Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Боже́ственным по́двигом, му́чениче Христо́в, подви́гся и тече́ние сконча́в, ве́ру соблю́л еси́ Боже́ственную, пра́вды обре́л еси́ вене́ц.

Преесте́ственну сла́ву от Христа́ прии́м, страстоте́рпче, зе́млю всю́ обхо́диши, избавля́я вся́, ве́рою с благогове́нием к тебе́ притека́ющия.

Небе́сный, сла́вне, лико́вник, со безпло́тными сы́й, на земли́ призыва́ющия тя́ от бе́д и напа́стей избавля́й.

Богоро́дичен: Прему́дрость и Сло́во О́тчее несказа́нно ро́ждшая, души́ моея́ лю́тую исцели́ я́зву и се́рдца боле́знь укроти́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

О́гнь муче́ний тя́ не устраши́, те́мже о́гнь напа́стей к тебе́ прибега́ющим утиша́еши, Фео́доре.

Изба́ви моли́твами твои́ми одержа́щия мя́ печа́ли, му́чениче Христо́в, все́ углажда́я жите́йское стропо́тство.

Все́ се́рдце мое́ и помышле́ние простира́ю к тебе́ и ду́шу, твоея́, страстоте́рпче, по́мощи тре́буя.

Богоро́дичен: Уста́ви непостоя́нное помышле́ний мои́х смуще́ние, Ма́ти Бо́жия, е́же к Сы́ну Твоему́ направля́ющи движе́ние.

Седа́лен, гла́с 4.

Му́ченическими добро́тами укра́шен, Царю́ Небе́сному, му́чениче, ра́дуяся, венцено́сец предстои́ши, Фео́доре: на кре́ст бо воздви́жен бы́л еси́ Его́ ра́ди и гвозде́й пригвожде́ние, и воло́вых жи́л, и ногте́й, и очны́х зе́ниц изверте́ние претерпе́л еси́ тве́рдо. Те́мже тя́ ве́рою почита́ем, превели́кий.

Сла́ва, и ны́не, богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Прави́теля тя́ предлага́ю, Бо́жий уго́дниче, ты́ мя́ упра́ви ве́трилом Ду́ха и Боже́ственными ве́тры, пресла́вне.

От вся́каго, мо́лимся, изба́ви преще́ния, всеблаже́нне Фео́доре, тя́ ве́рою блажа́щия и Боже́ственную па́мять твою́ почита́ющия.

Ни живо́т, ни сме́рть, ни настоя́щая, ни гряду́щая, ни о́гнь, ни ра́ны, от Христа́, богому́дре, отлучи́ша тебе́.

Богоро́дичен: Под ле́том бы́вша, от Отца́ безле́тно возсия́вшаго, Богома́ти на́м родила́ еси́, Его́же моли́ спасти́ пою́щия Тя́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Му́чеников бы́в удобре́ние, му́чениче Христо́в, ве́рных по́мощь бу́ди и стена́ неруши́ма.

Едине́ния насла́ждься лу́чшаго, я́же па́че ума́ благи́х, Фео́доре, тя́ чту́щия спаси́.

Побежда́емь любо́вию Зижди́теля, жите́йская оттря́сл еси́ пристра́стия и Бо́гу благоугоди́л еси́.

Богоро́дичен: Его́же родила́ еси́, Де́во Всенепоро́чная, Бо́га Сло́ва, приле́жно моли́ о на́с, пою́щих Тя́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Побо́рник сы́й благоче́стия тепле́йший и пре́лести обличи́тель и́дольския бы́в, де́монов мечта́ния и страсте́й о́бразы души́ моея́ потреби́.

Утвержде́ние ми́ бу́ди и стена́, му́чениче, непобеди́ма, не́мощь и гни́лость ума́ моего́ утвержда́я, Фео́доре, твои́ми предста́тельствы и сохраня́я невре́дно.

Во́инства тлетво́рнаго и тле́ннаго отре́клся еси́, во́инство же жи́зни, всеблаже́нне Фео́доре, до конца́ возлюби́л еси́, в не́мже победоно́сец показа́лся еси́, досточу́дне.

Богоро́дичен: Возсия́ от Сио́на Вы́шняго благоле́пие прия́тием пло́ти по соедине́нию неизглаго́ланному, из Тебе́, Неискусобра́чная, оде́явся, и ми́р просвети́.

Конда́к, гла́с 8:

Ве́ру Христо́ву, я́ко щи́т, вну́трь прии́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.

И́кос:

На престо́ле све́та Носи́маго, благода́рственно ве́рою воспева́ем Тя́, я́ко дарова́ние боже́ственное дарова́л еси́ — до́бляго во страда́нии Фео́дора, в житии́ треблаже́ннаго, я́ко побо́рника су́щаго и́стины, благочести́вым по́мыслом Тя́ жела́юща, Христе́, кре́пка победи́теля на льсти́ваго, я́ко непобеди́мый.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тя́, живота́ моего́ предста́теля, и засту́пника и́мам спасе́ния моего́, и храни́теля, богому́дре, утвержде́ние даю́ща ве́рою зову́щим: оте́ц на́ших Бо́же, благослове́н еси́.

Я́ко красно́ заколе́ние са́м себе́ Го́сподеви и свяще́ннейшее приве́л еси́, всеблаже́нне, и огне́м муче́ний всесоже́глся еси́, сла́вне, вопия́: оте́ц на́ших Бо́же, благослове́н еси́.

Живо́тнаго вдохнове́ния насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцеля́еши и зове́ши, ра́дуяся: оте́ц на́ших Бо́же, благослове́н еси́.

Богоро́дичен: Из утро́бы Твоея́ про́йде, вопло́щься, вся́ческих, Де́во, Госпо́дь. Те́м Тя́, Богоро́дицу, му́дрствующе правосла́вно, Сы́ну Твоему́ взыва́ем: оте́ц на́ших Бо́же, благослове́н еси́.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Вся́ческими, прехва́льне, треволне́нии окружа́еми и напа́стьми жите́йскими содержи́ми, предста́теля скоре́йша, и помо́щника, и спобо́рника, вси́ ве́рнии, тя́ моли́твенника Влады́це приво́дим, вопию́ще: не преста́й моли́ти о воспева́ющих всечестну́ю твою́ па́мять.

Грехо́вными вери́гами свя́зан, пребога́те, и прегреше́ний мои́х плени́цами око́ван, прибега́ю к покро́ву твоему́, венцено́сче, разреше́ния прося́, но я́ко чу́дно ко Влады́це все́х, богому́дре, дерзнове́ние име́я, моли́ спасти́ся Христа́ пою́щим во ве́ки вся́.

Му́ченическими светлостьми́ просвеще́н, всехва́льне, а́нгельским счи́слился еси́ чино́м, с ни́миже ра́дуяся и слику́я, му́чениче, при́сно, чудотво́рными исцеле́нии уясня́еши любо́вию тя́ чту́щия и ве́рно пою́щия: лю́дие, превозноси́те Христа́ во ве́ки вся́.

Богоро́дичен: Пло́тию приобщи́ся к челове́ком, я́ко Благоутро́бен, Соде́тель и Творе́ц тва́ри, из Тебе́, Неискусобра́чная Богороди́тельнице, сию́ прие́м: те́мже Богоро́дицу, ве́рнии, Тя́ и́стинно сла́вим, вопию́ще и ве́рно пою́ще: лю́дие, превозноси́те Христа́ во ве́ки вся́.

Пе́снь 9.

Ирмо́с: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Бо́дра тя́ храни́теля, великому́чениче, стяжа́вше, враго́в злоу́мие удо́бь отгоня́ща и Це́рквам подаю́ща ми́р, страстоте́рпче, непреста́нно ублажа́ем.

Кре́пость тебе́ на де́моны дарова́ Влады́ка, стра́сти же души́ и телесе́ исцеля́ти, блаже́нне, всеблагочести́вейшим дерзнове́нием, моля́ся Спа́су, те́мже тя́ вси́ ублажа́ем.

Зарю́ Трисо́лнечную и еди́нственную созерца́яй, Еди́но в Тре́х Божество́, и нача́ло пренача́льное, и исто́чник бла́гости, страстоте́рпче, тя́ пою́щия сохраня́й.

Богоро́дичен: Изми́ мя́, Всенепоро́чная, мы́сленнаго плене́ния, избавле́ние воздаю́щи, Влады́чице, Сы́на Твоего́ распя́тие, е́же за все́х бы́вшее, избавле́ние, и ми́р, и спасе́ние пою́щим Тя́.

Свети́лен.

Искуси́вся, я́коже зла́то, огне́м и му́ками, досто́ин яви́лся еси́ да́р Бо́га Вы́шняго, Фео́доре страстоте́рпче, о на́с ны́не моли́ся.

Сла́ва, и ны́не, богоро́дичен: Держа́вным Твои́м покро́вом от враго́в наве́та на́с, Чи́стая, Твоя́ рабы́, сохрани́ вся́ невреди́мы, Тя́ бо стяжа́хом, еди́ну прибе́жище в ну́ждах.