Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Пе́сньми боговенча́нное мно́жество свяще́нных му́ченик Твои́х жела́ющему похвали́ти, Христе́, с небесе́ пода́ждь ми́ све́т ра́зума си́х мольба́ми, да воспою́ боговеща́нную пе́снь.

Скве́рну отверго́сте пло́ти и ду́ха, пребога́тии, ми́ра смертоно́сных сласте́й избе́гше, равноа́нгельное же житие́ пожи́вше, в вы́шнее преидо́сте жили́ще.

Зако́ном ду́ха я́ве у́ды упра́вивше ва́ша и чу́вства, хра́мы освяще́нны Бо́гу показа́стеся, му́ченицы богоно́снии, в ва́с бо Христо́с водвори́ся.

Бога́тство, тли́мое на земли́, оста́вльше, святи́и, и кра́сная жития́, я́ко со́н, презре́вше, Христу́ угоди́вше, недви́жимое ца́рство ны́не восприя́сте.

Богоро́дичен: Ле́ствица яви́лася еси́ мы́сленная, ю́же Иа́ков ви́де избра́нный Бо́жий, из нея́же неизрече́нным сло́вом про́йде Безпло́тный, пло́ть непрело́жно бы́в па́че сло́ва из Тебе́, Богоро́дице.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Освяти́вше все́ ва́ше, му́ченицы, житие́, нескве́рно вои́стинну всеви́дящему Бо́гу принесо́сте всесожже́ния боже́ственна са́ми себе́ и соверше́нныя венцы́ прия́сте.

Са́ввы богоно́снаго я́ко ученицы́ и́скреннии, е́же кроме́ пли́щев возжела́вше отше́ствие, невозвра́тно стезе́ю приско́рбною ше́ствующе, к жи́зни достиго́сте безконе́чней.

Возде́лавше се́мя, е́же в ва́с, преподо́бнии, все́яное сло́во, и сле́зными то́ки оби́льно напои́вше, стори́чествующий кла́с Бо́гу принесо́сте, плодоноси́вше.

Богоро́дичен: Всели́вся в Де́ву пло́тски, Го́споди, яви́лся еси́ челове́ком, я́коже подоба́ше зре́ти Тя́, Ю́же и показа́л еси́ я́ко и́стинную Богоро́дицу и ве́рным по́мощь, еди́не Человеколю́бче.

Седа́лен, гла́с 8.

Воздержа́нием страсте́й огнепа́льныя умертви́вши зра́ки и двиза́ния, по́стницы богоприя́тнии, после́дующе стопа́м вся́ созда́вшему еди́ному Бо́гу, я́коже прия́тна же́ртва, жива́ и освяще́нна, принесо́стеся заколе́нием ру́к ва́рварских, бие́ми, закала́еми и ну́ждно пресека́еми.

Богоро́дичен: Богора́дованная, Чи́стая, благослове́нная, за милосе́рдие щедро́т из Тебе́ ро́ждшагося с вы́шними си́лами и арха́нгелы и со все́ми безпло́тными о на́с моли́ непреста́нно, да́ти на́м пре́жде конца́ проще́ние, и очище́ние грехо́в, и жития́ исправле́ние, я́ко да обря́щем ми́лость.

Крестобогоро́дичен: Сы́на Твоего́ и Бо́га Кресто́м, Де́во, сохраня́еми при́сно, де́монския прило́ги и ко́зни побежда́ем, су́щую Богоро́дицу Тя́ вои́стинну воспева́юще, и любо́вию, вси́ ро́ди, блажи́м, Пречи́стая, я́коже прорекла́ еси́. Те́мже согреше́ний на́ших оставле́ние моли́твами Твои́ми да́руй.

Пе́снь 4.

Ирмо́с: Все́л еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щым: сла́ва си́ле Твое́й, Го́споди.

В пусты́ни безво́дней терпя́щия зря́ вра́г, доброде́тельми же разли́чными крася́щияся, непобеди́мыя му́ченики, распаля́шеся лю́те, за́вистию обложе́н, и на ополче́ние готовля́шеся.

Укорени́в пре́лесть во свои́х ему́ ученице́х на дру́г дру́жное уби́йство поуча́ше ва́рварская коле́на зми́й лука́вый, и́миже из пусты́ни изгна́ти преподо́бныя тща́шеся.

Свире́по и́же окре́стныя объе́м, я́коже возжеле́, отгна́ти у́бо сия́ не возмо́же непобеди́мыя, пра́ведных сопротивобо́рец, побежде́н же бы́в неви́димо, окоявле́нне вооружи́ся.

Я́да и неи́стовства испо́лнен, устреми́ся со ору́жники злонача́льник, зверови́дно же блаже́нным натече́ и ра́нами нестерпи́мыми кро́вныя пото́ки излия́.

Теку́щаго истя́зоваху вещества́, зла́та тле́ннаго сокро́вища, и́же на земли́ упова́ния утве́рждшии, до́блии же на небеса́ поло́жше упова́ния, вопия́ху: сла́ва си́ле Твое́й, Го́споди.

Я́коже зве́рие, дреко́льми неми́лостивно, и мечи́ преподо́бныя, и ка́мением ураня́ху, своя́ старе́йшины сказа́ти веля́ще, но пребыва́ху вси́, зако́ном любве́ утвержда́еми.

Богоро́дичен: Де́во и Ма́ти, Ты́ — апо́столов удобре́ние, и му́чеников святы́х утвержде́ние, и преподо́бных похвала́ же и спасе́ние, ве́рно сладкопою́щих: сла́ва си́ле Твое́й.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и к све́ту за́поведей Твои́х, пути́ моя́ напра́ви, молю́ся.

Научи́вшеся любве́, Спа́се, сою́зу соверше́ния преподо́бнии и, нака́зани Тобо́ю, ду́ши положи́ша по свои́х дру́зех, Твои́м па́че челове́ков во́льным страсте́м подо́бящеся.

Вельми́ па́че естества́ пло́тию во́лею рожде́йся, Христе́, повеле́нием Твои́м сме́рти яви́шася держа́внее, и́бо, Твои́м составля́ющеся зако́ном, умре́ти по друзе́х благохва́льно богому́дрии тща́хуся.

Окропи́вше иссо́пом креще́ния мы́сленным ду́ши, ва́шими же а́бие окропи́стеся кровьми́, преподо́бнии, во стремле́нии же огня́, я́ко зла́то, искуси́вшеся, прия́тна бы́сте же́ртва благово́нна Бо́гу.

Богоро́дичен: Ма́тернее дерзнове́ние е́же к Сы́ну Твоему́ стяжа́вши, Пречи́стая, сро́днаго промышле́ния на́шего не пре́зри, мо́лимся, я́ко Тя́ и еди́ну христиа́не во Влады́це очище́ние ми́лостивно предлага́ем.

Пе́снь 6.

Ирмо́с: К могу́щему мя́ спасти́ Го́споду, из глубины́ грехо́вныя возопи́х, и от тли́ возведе́ живо́т мо́й, я́ко Человеколю́бец.

Преще́ний ва́рварских не убоя́шася уго́дницы Христо́вы, житие́ бо непреста́нным поуче́нием сме́ртным предста́виша.

Мня́ще богате́ти, нестяжа́тели нечести́вии неща́дно му́чаху, и́же тле́нная у́бо пове́ргшия, стяжа́вшия же нетле́нная.

Си́лою непобеди́мою оде́явшеся, Христо́вы страда́льцы победи́ша мы́сленныя лестцы́ и ва́рварская шата́ния.

Богоро́дичен: Я́ко на о́блаце ле́гцем, прии́де на Тя́ ца́рствуяй Госпо́дь низложи́ти, Всенепоро́чная, еги́петская рукотворе́ния.

Конда́к, гла́с 4.

Земны́х и тле́нных наслажде́ние презре́вше я́ве, преблаже́ннии, пусты́нное житие́ изво́ливше, ми́ра же красне́йшее, и пи́щи вре́менныя возненави́девше, отону́дуже сподо́бистеся небе́снаго Ца́рствия, с ли́ки му́ченик и по́стник веселя́щеся. Те́мже, чту́ще па́мять ва́шу, вопие́м ва́м приле́жно: от бе́д на́с, отцы́, изба́вите.

Пе́снь 7.

Ирмо́с: Халде́йския пе́щи всепа́губную си́лу угаси́вше, о́бразом А́нгела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших.

Изнемого́ша вку́пе бра́ни проти́вных полко́в, ви́димых и неви́димых, в ра́нах зря́ще му́ченики, песносло́вящия: благослове́н еси́ и хва́льный, Бо́же оте́ц на́ших.

Тебе́, Христу́, уневе́стившеся и жела́нием Твои́м уязвля́еми, еди́наго Су́щаго возлюби́ша; ро́д, и оте́чество, и бога́тство отве́ргше, прибега́телие Твои́, о Изба́вителю, Бо́же оте́ц на́ших.

Скверноуби́йство ва́рваров не претвори́ рачи́тели твоя́, Христе́, пусты́ннаго богослуже́ния, убива́ющих бо те́ло не убоя́шася, Твоя́ держа́ще за́поведи, я́коже незы́блемое основа́ние.

Все́ к Тебе́ преложи́вше от ми́ра жела́ние, Христе́, я́рость же то́кмо на гре́х вооружи́вше, Тебе́ угоди́ша, всему́дрым объе́мшеся по́мыслом, уго́дницы Твои́, Го́споди.

Зако́н, богопи́санный вну́трь на скрижа́лех серде́ц ва́ших, от Бо́га, му́ченицы, прие́мше, еди́наго в Тро́ице Бо́га пропове́дасте, Тому́ вопию́ще: благослове́н еси́ и хва́льный, Бо́же оте́ц на́ших.

Богоро́дичен: Во све́те Госпо́дни ходя́щии, прииди́те, воспои́м боже́ственную две́рь Царя́ ца́рствующих, Мари́ю, чи́стую Богоро́дицу вои́стинну, я́ко упова́ние ду́ш на́ших.

Пе́снь 8.

Ирмо́с: Нече́стия орга́ны ину́ю пе́снь, благоче́стия же Боговеща́ннии поя́ху гу́сли: благослови́те, дела́ Госпо́дня, Христа́ во ве́ки.

Небе́сным чино́м ревнова́вше, равноа́нгельни всено́щными стоя́нии во бде́ниих поя́ху: благослови́те, вся́ дела́ Госпо́дня, Христа́ во ве́ки.

Кре́ст взе́мше, Тебе́, Влады́це, после́доваша вседу́шно му́ченицы, пою́ще: благослови́те, вся́ дела́ Госпо́дня, Христа́ во ве́ки.

Всенра́вно те́ло, и ду́шу, и ду́х очи́стивше, всесожже́ния Бо́гу принесо́стеся, во огни́ опали́вшеся, отцы́, Христа́ превознося́ще во вся́ ве́ки.

Тро́ичен: Во дву́х ипоста́сех Тя́ бы́ти ху́лящии нераздели́маго да постыдя́тся, я́ко четвери́цу чту́щии: мы́ бо Тебе́ Еди́ному Боже́ственныя Тро́ицы покланя́емся.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Разли́чно обна́жшеся по́стницы и победи́вше мироде́ржца ко́зни, посрами́ша му́жески я́ко страда́льцы ва́рварское озлобле́ние, си́х претерпе́вше стремле́ния. Те́мже и венцы́ сугу́быя от пра́веднаго Подвигополо́жника прия́ша.

В верте́пах и пеще́рах, по́стнически жи́знь проходя́ще, блаже́ннии, в пеще́ре те́сней про́пасти затворе́ни бы́сте несве́тлей, обагре́ни кровьми́, жже́нием же огня́ и и́же от ды́ма, лю́те па́рою смеша́емою, уда́влени бы́вше, победоно́сцы яви́стеся.

Пое́м по́двиги па́че естества́, и́миже проти́ву греха́ пострада́сте, ю́ношески противоста́вше, я́ко Христо́вы во́ини сла́внии, и́бо победи́сте благосла́вно, и, ны́не предстоя́ще с чи́нми святы́х Всевысоча́йшему, на́с помина́йте.

С Са́ввою отце́м и наста́вником, я́ко и́скренняя ча́да, блаже́ннии, на небесе́х заре́ю оде́яни трисия́нною, о на́с моли́теся, соученице́х же и певце́х, ми́р дарова́ти о́бщий це́рквам и спасе́ние душа́м на́шим.

Богоро́дичен: Отринове́нныя небе́снаго жития́ и па́дшия окая́нно в сме́рть, па́ки на́с, Ма́ти бы́вши Изба́вителя, воззвала́ еси́, Пречи́стая, и к пе́рвому па́ки тещи́ сподо́била еси́ оте́честву. Те́мже Тя́, Богома́ти, непреста́нно велича́ем.