Канон святым великомученику Мине Котуанскому (Фригийскому), мученикам Виктору, Стефаниде и Викентию Августопольскому (Сарогосскому)

Пе́снь 1.

Ирмо́с: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Лю́дие свяще́ннии с Моисе́ем сла́вным и с Мариа́м, жено́ю му́дрою и проро́чицею, не глубину́ Чермну́ю, но ны́не Ми́ны страда́льца проходя́ще мо́ре по́двиг сла́вно, пое́м Бо́гу на́шему, я́ко просла́вися.

Я́ростию преще́ния и ре́вностию гне́ва дыша́ свирепогуби́тель и беззако́нный мучи́тель, я́ко Христо́в во́ин, предста́ти изво́лил еси́, Ми́но, благоче́стия побо́рниче. Ему́же и свети́льник яви́лся еси́, взыва́я: пое́м Бо́гу на́шему, я́ко просла́вися.

Егда́ возвы́шуся, привлеку́ земны́я, Ты́, Христе́, проре́кл еси́, де́лом же соверши́л еси́, му́ченическия чи́ны и лю́ди от коне́ц призва́в, в ра́дости пою́щия: пое́м Бо́гу на́шему, я́ко просла́вися.

Богоро́дичен: Же́зл Ааро́нов прозя́бший, и́же от Иессе́я прообразова́ше возра́стший ко́рень Тя́, Де́во, нетле́нный цве́т ми́ру возсия́вшую, Бо́га воплоще́нна. Его́же о на́с, Богоро́дице, моли́, при́сно прибега́ющих к Тебе́.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Гони́мь прему́дрыми твои́ми словесы́, мучи́тель тя́ ураня́ет неща́дно суро́выми жи́лами говя́жиими, мне́в си́ми преклони́ти тя́, му́чениче непобеди́ме.

Взира́я очесы́ у́мными ко Го́споду, плотски́я неудобосте́рпныя му́к тя́жести претерпе́л еси́ нра́вом до́блественнейшим, достосла́вне.

Не убоя́вся муче́ний зело́ боле́зненных, дыша́ ре́вностию боже́ственною, к подвиго́м отлучи́лся еси́, зовы́й: неи́щемь, приидо́х самозва́н.

Богоро́дичен: От а́довых мя́ вра́т из Тебе́ Воплоще́йся возведе́, дре́ва вку́сом лука́вым умерщвле́ннаго, Всенепоро́чная, сме́рть во́льную прие́мый.

Седа́лен, гла́с 8.

И́же пре́жде неве́дения тмо́ю лю́тою, богому́дре му́чениче Ми́но, одержи́мый Еги́пет возсия́ тя, свети́льника всеми́рна, безбо́жия но́щь кре́пко отгоня́ща заря́ми, блаже́нне, боже́ственных по́двиг твои́х. Те́м, светоно́сный и честны́й тво́й де́нь све́тло пра́зднующе, приле́жно зове́м ти́: страда́льцев удобре́ние, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Боже́ственная ски́ния была́ еси́ Сло́ва, еди́на Пречи́стая Девома́ти, чистото́ю а́нгелы превозше́дшая, па́че все́х мене́ пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Крестобогоро́дичен: Нескве́рная А́гница, Сло́ва нетле́нная Девома́ти, на Кресте́ зря́щи пове́шена из Нея́ безболе́зненно Прозя́бшаго, матероле́пно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Кропле́нием твои́х крове́й погасо́ша у́глие многобо́жия, по́лк же де́монский погрузи́ся, Христо́ва же напои́ся Це́рковь, страстоте́рпче всеблаже́нне Ми́но, хва́лящи тя́.

И́же на дре́ве пове́шением образу́еши стра́сть, Кресто́м зми́я, му́чениче, го́рькаго умертви́вша, строга́ния терпи́ши, хода́тайствующия тебе́ наслажде́ние, и́же на небесе́х до́блественнейше.

Па́че естества́ боле́зни, страда́льче, искуше́ние прия́л еси́, и боже́ственное раче́ние, твое́ удержа́вши естество́, забве́ние прия́ти творя́ше, поуща́я тя́ простира́тися к ра́нам, веселя́щася.

Богоро́дичен: Воплоще́нна неизрече́нно, Бо́га родила́ еси́, от Твои́х крове́й до́м Себе́ созда́вшаго, во дву́х существа́х и хоте́ниих зна́емаго боголе́пно, Неискусобра́чная.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Свиде́тельства облиста́в све́тлыми луча́ми, омрачи́в те́мное безбо́жие, всему́дре, просвети́л еси́ ве́рных исполне́ния, воспева́ющих тя́, всехва́льне.

Исчезе́ вся́кое примышле́ние враго́в кре́пким твои́м терпе́нием, ни гла́д бо, ни ра́ны, ни опале́ние, ни трезу́бец озлобле́ние твоего́ усе́рдия помрачи́ша.

Ве́рою огра́ждся, я́ко со́лнце луча́ми, в пусты́ню всели́лся еси́ и гра́ды вся́ просвети́л еси́, пропове́дая Христа́, Сы́на Бо́жия, в пло́ти прише́дшаго, сла́вне.

Богоро́дичен: Новотвори́т истле́вша мя́, ражда́емый из Тебе́ па́че естества́ Изба́витель, дре́вния мя́ кля́твы свобожда́я, Богома́ти Чи́стая, Его́же моли́ спасти́ мя.

Пе́снь 6.

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Безболе́знен пребыва́еши, огне́м изнуря́емь и власяны́ми претира́емь я́звы ру́бищи: Боже́ственная бо благода́ть, спрису́тствующи, Ми́но, укрепля́ше.

Предстои́ши пред суди́щи мучи́телей, суди́мь, и, ле́сть облича́я, Ми́но всеприснопа́мятне, тебе́ сама́го сто́лп благоче́стия ве́рным подая́.

По́ты твои́х боре́ний ле́сть изсуши́л еси́ и́дольскую, тебе́ сама́го хра́м созда́л еси́ Честны́я Тро́ицы, страстоте́рпче Ми́но досточу́дне.

Богоро́дичен: Уврачи́ неисце́льныя стра́сти, Всенепоро́чная, души́ моея́, бы́лием Твоея́ бла́гости, блага́го Спа́са Христа́ су́щим в ми́ре ро́ждшая.

Конда́к, гла́с 4.

Во́инства исхити́ привре́меннаго и нетле́ннаго показа́ тя небе́снаго о́бщника, страстоте́рпче Ми́но, Христо́с, Бо́г на́ш, И́же му́чеников нетле́нный вене́ц.

И́кос:

Вели́каго хода́тай на́м е́сть весе́лия па́мять му́чеников, на стра́сти му́жество и побе́ду на враги́ показу́ющи в све́тлем и ра́достнем испове́дании благода́ти. Прииди́те у́бо в не́й, празднолю́бцы вси́, и возвесели́мся, вре́мя на́шего весе́лия лу́чшее и пребыва́ющее, Ми́ны страда́льца па́мять соверша́юще и прие́млюще страсте́й разреше́ния да́р: сего́ же да́тель Христо́с Бо́г е́сть, му́чеников нетле́нный вене́ц.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Совле́кл еси́ ра́нами ты́ ко́жныя ри́зы греха́ и во одея́ние оде́ялся еси́, не ктому́ обветша́ние прие́млющее, блаже́нне, е́же истка́ благода́ть я́вльшися.

Разжже́нием честны́х, му́чениче, и кре́пких твои́х по́двиг терно́вное и лука́вое безбо́жие пепели́тся, крове́й же тече́ньми погаша́ется неве́дения возвы́шенный пла́мень, всеблаже́нне.

Име́яй оби́льныя да́ры, и чудоде́йствия источа́еши честны́й тво́й пра́здник соверша́ющим, Ми́но досточу́дне, и соде́йствуеши пою́щим: Бо́же оте́ц, благослове́н еси́.

Богоро́дичен: Благослове́н Пло́д благослове́ннаго Твоего́ чре́ва, Его́же благословя́т небе́сныя си́лы и земны́х собра́ния, И́же на́с изба́вивый кля́твы дре́вния, Благослове́нная.

Богоро́дичен: Се́ ны́не испо́лнися Дави́да боже́ственнаго боже́ственное прорече́ние: мо́лятся и́стинно Твоему́ лицу́, Богороди́тельнице Чи́стая, иму́щии бога́тство благода́ти ны́не, благословя́ще Бо́га оте́ц на́ших.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Вене́чник, Ми́но, яви́лся еси́, враги́ Креста́ Го́спода твоего́, низложи́в у́бо, посрами́л еси́ и вопия́л еси́, всеблаже́нне: вся́ дела́ Го́спода по́йте и превозноси́те Его́ во ве́ки.

Ди́вна творя́ Бо́г в па́мяти твое́й, источа́я на́м мощми́ твои́ми душе́вная исцеле́ния и теле́сная, вопию́щим: вся́ дела́ Го́спода по́йте и превозноси́те Его́ во ве́ки.

Прине́сл еси́ Бо́гу служе́ние твое́ и на земли́, преклони́в главу́ твою́, мече́м прия́л еси́ отсече́ние, му́чениче, зовы́й: вся́ дела́ Го́спода по́йте и превозноси́те Его́ во ве́ки.

Я́ко багряни́цею и ви́ссом, кро́вию ва́шею Це́рковь украша́ется дне́сь, Ми́но, и Ви́кторе, и Вике́нтие, вопию́щи: вся́ дела́ Го́спода по́йте и превозноси́те Его́ во ве́ки.

Богоро́дичен: Де́вствует чре́во и ро́ждши Сы́на, Его́же без се́мене от Свята́го Ду́ха зача́т, Бо́га неопи́санна, в пло́ть обле́кшася, Отцу́ собезнача́льна Сло́ва. Его́же вся́ дела́, я́ко Го́спода, пою́т и превозно́сят во ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Возлюби́л еси́ па́че не ме́ньше, не́жели возлю́блен бы́л еси́, страстоте́рпче, возлю́бленную твою́ ду́шу предложи́в рачи́телю твоему́, Христу́, с Собо́ю просла́вльшему свиде́тельство твое́, приснопа́мятне.

Све́щник, све́том трисо́лнечным вжига́емь, му́чеников яви́ся тричи́сленная еди́ница, Ми́на, и Ви́ктор же, и Вике́нтий, ве́рных просвеща́ющий и мра́к де́монский отгоня́ющии.

Приими́ хвалу́, я́ко до́лг, от усе́рдия исходя́щу, превосходя́ща тя́, Ми́но, на́ших слове́с у́бо все́м, и возда́ждь безчи́сленно от сокро́вищ твои́х дарова́ния.

Богоро́дичен: Досто́йно Тя́ вси́, Ма́терь Царя́ и Влады́ки, дре́вле у́бо проро́цы хваля́ху, ны́не же апо́столи и му́ченицы, с на́ми сла́вяще, Тя́, Богоро́дицу, велича́ют.

Свети́лен.

Небеса́ зве́зды украша́ют, Иису́се, Це́рковь же Ми́на, и Ви́ктор, и Вике́нтий украша́ют и Стефани́да, и́хже ра́ди побе́ды на проти́вныя на́м да́руй.

Богоро́дичен: Вси́ ве́рнии Хода́таицу Тя́ к Ро́ждшемуся из Тебе́ ны́не предлага́ют, Всечи́стая, мы́ же мно́жае, и́же сраспина́емии Тому́. Те́м не преста́й, Де́во, за ны́ моли́тися.