свяще́нен, му́ченик и́стинен бы́л еси́, достосла́вне Ермола́е, сего́ ра́ди тя́ вси́ восхваля́ем.

Тве́рдым умо́м беззако́ннующему сопроти́влься, муче́ния вене́ц прия́л еси́, му́жески пострада́в, свяще́нне.

Богоро́дичен: Я́коже престо́л огнеобра́зен но́сиши Влады́ку, Богоблагода́тная, Его́же моли́ спасти́ мя, грехо́вною волно́ю обурева́ема.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

И́же в нощи́ ле́стней одержи́мыя к све́ту наста́вил еси́ и мзду́ прия́л еси́, е́же сконча́тися кро́вию.

Христо́вы ору́жницы, Ерми́пп же и боже́ственный Ермола́й вку́пе с Ермокра́том, священносло́вии да просла́вятся.

За честну́ю Тро́ицу трие́ вку́пе пострада́вше, му́ченицы со тма́ми а́нгел ны́не на небесе́х веселя́тся.

Богоро́дичен: Тя́ предста́тельницу вси́, прибе́жище и тве́рдое заступле́ние иму́ще, Де́во, избавля́емся Тобо́ю вся́кия печа́ли.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Ермола́й, до́блий ору́жник, Ермокра́т и Ерми́пп вку́пе еди́н тве́рд показа́ша нра́в, Еди́наго Бо́га над все́ми пропове́давше, и, уме́рше за Христа́, небе́сныя венцы́ прия́ша.

Кропле́нии излия́нных крове́й себе́ очервлени́вше багряни́цу страда́льцы и све́тло оде́явшеся, Царю́ веко́в предстоя́т, моля́щеся о на́с со все́ми вы́шними си́лами.

Науча́ется и́же в Ду́се Боже́ственнем тобо́ю Пантелеи́мон вели́кий ве́ре пра́вей и, пострада́в зако́нно, муче́ния тебе́ хода́тай бы́сть, Ермола́е, с ни́мже Христа́ Бо́га о все́х умоли́.

Богоро́дичен: Бу́ря мя́ безме́рных согреше́ний смуща́ет и во глубину́ отсыла́ет вы́ну отча́яния, Де́во, но, предвари́вши, ру́ку ми́ простри́ и да́ждь ми́ к ти́хим покая́ния приста́нищем дости́гнути.

Конда́к, гла́с 4.

Я́ко святи́тель благоче́стно пожи́в и священномуче́ния вене́ц прия́л еси́. И́дольския же́ртвы погаси́в, до́брый па́стырь Христо́ва ста́да бы́л еси́, прему́дре, и Пантелеи́мону и́стинный учи́тель. Сего́ ра́ди почита́ем тя́ пе́сньми, вопию́ще: от бе́д изба́ви на́с при́сно моли́твами твои́ми, Ермола́е, о́тче на́ш.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Просвети́вся незаходи́мым просвеще́нием боже́ственнаго ра́зума, преподо́бне, к све́ту богоразу́мия мно́жество спаса́емых наста́вил еси́, вопи́ти: оте́ц на́ших Бо́же, благослове́н еси́.

Бра́тски сму́дрствующе, Ермокра́т вели́кий и боже́ственный Ерми́пп, Ермола́е всеблаже́нне, с тобо́ю муче́ния ча́шу пию́т, пою́ще: оте́ц на́ших Бо́же, благослове́н еси́.

По Боже́ственней Тро́ице разжига́еми любо́вию, му́ченицы сла́внии, о́гнь безбо́жия кро́вными кропле́ньми угаси́сте, пою́ще: оте́ц на́ших Бо́же, благослове́н еси́.

Богоро́дичен: Пресвята́я Де́во, Бо́га плотоно́сна поро́ждшая, от вся́каго греха́ и ско́рби вопию́щия лю́ди Твоя́ спаса́й: оте́ц на́ших Бо́же, благослове́н еси́.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Свяще́нный Ермола́й, свяще́нно просвеща́емь, за милосе́рдие на́с ра́ди, я́ко овча́ти, Закла́вшемуся безкро́вну же́ртву принесе́, и, закла́ся Его́ ра́ди во́лею, благоприя́тна же́ртва принесе́ся, зовы́й: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Свяще́нный Ермола́й, превели́кий Ерми́пп и Ермокра́т, тве́рдии адама́нти, пло́ти не пощаде́ша, ни истука́нным пожро́ша, же́ртвы же прия́тны себе́ Влады́це принесо́ша, вопию́ще: свяще́нницы, воспо́йте, лю́дие, превозноси́те во вся́ ве́ки.

От Христа́ укрепля́емь, богому́дрый Ермола́й сокрове́нное та́инство от родо́в ве́рным откры́, сокрове́нным от стра́ха враго́в, и, явле́нна себе́ сотво́рь, я́ве за все́х закла́вшагося Бо́га Сло́ва возвеща́ет, и умира́ет, и живе́т с му́ченики во вся́ ве́ки.

Богоро́дичен: Тя́, кра́сную пала́ту и све́тлый сосу́д все́х Царя́, Пресвята́я Влады́чице, пое́м, моля́щеся, хра́мы ны́ покажи́ из Тебе́ рожде́нному и очи́стившему вся́кую зло́бу сопроти́вную, вопию́щия непреста́нно: лю́дие, превозноси́те Христа́ во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Ста́л еси́ проти́ву враго́м, Христа́ испове́дуя, пресла́вне, испове́давшаго до́брое испове́дание пред Пила́том, и, веде́н бы́в на заколе́ние, зе́млю у́бо освяти́л еси́ боже́ственною кро́вию, небеса́ же душе́ю уясни́л еси́.

Яви́шася трисве́тлыя свещи́, Боже́ственнаго Ду́ха огне́м вжига́еми, Ерми́пп сла́вный с Ермокра́том и Ермола́й, уясни́вше ве́рных ду́ши Боже́ственною благода́тию и отгоня́ще злоче́стия мглу́ многобо́жную.

Усты́ вси́ све́тло и ра́достною мы́слию воспое́м страстоте́рпцы Христо́вы, Боже́ственною сла́вою, я́коже ри́зою, оде́яны боголе́пно, и ны́не на небесе́х живу́щия, и чуде́с ре́ки источа́ющия.

Со́лнце незаходи́мое, Христе́, Ермола́я свяще́нными мольба́ми, Пантелеи́мона и Ермокра́та и страда́вших с ни́ми не отри́ни от на́с, Сло́ве, ми́лости Твоея́, но, обы́чно на́с уще́дрив, от злы́х изба́ви.

Богоро́дичен: Пощади́ мя, Спа́се, рожде́йся и сохрани́в ро́ждшую Тя́ нетле́нну по рождестве́, егда́ ся́деши суди́ти вся́ческим, грехи́ презира́я и беззако́ния моя́, я́ко Безгре́шен, я́ко Ми́лостив Бо́г и Человеколю́бец.