Пе́снь 1.

Ирмо́с: Истря́сшему в мо́ри мучи́тельство фарао́не и Изра́иля су́шею наста́вльшему, пои́м Христу́, я́ко просла́вися во ве́ки.

Пое́м пе́снь вси́ Зижди́телю и Вседержи́телю Бо́гу, страстоте́рпцев досто́йно поче́тшему, сла́внаго Ману́ила и страда́вшия с ни́м, во ве́ки.

Оте́ческое служе́ние отве́ргше огнепоклоне́ние, гони́теля стремле́ние возрази́ша и бы́ша страда́льцы е́же в Тро́ице честны́м испове́данием.

Я́ко единочи́слени Тро́ице, пострада́вше Ея́ ра́ди, достоле́пно венча́стеся, му́ченицы, моли́теся у́бо непреста́нно изба́вити все́х на́с от бе́д.

Богоро́дичен: Е́же от Де́вы рождество́ вы́ше естества́, Рожде́йся утаи́ кня́зя тьмы́, я́коже пи́шет, и отве́рзе Еде́м Богоро́дицу Ю́ испове́дающим.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.

Не́сть, святи́и, по достоя́нию восхвали́ти свяще́нное ва́ше страда́ние, и́мже увязо́стеся небоплете́нными венцы́, Бо́гу, Изба́вителю на́шему, моля́щеся спасти́ся на́м.

Огне́м опаля́еми, неоскудева́еми умо́м, ра́нами око́вани, боле́зньми изощре́ни, небокова́ннии мечи́ бы́сте, му́ченицы, на нечести́выя враги́.

Посрами́ся томи́тель, паде́нием ужа́сным па́дся отсту́пник и беззако́нник, Христу́ укре́пльшу му́ченик тро́ицу до́бле ополчи́тися на нече́стие его́.

Богоро́дичен: Саму́ю Тебе́ приво́дим, ро́ждшую Тя́ пло́тию, на мольбу́ держа́ве Твое́й, Христе́ Бо́же на́ш, и му́чеников собо́ры, те́х мольба́ми умири́ ми́р Тво́й.

Седа́лен, гла́с 1.

Я́ко трисве́тлая свеща́, огне́м Тро́ическим вже́гшеся, пе́рсов, огню́ служа́щих, тьму́ попали́сте и Христа́ со дерзнове́нием пропове́дасте, возсия́вшаго от Неискусому́жныя Де́вы, и блаже́нную прия́сте кончи́ну, тричи́сленнии му́ченицы.

Богоро́дичен: Наста́ви ны́ на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще.

Крестобогоро́дичен: Зря́щи Тя́, Христе́, Всенепоро́чная Ма́ти ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

От ко́рене волше́бна тро́ица благослове́нная, отца́ неблагочести́ва, ма́тере же благоче́ствующия, му́ченик прозябе́, бра́тия, возрасти́вшии плоды́ благоче́стия.

Зве́зды неле́стны бы́сте ве́ры, я́ко со́лнце, я́ве возсия́вше ми́ру, трисия́нная тро́ица, светоно́сный Ману́ил, Саве́л и со Исма́илом.

Моли́теся трие́, я́коже еди́н, Тро́ице да́ти очище́ние и оставле́ние согреше́ний творя́щим ве́рою и́стинною, святи́и му́ченицы, па́мять ва́шу.

Богоро́дичен: Пала́та красна́ все́х Царя́ показа́ся вои́стинну, и престо́л Вы́шняго, и вы́шши тва́ри Богома́ти, и Предста́тельница ду́ш на́ших.

Пе́снь 5.

Ирмо́с: От но́щи неве́дения, Богове́дением просвети́вый концы́, просвети́ мя у́тром человеколю́бия Твоего́, Го́споди.

Достодо́лжно вси́ му́чеников соверша́ем па́мять: си́х бо кро́вию ве́сь освяти́ся мирски́й возду́х.

Нощеборю́щую дре́вле ве́рных Це́рковь, му́ченицы сию́ просвети́ша заре́ю пра́выя и́х ве́ры.

Авраа́мова не́дра му́ченическия ду́ши прия́ша, и́миже, я́коже о́браз напи́сан, Вы́шнее Ца́рство пропове́дается.

Богоро́дичен: Я́же от Тро́ицы еди́наго воплоще́нна ро́ждши Бо́га вои́стинну, Богома́ти, моли́ бе́д изба́вити рабы́ Твоя́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Избего́ша скве́рны мы́сленныя святи́и му́ченицы, спа́сшеся без волне́ния, окормле́нием Креста́ наставля́еми.

Кро́ви ва́ша, зи́нувши, земля́ покры́, святи́и, и внеза́пу мо́щи в до́льних сокро́вищах сокрове́ны бы́ша.

Умири́ ми́р, Бо́же, и спаси́, я́ко Милосе́рд, ста́до Твое́ неврежде́нно моли́твами сла́вных страстоте́рпец Твои́х.

Богоро́дичен: Без се́мене заче́нши Бо́га, Зижди́теля естества́ нетле́нно родила́ еси́, Того́ моли́, Богома́ти, спасти́ся на́м.

Конда́к, гла́с 2.

Ве́рою Христо́вою уя́звлени, всеблаже́ннии, и Сего́ ве́рно испи́вше ча́шу, пе́рсская служе́ния и де́рзость на зе́млю низложи́сте, Тро́ицы равночи́сленнии, моли́твы творя́ще о все́х на́с.

И́кос:

И́же испе́рва Боже́ственною Твое́ю добро́тою, Иису́се Жизнода́вче, озари́ мя я́ве, я́ко да воспою́ му́ченики, за Тя́ подви́гшияся да́же до сме́рти, и вра́жию всю́ кре́пость низложи́вшия до́бле, и и́дольския ле́сти отбе́гшия, кре́стною си́лою укрепля́еми. Му́ки бо претерпе́вше, Тро́йческую сла́ву восприя́ша, Того́ у́бо о все́х моли́те.

Пе́снь 7.

Ирмо́с: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Трие́ от еди́наго све́та свети́льники возжже́ Христо́ва светоно́сная Це́рковь, венцено́сца и победоно́сца сла́внаго Ману́ила и страда́вшия с ни́м.

Халде́йское оста́вльше оте́чество, волше́бныя отбего́ша ве́ры трие́ Тро́ице честни́и ору́жницы, вопию́ще: благослове́н еси́ во ве́ки, Го́споди Бо́же оте́ц на́ших.

Трие́ во огни́, и́же о Аза́рии, халде́йския избего́ша слу́жбы, и трие́ ору́жницы, и́же от Перси́ды, пострада́вше по Христе́, и́же о Ману́иле.

Богоро́дичен: В жена́х не роди́ де́ва, то́кмо Ты́ еди́на, Де́во Богоро́дице: отца́ бо до́ле и ма́тере горе́, Младе́нцу вся́ко не бе́: сугу́б бо бе́ Христо́с.

Пе́снь 8.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Воздержа́нием вжили́вше те́ло, благоче́стием укре́пльше ду́х, страда́льческое совокупи́ша все́ удержа́ние к неви́димым князе́м тьмы́ Христо́вы страстоте́рпцы.

Я́коже цве́ты, венцы́ венча́ема му́ченик Христо́ва Це́рковь неве́стническою оде́ждою оде́яся, кро́вию омоче́ною, я́ко от нетле́ния обагре́ния му́ченик.

Ча́сти, Христе́, спаса́емых, и жре́бия улучи́ти Твои́х му́ченик, и неотъе́млемыя сла́вы сподо́бил еси́ испове́дающих еди́наго Тя́, Сы́на О́тча и Де́вы.

Богоро́дичен: Я́ко еди́наго ро́ждши от Тро́ицы, моля́щи не преста́й, Богоро́дице, да изба́вимся от беззако́ний на́ших и сподо́бимся явле́ния Его́ и Ца́рствия.

Пе́снь 9.

Ирмо́с: Проявле́нное на горе́ законополо́жнику во огни́ и купине́ рождество́ Присноде́вы в на́ше, ве́рных, спасе́ние пе́сньми немо́лчными велича́ем.

Трегу́бным у́жем ва́с совокупи́ благода́ть, Ману́иле, Саве́ле и Исма́иле, незы́блемою ве́рою собра́вши единому́дренный нра́в и́же по Христе́ испове́дания ва́шего.

Иулиа́на смра́днаго и отсту́пника, льсти́ваго мучи́теля треплете́нною пра́щею победи́сте, Тро́ицы ору́жницы, трие́ увязо́стеся венцы́ вку́пе.

Достопа́мятное чу́до му́ченик, по кончи́не бо зия́нием земля́ покры́вши, пома́ле, я́ко светолу́чны зве́зды, от земны́х не́др облиста́ша.

Богоро́дичен: Я́же от Твое́ю боку́ ро́ждшая несказа́нным сло́вом е́же от Безнача́льна Отца́ пресу́щное Сло́во, Богома́ти, и в ма́терех Де́ва, спаса́й ду́ши воспева́ющих Тя́.

Свети́лен:

Чу́дная и треплете́нная во плени́цах златы́х, му́ченик наста́ всесвяще́нная па́мять: вели́каго вои́стинну Ману́ила, и Саве́ла, и Исма́ила пресла́вных, и все́х ве́рных сердца́ озаря́ет све́том и ду́ши весели́т.

Богоро́дичен: Я́ко иму́щи милосе́рдие и ми́лость вели́ку, при́зри, Всепе́тая Богоро́дице Де́во, на мое́ смире́ние, и страсте́й молву́ и собла́зн жития́ разори́, Отрокови́це, и огня́ гее́нскаго изба́ви мя́ Твои́ми моли́твами.