Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Боже́ственнии су́ще ученицы́ вопло́щшагося за милосе́рдие Бо́га на́шего, Того́ моли́те грехо́в дарова́ти проще́ние соверша́ющим ва́шу па́мять, блаже́ннии.

Зерца́ла Бо́жия светови́дная вмести́тельна Того́ подая́ний яви́стеся, блаже́ннии, все́м ве́рным благода́тельно даю́ще спаси́тельныя зари́, богови́дцы апо́столи.

Возсия́ша все́м просвеще́ние, озаре́ний исто́чник поче́рпше, Ера́ст, и Те́ртий, и Оли́мп, и Родио́н, и Сосипа́тр ку́пно с Куа́ртом, я́же благоче́стно ублажи́м.

Богоро́дичен: Ро́д челове́ческий Твои́м Рождество́м, Де́во, обнови́ла еси́, Сло́во бо родила́ еси́ О́тчее, в пло́ть ме́ртвенную оде́явшееся и безсме́ртия пути́ на́м показа́вшее.

Пе́снь 3.

Ирмо́с: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Сло́во, я́ко свети́льник мы́сленный, принося́ще, апо́столи, богопоко́рно всю́ тва́рь проидо́сте, тоя́ мра́к разгоня́юще и сы́ны явля́юще све́та благода́тию, но́щи неве́дения рабо́тающия.

Глаго́л ва́ших проро́чески во всю́ изы́де вселе́нную веща́ние спаси́тельное и де́л све́тлое показа́ние всю́ зе́млю обтече́, ду́ши просвеща́ющее, богоглаго́ливии Госпо́дни апо́столи.

Все́лься в душа́х ва́ших, му́дрии, Ду́х Всесвяты́й богови́дны весьма́ соде́ла; всю́ду ми́р обходя́ще, хра́мы разори́сте и́дольския благода́тию и Бо́гу це́ркви воздвиго́сте.

Богоро́дичен: Сы́на О́тча единоро́днаго, безма́терня пе́рвее и из Тебе́ рожде́нна, уве́девше безо́тча, Бо́жию Ма́терь испове́даем Тя́, безстра́стно ро́ждшую и Де́ву пребы́вшу па́че сло́ва, Мари́е Богоневе́сто.

Седа́лен, гла́с 1.

Ера́ста и Оли́мпа, Сосипа́тра и Те́ртия, Родио́на ку́пно и Куа́рта па́мять согла́сно почти́м, к ни́м воспева́юще: боже́ственнии пропове́дателие и слуги́ Сло́ва, ду́ши на́ша ве́чнующия му́ки моли́твами ва́шими изба́вите.

Богоро́дичен: Безневе́стная, Чи́стая Богоро́дице Де́во, еди́на ве́рных Предста́тельнице и Покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми.

Крестобогоро́дичен: Нескве́рная А́гница А́гнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Утвержде́ния дре́вле неутвержде́ным бы́вше, раскопа́сте ва́шими богода́нными уче́нии вра́жия тверды́ни всера́зныя и запусте́нию преда́сте, богови́днии Спа́совы апо́столи.

Вельми́ Христо́ва вели́чия пропове́дающе, ума́лении всеконе́чно, великопропове́дницы, земны́я вельми́ просвети́сте све́тло, вели́чием благода́ти соверши́вше, боже́ственнии апо́столи.

Да похва́лится боже́ственный Оли́мп песнопе́ньми, и Родио́н с ни́м да возвели́чится благоче́стно, тече́ние соверши́вше муче́ния с Петро́м богопропове́дником в Ри́ме, глава́ми отсека́еми.

Богоро́дичен: Чуде́с бо́льше все́х, Всенепоро́чная, в Тебе́ новосоде́явшееся чу́до показа́ся я́вственно: Бо́га бо родила́ еси́ теле́сне, земны́м за милосе́рдие соедини́вшася в несли́тнем соедине́нии, Богоневе́сто.

Пе́снь 5.

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Му́дрость О́тча, все́ осуществова́вшая, учи́тели в ми́р ва́с посла́, в му́дрости Ду́ха и и́стины явле́нием вся́ умудря́ющия, сла́внии.

Сло́ва вмета́юще, всему́дрии, у́дицу, возвлеко́сте из глубины́ неве́дения благода́тию ры́б, су́щия безгла́сншия, и Го́споду ве́ровавшия приведо́сте.

Восхва́лим Оли́мпа, и вели́каго Родио́на, и Те́ртия, и Сосипа́тра, ку́пно и Ера́ста, и боже́ственнаго Куа́рта, христопропове́дники и все́х благочести́вых защи́тники.

Богоро́дичен: Зачала́ еси́ сло́вом Сло́во, Всенепоро́чная, и родила́ еси́ па́че ума́ и сло́ва, Богоневе́стная, бы́вша, Богоро́дице, Челове́ка. Те́м Тя́ словесы́ богодухнове́нными всегда́ ублажа́ем.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Пречестни́и, я́ко ка́мение, валя́ющеся на земли́, привали́сте к благоче́стию, и́же нра́вом лука́вым ка́мению нечу́вственному служа́щия, богови́днии Сло́ва таи́нницы блаже́ннейшии.

Еди́ницу в Трие́х Ли́цех неразлу́чну, несли́тну пропове́дающе, многобо́жную от земли́ разори́сте ле́сть, неле́стнии Христо́вы апо́столи, и лю́те прельще́нныя к све́ту богозна́ния наста́висте.

Ра́зумы кра́сными несмы́сльство нему́дрых, прему́дрии апо́столи, разори́сте, и утверди́сте Бо́гу, Всецарю́ еди́ному, ве́ровати, тва́рь всю́ Боже́ственными светоли́тии украша́ющему.

Богоро́дичен: Я́ко ино́е не́бо, пе́рваго, Влады́чице, я́вльшися вы́шшее, Тя́ сла́вим, Со́лнце на́м Пра́вды возсия́вшее и глубо́кую неве́дения тму́ отгна́вшее.

Конда́к, гла́с 4.

Яви́ся дне́сь апо́стол честно́е торжество́, подаю́щее я́ве все́м прегреше́ний оставле́ние, соверша́ющим и́х па́мять.

И́кос:

Я́ко ученицы́ все́х Влады́ки, мре́жею, богови́дцы, ва́ших моли́тв из глубины́ прегреше́ний извлецы́те смире́нную ду́шу мою́, сетьми́ уловле́нную де́монских ко́зней, да до́бре преше́д про́чее вре́мя живота́ моего́, пою́ ва́с любо́вию и просла́влю житие́ ва́ше непоро́чное, е́же на земли́ соверши́сте, лю́те омраче́нныя просвети́вше, Тро́ицу Боже́ственную сла́вити науча́юще.

Пе́снь 7.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Тя́, свяще́нна иконо́ма, Ера́сте, Це́ркве Христо́вы су́щия во Иерусали́ме, пиша́ пропове́даше Па́вел апо́стол, с ни́мже тя́ почита́ем, пою́ще Христу́: хва́льный отце́в на́ших Бо́же, благослове́н еси́.

Терпе́нием искуше́ний, и скорбе́й, и гоне́ний искуси́вся и я́звами Христо́выми удобря́емь, Ера́сте пребога́те, велегла́сно взыва́л еси́: хва́льный отце́в Бо́же, благослове́н еси́.

Зако́на но́ваго яви́лся еси́, Куа́рте, возвести́тель, ве́тхаго беззако́ния отводя́ чуждему́дренныя и к возновле́нию жи́зни преводя́ зову́щия: хва́льный отце́в Бо́же, благослове́н еси́.

Богоро́дичен: О́тчее Сло́во Соприсносу́щное, я́вльшееся земны́м, воплоти́ла еси́ и те́лом, Отрокови́це, породила́ еси́ Челове́ка бы́вша, да спасе́т челове́ка, хва́льный отце́в Бо́г и препросла́влен.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Нерасте́рзни столпи́ Христо́вы я́вльшеся Це́ркве, разори́сте злоче́стия сте́ны вся́, ве́рныя же, я́ко ка́мение, назда́вше на ка́мени ве́ры, вопию́щия: вся́ дела́ Го́спода по́йте и превозноси́те Его́ во ве́ки.

Законополо́жницы яви́стеся вы́, Ду́ха зако́н напису́юще в сердца́х ве́рных, всеблаже́ннии, и́мже просвеща́еми, вопия́ху: вся́ дела́ Го́спода по́йте и превозноси́те Его́ во ве́ки.

Украси́вся, блаже́нный Оли́мпе, в о́ньже де́нь Пе́тр вели́кий коне́ц прия́т, я́ве сконча́вся ку́пно с Родио́ном мече́м, повеле́нием Не́рона, беззако́ннаго царя́, и совокупи́стеся небе́сным лико́м.

Богоро́дичен: Ста́мна дре́вле, иму́щая ма́нну, Чи́стая, образова́ше Тя́, Христа́ бо, сла́дость на́шу, носи́ла еси́ во чре́ве и пло́тию родила́ еси́, избавля́ющаго вся́кия го́рести безме́стных прегреше́ний превознося́щия Того́ во ве́ки.

Пе́снь 9.

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Ра́вно тече́ние соверши́вше, ра́вно от Влады́ки Сло́ва обога́щшеся, ра́вных Ду́ха даро́в сподо́бистеся и по́честей ра́вных получи́сте, апо́столи Госпо́дни, просвети́телие серде́ц на́ших.

Я́коже небе́сныя зве́зды, Богозна́меньми всю́ зе́млю просвети́сте, тму́ глубо́кую неве́дения отгна́вше и сы́ны дне́ показа́вше, дре́вле порабоще́нныя козньми́ вражде́бника.

По́лк злоу́мных погуби́сте, во глубину́ дре́вле ври́нувших язы́ки люде́й, мно́жество же Бо́гу приведо́сте спаса́емых, чино́м совокупля́еми невеще́ственных си́л, всеизбра́ннии Христо́вы апо́столи.

Вше́дше к преми́рным, Оли́мп вели́кий и Сосипа́тр, Те́ртий ку́пно и Родио́н, и Куа́рт, и Ера́ст свяще́ннейший и ны́не о ми́ре Изба́вителя мо́лят.

Богоро́дичен: Пощади́ лю́ди Твоя́, Го́споди, нахожде́ния ва́рварскаго на́с избавля́я, и грехо́в, и напа́стей, и му́ки ве́чныя моли́твами Ро́ждшия Тя́ Де́вы Пречи́стыя и сла́вных апо́стол Твои́х.

Свети́лен.

Све́тлая прия́телища Ду́ха Свята́го, пресве́тлыя зари́ невече́рняго дне́, светода́тельная мо́лния, апо́столы, в пе́снех ве́рно просла́вим вси́.

Богоро́дичен: Тя́ Засту́пницу вси́ и́мамы, гре́шнии, о Пресвята́я Де́во! Ты́ благоуве́тлива на́м соде́лай Сы́на Твоего́ ма́терними Твои́ми мольба́ми.