Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Тро́ицы равночи́сленнии Пресвяты́я, всебога́тии, Тоя́ яви́стеся честни́и покло́нницы и предстоите́ престо́лу Тро́ичному, те́плии засту́пницы притека́ющим к ва́м.

Тро́ицы покло́нницы трисо́лнечныя су́ще, многобо́жия ле́сть, святи́и, разруши́сте, претерпе́вше му́ки многообра́зныя и сме́рть непра́ведную, богоблаже́ннии.

Муче́ния пучи́ну без волне́ния преидо́сте ве́рою, блаже́ннии, и приста́сте к безпеча́льному животу́, к приста́нищу вы́шния све́тлости, в сла́ву неизрече́нную.

Богоро́дичен: Ра́дости на́м Хода́таица, я́ко прие́мши исполне́ние всего́ Божества́, яви́лася еси́, Пренепоро́чная. Те́м вси́ Тебе́ ра́дость а́нгелову согла́сно зове́м, Богора́дованная.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Не в му́дрости е́ллинскаго су́етия, му́дрии, но ра́зумом боже́ственным безбо́жие обличи́сте пе́рсское, укори́вше си́х безу́мие.

Священнонача́лия просвеще́н боже́ственным помаза́нием, свяще́нный Акепси́мо, муче́ния же кро́вию себе́ украси́л еси́, богоблаже́нне.

Сокруше́ние твои́х удо́в, Ио́сифе приснопа́мятне, преле́стныя ко́зни до конца́, му́чениче, сокруши́, тебе́ же исхода́таи сла́ву нетле́нную.

Богоро́дичен: Тя́ Му́дрость Бо́жия чисте́йшее селе́ние обре́тши, от Твои́х чи́стых крове́й воплоти́ся и по Рождестве́ нетле́нну яви́.

Седа́лен, гла́с 8.

Ио́сиф, до́блий подви́жник, Акепси́ма, пре́лести губи́тель и Аифа́л сла́вный, страда́лец непобеди́мый, све́тлыя зве́зды, ве́рными в пе́снех досто́йно вои́стинну да восхва́лятся дне́сь: си́и бо пре́лесть пе́рсов очерни́ша, со́лнцу не поже́рше, ни огня́ поче́тше; к ни́мже любо́вию возопие́м: моли́те Христа́ Бо́га грехо́в оставле́ние дарова́ти пра́зднующим любо́вию святу́ю па́мять ва́шу.

Богоро́дичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ и сло́ва, непреста́нно моли́ о воспева́ющих Тя́ пода́ти оставле́ние грехо́в на́ших все́х и исправле́ние жития́ ве́рою и любо́вию при́сно сла́вящим Тя́.

Крестобогоро́дичен: Нескве́рная А́гница, А́гнца и Па́стыря пове́шена на дре́ве ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Ни́жняя презре́вше и ко еди́нем пребыва́ющим смотря́юще, те́х получи́ша жили́ща, Акепси́ма до́блий и сла́внии Ио́сиф и Аифа́л да восхва́лятся.

И́же к еди́ному Влады́це просте́ртое твое́ помышле́ние во вре́мя страда́ния, му́чениче, облегче́ния тебе́ творя́ше нестерпи́мых му́к, кре́пкий Ио́сифе, страстоте́рпче Христо́в досточу́дне.

Честно́е твое́ свиде́тельство, я́ко плодови́та лоза́ объе́млема, источа́ет вино́ ве́рным умиле́ния, Аифа́ле страстоте́рпче, веселя́щи зову́щия: сла́ва, Христе́, си́ле Твое́й.

Богоро́дичен: Свята́я Богоро́дица, в Ню́же всели́тися благоволи́, я́ко во благово́нный хра́м, Сло́во О́тчее и Равнобоже́ственное, не растле́ чистоты́, ни стужи́: и́бо роди́ Емману́ила, Бо́га и Челове́ка.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Вели́кое и честно́е призыва́я и́мя Госпо́дне, ча́шу спасе́ния страда́ний, ра́дуяся, Акепси́мо, испи́л еси́.

Вы́шняя тя́ пи́ща, зва́ннаго ра́нами, прия́т и ли́цы, Ио́сифе, му́ченичестии с ни́ми веселя́щася.

Са́д присноцвету́щий, плоды́ по́двиг твои́х концы́ пита́я, и́стинно яви́лся еси́, Аифа́ле блаже́нне.

Богоро́дичен: Све́т безле́тный на́м, О́тчее сия́ние, родила́ еси́ под ле́ты, благосты́нею бога́тства бы́вша, Пренепоро́чная.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Главе́, Акепси́мо, твое́й, отсе́ченней от телесе́, Христу́ совокупи́ ве́рою ду́шу твою́, му́чениче, неотсту́пно, та́мо су́щими заря́ми при́сно просвеща́емь.

Ка́мением, я́ко первострада́лец, му́чениче, убива́емь, не отве́рглся еси́ Ка́мене жи́зненнаго — Христа́, преходя́ к та́мо су́щим све́тлым оби́телем.

Же́злием неми́лостивно ураня́емь, ра́довашеся, же́зл име́я си́лы — Кре́ст Госпо́день, и похвалу́, страстоте́рпче Аифа́ле, богому́дре всебога́те.

Богоро́дичен: Купина́ прообразова́ше вели́кую та́йну па́че ума́ Твоего́ Рождества́, огне́м отню́д повива́ема и ника́коже опаля́ема, Де́во Всепе́тая.

Конда́к, гла́с 2.

Боже́ственная, му́дре, непоро́чно тайноводи́л еси́, же́ртва прия́тна бы́л еси́, богоблаже́нне: Христо́ву бо пи́л еси́ ча́шу сла́вно, свя́те Акепси́мо, со страда́льцы твои́ми, моля́ся непреста́нно о все́х на́с.

И́кос:

Кто́ от ве́рных возмо́жет отню́д досто́йно воспе́ти прему́драго свяще́нника Акепси́ма, свети́льника Христо́ва? То́й бо разруши́ пре́лесть и́дольскую и посрами́ де́монская ухищре́ния кре́пкою си́лою Спа́са Христа́ Бо́га, Тро́ице Пресвяте́й благоче́стно покланя́тися наказу́я, Отца́ и Сы́на и Свята́го Ду́ха во еди́ном Божестве́ почита́ти, моля́ся непреста́нно о все́х на́с.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Во огни́ муче́ния ро́су от Бо́га прие́мше, сопроти́вных пла́мы ва́шим терпе́нием погаси́сте, страстоте́рпцы, зову́ще: Бо́же оте́ц на́ших, благослове́н еси́.

И́же огню́ покло́нницы сему́ насле́дницы яви́шася, огню́ служи́ти служа́щия Со́лнцу сла́вы понужда́ху, но си́и взыва́ху: Бо́же оте́ц на́ших, благослове́н еси́.

Акепси́ма, и Ио́сиф, и Аифа́л, Тро́ицы Всечестны́я три́ свети́ла, и́же вся́ концы́ благоче́стия заря́ми облиста́юще, да почту́тся во ве́ки.

Богоро́дичен: Благослове́н Пло́д благослове́ннаго Твоего́ чре́ва, Его́же благословя́т небе́сныя си́лы и земны́х составле́ния, И́же на́с изба́вивый кля́твы пе́рвыя, Благослове́нная.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Сло́ва бы́вше прия́телища и Того́ я́звы нося́ще, мучи́телей суровство́м бре́мя, а́ки безду́шно, на безслове́сная возложи́стеся, приноси́ми ко искуше́нию мно́жайшим му́кам, му́ченицы до́блии, Христа́ превознося́ще во ве́ки.

Хода́таи сла́вы присносу́щныя, приснопа́мятнии му́ченицы, украша́еми, ра́достно ше́ствовасте, Его́же возлюби́сте свиде́тельства, сла́внии, пу́ть, зову́ще: Го́спода по́йте и превозноси́те Его́ во ве́ки.

Ни о́гнь, ни ра́ны, ни зве́ри, ни ме́чь, ни ро́в, ни сме́рть возмо́же му́ченики Твоея́ любве́ отлучи́ти, Го́споди, благи́х Исто́чниче, любве́ неистощи́мая Струя́. И́хже хва́ляще, Христе́, Тебе́ благослови́м во ве́ки.

Богоро́дичен: Еди́ну неискусому́жную Ма́терь и еди́ну тва́рей преиму́щую, го́ру пресвяту́ю, трапе́зу всезлату́ю, Богоро́дицу, пе́сньми воспева́юще, зове́м: Го́спода воспева́йте дела́ и превозноси́те Его́ во ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Благочести́выя свети́льники и пре́лести потреби́тели, разу́мнаго рая́ благово́нныя цве́ты, сосу́ды честны́я, Бо́жия красоты́ зри́тели восхва́лим.

У́гль, его́же дре́вле ви́де Иса́ия, в се́рдцы вну́трь прие́мше, и, того́ блиста́нием озаря́еми, мра́чное, му́ченицы, огня́ служе́ние отрази́сте.

Живонача́льней ны́не Тро́ице укра́шени предстоите́ и, вене́чными добро́тами просвеща́еми, па́мять творите́ о и́же на земли́, блаже́ннии, помина́ющих ва́с всегда́.

Богоро́дичен: Отча́яннаго мя́ спаси́, Спа́са заче́ншая и пло́тию ро́ждшая, Де́во, грехо́вным бо бре́менем отягча́емь, боле́зненно зову́ Ти: потща́вшися, помози́ рабу́ Твоему́.

Свети́лен.

Подъя́л еси́ я́ко безпло́тен нестерпи́мыя му́ки, Акепси́мо всехва́льне, свяще́нников сла́во, со Ио́сифом чу́дным и ди́вный Аифа́л диа́кон, Христо́в таи́нник, и́хже боле́знем страда́ния удивля́ются при́сно безпло́тных чи́ни.

Богоро́дичен: Не́сть во мне́ отню́д наде́жды спасе́ния, Де́во, я́ко зле́ впадо́х во глубину́ прегреше́ний и жду́ преще́ния стра́шныя му́ки и ко́злищ ча́сти; но уще́дри мя́ пре́жде Суда́, я́ко су́щи тепла́ Засту́пница, Богоро́дице.