Пе́снь 1.

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Со а́нгелы Бо́гу предстоя́ще, Царю́ все́х, му́ченицы всеблаже́ннии, проси́те на́м прегреше́ний избавле́ния, любо́вию блажа́щим вы́ и во хвале́нии пою́щим: Го́сподеви воспои́м, сла́вно бо просла́вися.

Архиере́я Ду́х Святы́й тя́ предста́ви, Ма́рко, оби́льны па́ствити лю́ди во вся́ком преподо́бии догма́тов па́лицею слове́сною. С ни́ми же, блаже́нне, пе́л еси́: Го́сподеви воспои́м, сла́вно бо просла́вися.

Струя́ми крове́й пла́мень многобо́жия угаси́вше, му́дрии, ра́дующеся, пострада́сте, е́ллинския мудрецы́ коне́чно посра́мльше, и ны́не с му́ченики Христу́ предстоите́, зову́ще: Го́сподеви воспои́м, сла́вно бо просла́вися.

Богоро́дичен: Из Отрокови́цы нетле́нныя Бо́г воплоща́ется, Его́же безпло́тных ли́цы, трепе́щуще, сла́вят, я́ко все́х Творца́ и Еди́наго непреме́ннаго, и челове́цы на земли́ всегда́ пою́т, воспева́юще: Го́сподеви пое́м, сла́вно бо просла́вися.

Пе́снь 3.

Ирмо́с: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющих.

Не прине́сл еси́ че́сти безслове́сным истука́нным, всеблаже́нне, но претерпе́л еси́ крепча́йше му́ки многообра́зныя, Ма́рко доблему́дренне.

Ума́ до́блестию претерпе́л еси́, пресла́вне Кири́лле, наруга́ния же и му́ки муже́й пребеззако́ннующих, му́чениче страстоте́рпче.

Обнажа́еми, му́ченицы многострада́льнии, и ра́нами сокруша́еми, непрело́жни пребы́сте, па́че Христо́вы любве́ ничто́же предпочита́юще.

Богоро́дичен: Из Тебе́ возсия́, Всенепоро́чная, озаря́яй подсо́лнечную пресла́вными осия́нии Пра́вды Со́лнце, Де́во.

Седа́лен:

Просве́щшеся благода́тию и́стинною, земны́я концы́ све́тло наставля́ете благоче́стно, священному́ченицы сла́внии. Те́мже ве́рою ва́с ублажа́ем.

Богоро́дичен: Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.

Крестобогоро́дичен: На дре́ве ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Исте́кшая на зе́млю кро́вь твоя́, богому́дре, сию́ пои́стинне освяти́ досто́йно и ду́ши напои́ благоче́ствующих, к ре́вности боже́ственней воздвиза́ющи.

Заре́ю мы́сленною я́ве просвеща́еми, но́щь злу́ю безбо́жнаго злосла́вия отгна́сте, му́ченицы, пресла́вно, Ма́рко и Кири́лле всеблаже́ннии.

Исцели́ на́ша неду́ги, Благоде́телю, Ма́рка моли́твами и Кири́лла боже́ственнаго и ми́лости Твоя́, Благоутро́бне, на вся́ воспева́ющия Тя́ низпосли́.

Си́лою Боже́ственною и благода́тию сло́ва, му́ченицы Христо́вы, хра́мы и́дольския низлага́юще, Ду́ха Свята́го хра́м ве́рою показа́стеся.

Богоро́дичен: Яви́лася еси́ Бо́жие простра́нное вмести́лище, престо́л высо́к и две́рь, Богоро́дице, е́юже про́йде неизрече́нным рождество́м, от тли́ ны́ воззыва́я.

Пе́снь 5.

Ирмо́с: От но́щи неве́дения Богове́дением просвети́вый концы́, просвети́ мя у́тром человеколю́бия Твоего́, Го́споди.

Мироявле́ннии свети́льницы, священному́ченицы боже́ственнии бы́вше, вся́ просвеща́ете Боже́ственными светлостьми́ Ду́ха.

Усмотря́я, всеблаже́нне, воздая́ния боже́ственная, терпе́л еси́, Ма́рко, нестерпи́мыя ра́ны и боле́зни крепча́йше.

Священноде́тель сы́й и, безкро́вныя же́ртвы принося́ Христу́, же́ртву, блаже́нне, благово́нную — тебе́ сама́го — Го́сподеви прине́сл еси́.

Богоро́дичен: Рождество́м стра́нным Царя́ все́х родила́ еси́, Пречи́стая Богоро́дице, на благодея́ние тва́ри.

Пе́снь 6.

Ирмо́с: Ио́ну в ки́те, Го́споди, еди́наго всели́л еси́, мене́ же свя́занного мре́жами вра́жиими, я́ко от тли́ о́наго, спаси́.

Претерпе́в му́ки многоплете́нныя и сме́рть хода́тайственную, богому́дре, в сла́ве присносу́щней лику́еши на небесе́х, о на́с, Кири́лле, моля́ся.

Глаго́л Бо́жий жи́в в се́рдцы твое́м я́ко име́я, Ма́рко сла́вне, к ве́ре Боже́ственней привле́кл еси́ лю́ди и наро́ды, му́дре, и благосла́вно тече́ние сконча́л еси́.

Священноде́теле и же́ртвы соверше́ны, Го́сподеви принесо́стеся, му́ками всесоже́гшеся, и в вы́шних све́тли Царю́ все́х предстоите́.

Богоро́дичен: Разреше́ние на́м долго́в испроси́ и жития́ исправле́ние, Де́во, песносло́вящим вели́чия Твоя́ и благочести́вым ра́зумом Тя́ сла́вящим.

Пе́снь 7.

Ирмо́с: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Просве́щшеся заре́ю Святы́я Тро́ицы, богоблаже́ннии, тму́ пре́лести изгна́сте и сла́ву улучи́сте, песнопою́ще: оте́ц на́ших Бо́же, благослове́н еси́.

Ни́жняя оста́вльшии и вы́шняя насле́довавшии, богоно́сный Ма́рко и Кири́лл боже́ственный да почту́тся, песнопою́ще: оте́ц на́ших Бо́же, благослове́н еси́.

Дрема́ние нераде́ния во вре́мя подвиго́в оттря́сше, соверши́сте тече́ние и собо́ром страстоте́рпец, песнопою́ще, совокупи́стеся: оте́ц на́ших Бо́же, благослове́н еси́.

Богоро́дичен: Из Тебе́ спасе́ние па́че ума́ же и сло́ва, Де́во, возсия́ во тме́ седя́щим сме́ртней и до́ле су́щия небе́сны соде́ла, вопию́щия: оте́ц на́ших Бо́же, благослове́н еси́.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Победи́тели мучи́теля, свере́по судя́щаго, показа́вшеся, нетле́нныя венцы́, му́ченицы, прия́сте, вопию́ще: благослови́те, вся́ дела́ Госпо́дня, Го́спода.

Щито́м любве́, страда́льцы, и ве́ры вооруже́ни, вра́жия ополче́ния мече́м посеко́сте боже́ственныя до́блести, вопию́ще: благослови́те, вся́ дела́ Госпо́дня, Го́спода.

На земли́ пострада́вше, в вы́шних, святи́и, пра́вды вене́ц от руки́ Христо́вы прия́сте, вопию́ще: благослови́те, вся́ дела́ Госпо́дня, Го́спода.

Тро́ичен: Я́ко Еди́ницу Естество́м, я́ко Тро́ицу Тя́ честву́ю начерта́ньми, О́тче Вседержи́телю, и Сы́не, и Ду́ше Святы́й, взыва́я: благослови́те, вся́ дела́ Госпо́дня, Го́спода.

Богоро́дичен: Ста́мну Тя́ ма́нны жи́зненныя пропове́дуем, Благослове́нная, трапе́зу, и же́зл, и кади́льницу, златы́й све́щник, го́ру же и две́рь, купину́ неопали́му, престо́л Вы́шняго и ми́ра спасе́ние.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Стопа́м, му́ченицы, Христа́, пострада́вшаго и стра́сти умертви́вшаго, после́довавше, мно́гих ра́н искуше́ние прия́сте, и, обличи́вше враго́в безбо́жных служе́ния, возвели́чистеся, и а́нгелом я́ве уподо́бистеся.

Яви́стеся у́глие о́гненно, приобщи́вшеся Бо́гу, всеблаже́ннии, и попали́сте многобо́жия ве́щь благода́тию, и к Све́ту у́мному, ра́дующеся, преидо́сте, богоблаже́ннии, озаря́юще на́ша разуме́ния.

Поста́вльше на ка́мени мы́сленнем ду́ш ва́ших стопы́, всехва́льнии, не поколеба́стеся мно́гих му́к приложе́ньми. Те́мже утвержда́йте на́ша при́сно мы́сли, кова́рствы вра́жиими коле́блемыя, добропобе́днии му́ченицы.

Взя́стеся к пресве́тлому свиде́тельства, страстоте́рпцы, краегра́дию, к высоте́ вели́цей, и Ца́рство Бо́жие непоколеби́мое сподо́бистеся прия́ти, Ма́рко свяще́ннейший, Кири́лле сла́вне, его́же получи́ти все́м на́м моли́теся.

Богоро́дичен: Сия́нием Твои́м, Отрокови́це, мы́сленным просвети́ на́ша мы́сли, Богора́дованная, и сердца́, и мудрова́ния, я́ко да по стезя́м жи́зни пра́во ше́ствующе, ми́лость улучи́м, возвеща́юще при́сно хвалы́ Твоя́.