Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Со́лнца иму́ще пра́вды незаходи́ма, Христа́, Бо́га на́шего, просвеща́юща ва́с, святи́и, невеще́ственным све́том, о́блаки разори́те неве́дения моего́.

Безбе́дную, святи́и, безпрепо́нно источа́юще, благода́ть подава́ете приходя́щим ве́рою, вся́ку беду́, и вся́кое уны́ние, и бу́рю, и мяте́ж уставля́юще.

Кре́постию непобеди́мою препоя́савшеся, святи́и, плотски́я не́мощи не помы́слисте, но, безбоя́зненно мудрова́ние явля́юще, на о́гнь и муче́ние дерзну́сте.

Богоро́дичен: Ты́ еди́на, Богоневе́сто, в высоча́йших Седя́щаго на объя́тиих носи́ла еси́, пло́ть бы́вша; Ты́ бо яви́лася еси́ от все́х ве́к прия́телище досто́йное Вседержи́теля.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Утверди́вшеся Христо́вою си́лою, всеизя́щнейшии, по́мыслом кре́пким, сквозе́ о́гнь же и во́ду, стра́ждуще, преидо́сте к небе́сным.

Нерасте́рзною бу́дущих наде́ждею ствержда́еми, настоя́щих боле́зней му́жественнейшим смы́слом, всесла́внии му́ченицы, небрего́сте.

Равному́дрствующе тре́м ю́ношам, всехва́льнии, безу́мия пе́рсскаго о́гнь угаша́юще, яви́стеся, росо́ю Ду́ха окропля́еми.

Богоро́дичен: Тя́, Предста́тельницу изве́стну, Богома́ти, стяжа́вшии, наде́жды на Тя́ возлага́юще, спаса́емся и, к Тебе́ прибега́юще, сохраня́емся.

Седа́лен, гла́с 8.

Безбе́дно тече́ние благочести́вное, в по́двизе стра́ждуще, благосла́внии наде́ждею проидо́ша, венцы́ укрепля́еми; сопроти́вныя бо до конца́ погуби́вше, безпрепо́нно побе́ду свою́ соверши́ша, те́м и оби́льно прося́щим ве́рою источа́ют всегда́ мно́жество исцеле́ний. И́мже согла́сно возопии́м: моли́те Христа́ Бо́га грехо́в оставле́ние дарова́ти честву́ющим любо́вию святу́ю па́мять ва́шу.

Богоро́дичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Крестобогоро́дичен: А́гнца и Па́стыря и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Просвеща́еми добро́тою изя́щнейшаго страда́ния, све́тлии свети́льницы, му́ченицы Христо́вы яви́стеся, светле́йшими луча́ми озаря́юще зову́щия: сла́ва, Христе́, си́ле Твое́й.

Очище́ние кро́вь му́чеников бы́сть, и благово́ннейшее и́стинно приноше́ние Бо́гу безпрепо́нно даю́щи, и безбе́дный источа́ющи все́м исто́чник врачева́ния.

Разли́чных напа́стей и бе́д нахожде́ние ва́шими моли́твами, су́щими ко Христу́, отрази́сте соверша́ющих усе́рдно всесвяще́нную и всепра́зднственную па́мять ва́шу, досточу́днии.

Испрове́ргше пре́лести и́дольское безбо́жие, Бо́га все́х животворя́щее де́йство де́лы явля́юще, зва́сте, преблаже́ннии: сла́ва, Христе́, си́ле Твое́й.

Богоро́дичен: Крепча́йшее Тя́ ору́жие на враги́ предлага́ем, ско́рби вся́кия и лю́тых обстоя́ний отрева́ем вре́д и возмуще́ний ерети́ческих, Ма́ти Бо́жия, избега́ем.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Тя́ сама́го, Аффо́ние, приве́л еси́ Христу́, кре́пце мучи́тельскую, сла́вне, обличи́в зло́бу безбо́жную, и к све́ту прите́кл еси́ ве́ры, веселя́ся.

Подо́бяся, Аффо́ние, стра́сти Христо́ве, Того́ ра́ди твоя́ глава́ отсече́ся изя́щне: к неизме́нному бо весе́лию потща́лся еси́ и безсме́ртному поко́ищу.

На недви́жимей наде́жди утверди́вся, и кра́сная, я́же на земли́, оплева́в, всему́дре Елпидифо́ре, неукло́нно бо ты́ прете́кл еси́ по́прище страда́ния.

Богоро́дичен: Возсия́в из Тебе́, Со́лнце мы́сленное све́тлыя лучи́ Своего́ Божества́ все́м простре́, Богоро́дице Влады́чице: те́м вси́ Тя́ сла́вим.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Теку́щих тле́нная презре́вше, нетле́нная сподо́бистеся зре́ти. Искуше́ний у́бо изба́вите и бе́д ве́рою ва́с призыва́ющия, всехва́льнии.

Тро́ицу Безнача́льную, пресла́внии му́ченицы, лю́то свя́занныя и в темни́цах неосла́бно держи́мыя разреши́ти, ва́шими мольба́ми умилосе́рдите.

За Тя́ себе́ преда́вше на сме́рть, безсме́ртие, Спа́се мо́й, до́блии получи́ша, и спаси́телие су́щих в бу́ри и напа́стех и ско́рбех бы́ша.

Богоро́дичен: Расто́ргни мои́х прегреше́ний, Отрокови́це, рукописа́ние, и содержа́щия мя́ печа́ли и страсте́й разреше́ние да́рующи, и соблюда́ющи вы́ну неврежде́нна, Влады́чице.

Конда́к, гла́с 2.

Благочести́выя и богоно́сныя му́ченики, я́ко на земли́ оста́вльшия вся́, прия́л еси́ в наслажде́ние благи́х Твои́х и упокое́ние, Акинди́на, Пига́сия, Анемподи́ста, с ни́миже Аффо́ния и Елпидифо́ра же, еди́не сы́й Преблаги́й.

И́кос:

Отве́рзи ми́ уста́, Христе́ мо́й, воспе́ти и похвали́ти че́стно по́двиги страстоте́рпец Твои́х, Го́споди: си́и бо, вся́ оста́вльше и возлюби́вше Тебе́, Созда́теля все́х, су́щая на земли́ вся́ я́ко тле́нная вмени́ша. И та́мо честны́й о́браз живоно́снаго Твоего́ Креста́ сотвори́вше, усе́рдно предста́ша Царю́, я́ко ору́жницы, му́ченицы до́блии, вопию́ще Ти́: еди́не сы́й Преблаги́й.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Я́ко изба́вил еси́ из пла́мене три́ благочести́выя о́троки, си́це и ны́не страда́льцы в пещи́ о́гненней сохрани́л еси́, вопию́щия Ти́ богому́дренно: оте́ц на́ших Бо́же, благослове́н еси́.

Дае́ши оби́льныя да́ры и чудодея́ние источа́еши страстоте́рпцы Твои́ми, Христе́, содева́я и соде́йствуя я́ко Милосе́рд и явля́я пою́щим Тя́: оте́ц на́ших Бо́же, благослове́н еси́.

Мно́жество му́ченик, нело́жно со́браннии ве́рою, приведо́стеся Христу́, пресла́вных чуде́с явле́ние де́йствующе и пою́ще: оте́ц на́ших Бо́же, благослове́н еси́.

Богоро́дичен: Изба́вленнии Тобо́ю пра́дедния кля́твы и к присносу́щней пи́щи преше́дше, ра́дуйся, зове́м Тебе́, Препросла́вленная Влады́чице, Я́же Бо́га на́м воплоще́ннаго ро́ждшая.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Благочести́вейшее му́чеников торжество́ ра́достно прии́де, ми́р озаря́ющее, вся́ возвесели́, и све́тло украша́ющее ве́рою пою́щия: Го́спода воспева́йте дела́ и превозноси́те Его́ во ве́ки.

На зве́ри, и ро́вы, и му́ки лю́тыя дерзну́сте, преизя́щнии, иму́ще Помо́щника непобеди́ма, сла́вы Го́спода, Ему́же ны́не зове́м: Го́спода воспева́йте дела́ и превозноси́те Его́ во ве́ки.

Ва́с, до́блия страда́льцы, Акинди́на, Пига́сия, и Анемподи́ста, па́ки же Аффо́ния и приснопа́мятнаго Елпидифо́ра, иму́ще сте́ну кре́пкую, Го́спода пое́м и превозно́сим во ве́ки.

Венце́м побе́ды украси́вшеся и добро́ты диади́мою светя́щеся, зарю́ невече́рнюю коне́чно, блаже́ннии, на небесе́х прия́ли есте́, му́ченицы, зову́ще: Го́спода по́йте дела́ и превозноси́те Его́ во ве́ки.

Богоро́дичен: Усты́ и ра́зумом Богоро́дицу му́дрствующе, песносло́вим Тя́, Пренепоро́чная: породила́ бо еси́, Пречи́стая, пло́тию обложе́ннаго Творца́, и Бо́га, и Царя́ Христа́. Те́м Тя́, Де́во, пое́м и превозно́сим во ве́ки.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Труды́ ва́ша на земли́ небе́сное весе́лие прия́ше, иде́же му́чеников ли́цы, и боже́ственных во́инства, и все́ перворо́дных сра́дуется торжество́, всеблаже́ннии.

От у́з лю́тых, всеблаже́ннии, и бе́д изба́вите вся́, ве́рою свято́е торжество́ ва́ше пра́зднующия, ми́р же, и тишину́ прося́ще, и спасе́ние, блаже́ннии.

Бога́тым озаря́еми све́том и благода́тию, страстоте́рпцы, сия́юще, согреше́ний разреше́ние и печа́лей ку́пно с ва́ми подви́гшимися да́ти к ва́м прибега́ющим Благоде́теля умоли́те.

Богоро́дичен: Е́ва у́бо дре́ва жи́зненнаго изгна́ся, возбрани́вшися причаще́ния, Ты́ же, Де́во Богоро́дице, Жи́знь преве́чную родила́ еси́, ми́ру живоно́сное де́йство да́рующи ве́рою.

Свети́лен.

Акинди́на, и Пига́сия, и Елпидифо́ра венча́ем со Аффо́нием пе́сньми, ку́пно и Анемподи́ста, и́бо пе́рсскую ле́сть обличи́вше суему́дренную и бие́ния и ра́ны за Христа́ претерпе́вше, неизрече́нныя сла́вы получи́ша.

Богоро́дичен: Ра́дуйся, Бо́жия пала́то; ра́дуйся, горо́ осеня́ема; ра́дуйся, купино́ неопали́мая; ра́дуйся, престо́ле сла́вы; ра́дуйся, боже́ственная трапе́зо; ра́дуйся, ру́чко всезлата́я; ра́дуйся, све́щниче огнезра́чный; ра́дуйся, ле́гкий о́блаче, Де́во Ма́ти Мари́е.