Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Вла́сть на ле́сть восприя́л еси́, Ки́ре блаже́нне, сострада́льца боле́зней име́в Иоа́нна сла́внаго. Те́м сла́дости лу́чшия на небесе́х наслажда́етеся.

Во́инством духо́вным препоя́сався, Ки́ре всече́стне, земно́е же во́инство оста́вив, Иоа́нне всехва́льне, на де́моны взя́сте от Христа́ победи́тельная.

Фе́клине доброде́тели поревнова́вше, жены́ боже́ственныя, в де́вственную равноа́нгельную оде́жду благоче́стно оде́яшася, му́ченическим же жела́нием к подвиго́м совлеко́шася.

Богоро́дичен: Безсе́менно О́тчею во́лею от Боже́ственнаго Ду́ха Бо́жияго зачала́ еси́ Сы́на и пло́тию породила́ еси́, из Отца́ безма́терня, на́с ра́ди из Тебе́ безо́тча.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Плотско́ю не́мощию, укрепля́еми Христо́выми страстьми́, благосла́внии му́ченицы человекоуби́йцу низложи́ша.

Боле́зней пло́ти и нетле́нныя сла́дости Ду́хом Христо́вы му́ченицы прие́млюще, ра́довахуся.

Укрепи́ся немощно́е же́нскаго кресто́м естества́, те́мже врага́ зми́я му́жески победи́ша.

Богоро́дичен: Ты́ еди́на земны́м па́че естества́ благи́х хода́таица, Ма́ти Бо́жия, была́ еси́, те́мже Ти́, — ра́дуйся, — взыва́ем.

Седа́лен, гла́с 4.

До́лу влеку́щия сла́сти попра́вше, к муче́ния страда́льцы Боже́ственней высоте́ све́тло взя́стеся благода́тию, Ки́ре и Иоа́нне, вселе́нныя свети́льницы. Те́мже мо́лимся омраче́ния греха́ и неду́гов изба́вити ны́, су́щаго над все́ми Бо́га моля́ще.

Богоро́дичен: По Бо́зе в Тво́й, Богоро́дице, прибе́г, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́к, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: Из Безнача́льнаго Отца́ рожде́ннаго, напосле́док Тя́ пло́тию ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се, — вопия́ше, — ка́ко, сла́вимый я́ко Бо́г от а́нгел, от беззако́нных ны́не челове́к, Сы́не, хотя́ распина́ешися? Пою́ Тя, Долготерпели́ве.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Невече́рния благода́ти светозаре́ние враги́ низложи́ любомра́чныя льсти́, сея́ ратобо́рцы, свети́льники сия́ющия, Ки́ра и Иоа́нна показа́вши.

Услади́шася Тро́ическим раче́нием, и от Нея́ му́ченицы зело́ возлю́блени бы́вше, Ки́р же и Иоа́нн, соедине́нием лу́чшим орга́ни Бо́жии показа́стеся.

Я́ко че́стен ва́ш хра́м, отгони́телен лука́вых духо́в, отгоня́ет неду́ги все́х боля́щих, непобеди́мии му́ченицы, благода́ть исцеле́ния подава́ет.

Богоро́дичен: Неискусобра́чно родила́ еси́, о Де́во, и по рождестве́ яви́лася еси́ де́вствующи па́ки; те́мже немо́лчными гла́сы, — ра́дуйся, — Тебе́, Влады́чице, ве́рою несомне́нною взыва́ем.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Тя́, Спа́се, дво́ица му́чеников возжеле́, Ты́, Святы́й во святы́х, Ки́ра и Иоа́нна досто́йно поче́л еси́.

Твое́ де́ло, Бла́же, врага́ потребле́ние, Ты́ му́ченики благоче́стия Кресто́м соде́лал еси́ и сла́вою венча́л еси́.

Тя́ еди́наго люби́ти небоя́зненным мудрова́нием, пома́завшеся де́вством, Иоа́нн и Ки́р му́жество соде́лаша.

Богоро́дичен: Тя́ ору́жие непобеди́мое на враги́ предлага́ем, Тя́ тве́рдость и наде́жду на́шего спасе́ния, Богоневе́сто, и́мамы.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Пожре́тися му́ченицы за Христа́ изво́лиша, не́жели и́долом пожре́ти, лука́ваго же мучи́теля привести́, за милосе́рдие за ны́ поже́ршагося, я́ко овча́.

Изнемого́ша и́же неща́дно му́ченики стру́жущии, стру́жемым же стре́лы я́звы младе́нец быва́ху: пресла́вно бо утвержда́хуся Боже́ственным Ду́хом.

Го́спода и Царя́ всея́ тва́ри испове́давшая ве́рою дво́ица единому́дренная и единострада́льная беззако́нным да́же до кро́ве сопроти́вишася.

Богоро́дичен: О, чу́до, все́х чуде́с нове́йшее! Я́ко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Конда́к, гла́с 3.

От Боже́ственныя благода́ти да́р чуде́с прие́мши, святи́и, чудоде́йствуете непреста́нно, вся́ на́ша стра́сти рукоде́йством секу́ще неви́димым, Ки́ре богому́дре со Иоа́нном сла́вным: вы́ бо Боже́ственнии вра́чеве есте́.

И́кос:

Са́ми себе́ Бо́гу возло́жше, святи́и, вся́кое искуше́ние лю́тых Его́ ра́ди претерпе́сте, уме́рше усе́рдно, му́ченицы до́блии, и по кончи́не все́м источа́ете Боже́ственная дарова́ния, су́щим в разли́чных неду́зех, и от мно́гих исцеля́юще зо́л, от ни́хже еди́н и пе́рвый е́смь а́з, окая́нный. Те́лом бо и душе́ю от я́зв лю́тых боле́зную и ве́рою ва́м вопию́: исцели́те мя́, вы́ бо Боже́ственнии вра́чеве есте́.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Изве́сивше я́ко в преклоне́нии ме́рила мудрова́ние, тягото́ю пречи́стыя сла́вы страда́льцы возвыша́еми, взыва́ху: благослове́н еси́ в хра́ме сла́вы Твоея́, Го́споди.

Не неве́дуще супоста́тнаго умышле́ний, вся́к ра́н ви́д и ласка́ний поплева́вше, му́ченицы: благослове́н еси́, — вопия́ху, — в хра́ме сла́вы Твоея́, Го́споди.

Терпе́нием ра́н венча́еми, Иоа́нн же и Ки́р, защи́тницы, Тро́ице взыва́ху: благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, — ра́дуйся, — Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Ко отверже́нию у́бо нечести́вии естество́м су́щаго Бо́га призыва́ху лю́те; но непобе́днии му́ченицы тва́рию явля́ху все́х Зижди́теля су́ща, взыва́юще: благослови́те, вся́ дела́ Госпо́дня, Го́спода.

Неи́стовствующиися ле́стию гне́вно, земна́я му́дрствующии мучи́телие и́же житие́ иму́щия на небесе́х неразори́мо сме́ртию к жи́зни отсыла́ху, взыва́ющия: благослови́те, вся́ дела́ Госпо́дня, Го́спода.

Мо́щи му́чеников блиста́ния чуде́с яви́шася вселе́нней, Христе́, злоде́мона мечта́нную ле́сть посрамля́юще, вопию́щим же благоле́пно исцеле́ния подава́юще: благослови́те, вся́ дела́ Госпо́дня, Го́спода.

Богоро́дичен: Без ма́тере из Отца́ Сло́во Сы́й, пе́рвее, без отца́ бы́сть из Тебе́, второ́е, Всечи́стая, вопло́щся пе́рвее Безпло́тный, за благоутро́бие восхоте́в спасти́ пою́щия: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Послушли́ва до сме́рти дво́ица непобеди́мых му́чеников яви́ся, Иоа́нна и Ки́ра, Влады́чним Боже́ственным веле́нием, те́мже в ру́це Зижди́теля своя́ ду́ши преда́ша.

Свети́ла сия́ют два́, чуде́с сия́ния, от Исто́чника еди́наго светоно́снаго, немощны́м источа́юща нетле́нную благода́ть, я́же досто́йно велича́ем.

Еди́ницу у́бо Боже́ственнаго существа́, но ипоста́сьми Тро́ицу, непобеди́мых му́ченик дво́ица му́жески богосло́вяше: воплоще́ннаго же Сло́ва, Еди́наго Христа́ во двою́ естеству́.

Богоро́дичен: Пощади́ мя, Христе́, егда́ прии́деши суди́ти ми́р со сла́вою, разреши́ мглу́ страсте́й мои́х, мольба́ми ро́ждшия Тя́ и честны́х му́ченик Твои́х, я́ко Бла́г и Многоми́лостив.

Свети́лен.

Чудоде́йственнии свети́льницы, Ки́ре со Иоа́нном, душе́вныя на́ша неду́ги и теле́сныя исцели́те, от Го́спода прие́мше благода́ть исцеле́ний.

Богоро́дичен: От Бо́га ми́рови пода́нных благи́х Ты́ вина́ была́ еси́, Богоро́дице, но и ны́не моли́ о о́бщем спасе́нии благопреме́ннаго Бо́га.