Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

И́же от Нике́и, я́коже от не́коего небесе́, всю́ду возгреме́вше Сло́во Жива́го Отца́ и Сего́ показа́вше враги́, гро́мом избие́ны, свяще́нными словесы́ да почту́тся.

Духобо́рцев ду́х лука́вый Святы́м Ду́хом Христо́с от Своея́ Це́ркве дале́че отгна́, вторы́м де́йством Собо́ра совокупи́в.

Христобо́рца пре́лесть изгна́ Несто́рия Кири́лл, Собо́ра нача́льник, и́же я́сно Де́ву Мари́ю испове́да, Бо́гу Ма́терь чи́стую.

Богоро́дичен: Несозда́нныя Тро́ицы Еди́наго Христа́ во двою́ естеству́ и хоте́нию, Чи́стая, ражда́еши, соедине́ние челове́ком и а́нгелом Тебе́ ра́ди соде́лавшаго.

И́н. Гла́с 8.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Оте́ц благочести́вое собра́ние, сте́кшеся иногда́ на Евти́ха, вои́стинну Спа́са пропове́да в неразде́льных естества́х сугу́бых, боже́ственнаго отца́ Кири́лла уче́нием ше́ствующее я́ве и пребыва́ющее.

Число́ шестьсо́т тридеся́тое благочести́вейших муже́й, Евти́хову пре́лесть и Севи́рову е́ресь низло́жше, достиго́ша воспе́ти си́це: Христа́ во двою́ существу́ пропове́дуем, ше́ствующе рече́нием Кири́лла блаже́ннаго.

И́же не пропове́дует, во двою́ естеству́ и де́йствиих Христа́, Сло́во О́тчее, прии́мет ана́фему, четве́ртый бо Собо́р святы́х оте́ц единому́дренно си́це пропове́да. Вси́ у́бо и́х да ублажи́м.

Богоро́дичен: Пресла́вная о Тебе́ возглаго́лашася в ро́дех родо́в, Я́же Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е, те́м Тя́ вси́ почита́ем, по Бо́зе Предста́тельницу на́шу.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Тва́ри служи́тель я́влься А́рий безу́мный, и Македо́ний па́ки ме́рзок я́влься, в гее́нне о́гненней ра́вно му́чатся со е́ллины.

Седмию́ Собо́ры свяще́нными святы́х оте́ц честну́ю Це́рковь уясни́л еси́, Христе́, я́коже седми́х свети́льник све́том пре́лести тму́ прогна́в дале́че.

Ста́до Твое́, Сло́ве, погубля́ет многообра́зная кра́ста ерети́к, па́стырие же Твои́х слове́сных ове́ц уче́нием сие́ премени́ша.

Богоро́дичен: Еди́наго родила́ еси́, Пречи́стая, от Несозда́нныя Тро́ицы во двою́ существу́ и хоте́нию, Его́же о́бразу честно́му покланя́емся, благода́ти исполня́еми.

И́н.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

И́же Севи́ра безсту́дно прекло́ншеся словесе́м, я́да смертото́чнаго испо́лненным, посрами́теся при́сно, отлуча́ющеся вси́ Це́ркве, я́коже во́лцы и пси́ хи́щнии.

Лико́вственницы и ве́рнии, Вседе́теля и Спа́са во двою́ неразде́льных суще́ств и хоте́ниих сугу́бых и де́йствиих почита́ем, те́мже Севи́ра пре́лести в коне́ц отвраща́емся.

Прииди́те, Севи́ра и Иа́кова неблагополу́чных пре́лесть, с си́ми Феодо́сия, Диоско́ра отме́щем я́ве, четве́ртый же Собо́р благочести́вых оте́ц воспое́м пе́сньми боже́ственными.

Богоро́дичен: Херуви́м и серафи́м яви́лася еси́ вы́шши, Богоро́дице: Ты́ бо еди́на прия́ла еси́ Невмести́маго Бо́га во Твое́м чре́ве, Нескве́рная. Те́мже Тя́, вси́ ве́рнии, пе́сньми, Чи́стая, ублажа́ем.

Седа́лен, гла́с 4.

Свети́льницы пресве́тлии и́стины Христо́вы ми́ру яви́стеся на земли́, вои́стинну блаже́ннейшии, отцы́ боговеща́ннии, изсуши́вше е́реси ху́льных языковре́дий и угаси́вше пламенови́дная злосла́вных смуще́ния: те́мже, я́ко святи́телие Христо́вы, моли́теся спасти́ся на́м.

Богоро́дичен: Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Врази́ Твои́ возшуме́ша, и ненави́дящии Тя́ главу́ воздвиго́ша, Спа́се, вма́ле, но а́бие падо́ша, не терпя́ще гла́са тру́б духо́вных.

Со́лнца Со́лнцы сугу́бо озари́ша, Сы́н и Ду́х от Отца́, несозда́ни, Собезнача́льни: Обои́м Оте́ц Еди́н вино́вен ве́руется.

Се́дмь у́бо духо́в, и́же почи́ша на Христе́, Иса́ия сие́ рече́, на седми́х же Собо́рех почи́ Христо́с со Отце́м и Боже́ственным Ду́хом.

Богоро́дичен: Бо́га родила́ еси́, пло́ть носи́вшаго, от чи́стых Твои́х крове́й, Отрокови́це Чи́стая, Его́же, сугу́ба естество́м, во Ипоста́си же еди́ней, отцы́ пропове́даша.

И́н.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Рцы́ на́м, безу́мный Севи́ре и су́етный: еди́но естество́ сло́жно безнача́льно, све́т Сло́во О́тчее и Сы́на? А́ще бо си́це рече́ши, и друго́е естество́ знамена́л еси́: пло́ть бо и Сло́во, не еди́но существо́, но сугу́бо су́щее, окая́нне.

Еди́но ре́кши естество́ Сло́ва, наведе́ вопло́щшееся естество́ челове́чества, кроме́ измене́ния вся́чески и смеше́ния, александри́ом учи́тель же и председа́тель, я́сно два́ естества́ и хоте́ния науча́я правосла́вно му́дрствовати хотя́щих.

Два́ естества́ Христо́ва вси́ пропове́даем неслия́нно, вся́кое нече́стие Евти́хия, ве́рнии, а́бие и Диоско́ра безу́мнаго попира́юще, после́дуем преде́лу святы́х оте́ц и Кири́лла боже́ственнаго рече́нием.

Богоро́дичен: Херуви́мское носи́ло Ты́, Богома́ти Чи́стая, Ты́ вмести́лище, Ты́ и прия́телище Сло́ва О́тча и Бо́га, от пречи́стых ложе́сн в пло́ть обле́кшагося. Те́мже, во двою́ существу́ из Тебе́ Вопло́щшемуся покланя́ющеся, непреста́нно сла́вим.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Боже́ственный виногра́д Христо́в, и́же от Еги́пта пренесе́н, те́мнаго отча́янна губи́теля зве́рие пе́рвее пояда́ху, пра́щею же святы́х оте́ц дале́че отгна́шася.

Боже́ственным сия́нием трисия́нным у́м просве́щше, честни́и отцы́ Еди́наго пропове́даша Честны́я Тро́ицы Христа́ Го́спода, сугу́ба естествы́ и хоте́нии.

Тро́ичен: В ве́щных, я́коже в серафи́мских, му́дрыми отцы́, о Тро́ице, Це́рковь онебеси́ся, трисвяту́ю пе́снь при́сно Тебе́ пою́щи, собира́ет Тро́ическое Твое́ Еди́но Божество́.

Богоро́дичен: Ма́ти и раба́ Твоего́ Сы́на была́ еси́, Чи́стая, и́бо И́же из Тебе́ пре́жде Тебе́ бя́ше, я́ко Соде́тель Тво́й, Его́же во двою́ существу́ познава́ем и соединя́ем Сло́вом Ипоста́сным.

И́н.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

О, Севи́ре! Есте́ств Христо́вых не слива́й лю́те, законопресту́пне, и́бо жри́телие и преблаже́ннии учи́телие вси́, во двою́ существу́ и во еди́ном Христо́вом Лице́ провозвести́вше, все́м изложи́ша.

Прия́т естество́ челове́ческое я́ве Безнача́льный, О́тчее Сло́во, я́ко Человеколю́бец, хотя́ уще́дрити на́с, поги́бших. Те́мже Того́ пропове́дую во двою́ существу́ и хоте́нию.

Низложи́в Севи́ра четве́ртый Собо́р и Диоско́ра, Христа́ ху́лящия, извеща́я сви́ток Ле́онта, первоседа́льника Ри́мскаго, зело́ до́бре, сугу́ба естества́ Спа́сова несеко́мо явля́я.

Богоро́дичен: Ма́тернее дерзнове́ние, е́же к Сы́ну Твоему́ иму́щи, Всечи́стая, сро́днаго промышле́ния, е́же о на́с, не пре́зри, мо́лимся, я́ко Тебе́ и еди́ну, христиа́не, ко Влады́це очище́ние ми́лостивно предлага́ем.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Бо́г бого́в Госпо́дь, — Дави́д, пре́жде воспе́в, — глаго́ла и призва́ от восто́к, от коне́ц всея́ земли́, да́же до за́пад и́х, — Вселе́нския Собо́ры оте́ц назна́менуя.

Се́дмь столпо́в утверди́ прему́дрость Бо́жия, Твою́ Це́рковь, Влады́ко, седмочи́сленными Собо́ры свяще́нных оте́ц неукло́нну соблюда́ему от вся́ких ересе́й.

Сты́д лица́ да покры́ет Евти́ха и Диоско́ра, слия́ние буесло́вивших естества́ Христо́ва: не в привиде́нии бо, но во обоже́нии естество́ земноро́дных прия́т.

Богоро́дичен: Да во́змется Несто́рий во евре́йския те́мныя собо́ры, и язы́к же отсече́тся ху́льный: Бо́га бо роди́ Де́ва Мари́я, Плотоно́сца на́м.

И́н.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Два́ посла́ния Кири́лла, я́же ко Си́нгелу по́сланная иногда́, восто́ку преоблада́ющу, облича́ют Севи́рову всю́ пре́лесть, благоче́стно Христа́ пропове́дующая.

Кири́лл Христа́ пропове́дует во двою́ естеству́ и де́йствиих сугу́бых, Севи́ра несмы́сленнаго е́ресь отсеца́я. Те́мже вси́ во уче́ниих того́ пребу́дем.

Богоро́дичен: Де́ву Тя́ и Чи́стую Пресла́вную, Богороди́тельнице Мари́е, благочести́вии, вои́стинну пропове́дуем, загражда́юще безсту́дная уста́ Несто́рия, и Диоско́ра зломы́слие.

Конда́к, гла́с 8.

Апо́стол пропове́дание и оте́ц догма́ты Це́ркве еди́ну ве́ру запечатле́ша, я́же и ри́зу нося́щи и́стины, истка́нну от е́же свы́ше богосло́вия, исправля́ет и сла́вит благоче́стия вели́кое та́инство.

И́кос:

Высо́ким пропове́данием Бо́жию Це́рковь услы́шим, вопию́щу: жа́ждай, да гряде́т ко мне́ и пие́т ча́шу, ю́же держу́, ча́ша е́сть прему́дрости. Сие́ питие́ и́стины сло́вом почерпо́х, во́ду пролива́ющую не прекосло́вия, но испове́дания, ю́же пия́, ны́нешний Изра́иль Бо́га зри́т, веща́юща: ви́дите, ви́дите, я́ко Са́м А́з е́смь и не пременя́юся: А́з Бо́г пе́рвый, А́з же и по си́х, и ра́зве Мене́, не́сть ино́го отню́д. Отсю́ду причаща́ющиися насы́тятся и восхва́лят благоче́стия вели́кое та́инство.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Вавило́нскаго у́бо зми́я разрази́ Дании́л пе́рвее, моли́твами же оте́ц прося́деся лю́тый еги́петский зми́й, я́ве А́рий, пояда́ющий Христо́во ста́до.

Непроще́ным нече́стием негодова́ во́лк Македо́ний, прирази́вся Ду́ху, обожа́ющему челове́ки и вся́ ба́нею креще́ния на пе́рвую добро́ту вообража́ющу ве́рныя.

Диоско́р, и Евти́х, и Севи́р левиафа́м, трие́, слива́ющии и смеша́ющии Христо́ва существа́ смеше́нием у́мным, к Тро́ице Честне́й прирази́шася де́рзостию.

Богоро́дичен: Плотска́го Твоего́ зра́ка о́браз, Влады́ко, че́стно облобыза́ем, и Ма́тере Твоея́, и святы́х все́х, по́честь ве́дяще пра́вым по́мыслом преходи́ти до́бре к первообра́зному.

И́н.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Во двою́ у́бо естеству́ и де́йствиях испове́дающе Христа́, несли́тне, непрело́жне, пре́лесть Севи́ра побежда́ем, те́мже, пло́ти прия́тием стра́сть претерпе́вшему, вопие́м Ему́: благослове́н Бо́г оте́ц на́ших.

Еди́наго разуме́ем, И́же на дре́ве и в не́дрех Оте́ческих, я́ко Бо́га в вы́шних и во гро́бе, я́ко совокупле́нна пло́тию. Ему́же пое́м, согла́сно взыва́юще: благослове́н еси́, Бо́же оте́ц на́ших.

А́риево истоща́ние, пресече́ние же, Бо́га умаля́ющаго, ве́рнии, соединомы́слие а́бие Саве́ллиево, Тро́ическия враги́ возненави́девше, Тро́ице возопие́м: благослове́н Бо́г оте́ц на́ших.

Тро́ичен: Все́х у́бо Госпо́дь, Еди́наго же то́чию Единоро́днаго Сы́на, правосла́вно Отца́ богосло́вяще, Тя́ возвеща́ем, и Еди́н ве́дяще Тво́й исходя́щий Ду́х, пра́в, сра́слен и соприсносу́щен.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́коже еди́наго ко́рене о́трасли Богоса́дны, Сы́н и Ду́х возсия́вше: и́бо Оте́ц Единовино́вен е́сть, Безле́тный, Безле́тным Ли́цам Единоче́стен.

Из чре́ва невеще́ственна безле́тно возсия́л еси́, Единосу́щное Сло́во Отцу́ и Ду́ху, но на́с ра́ди в ле́тнюю всели́ся веще́ственную утро́бу еди́ныя Богоро́дицы.

Разжже́нныя стре́лы огне́м духо́вным в студе́ная сердца́ враго́в вонзо́шася еретико́в и на сме́рть удави́ша и́х совокупле́нии оте́ц седмочи́сленных и боже́ственных.

Богоро́дичен: Не ли́цы Еди́наго Христа́ сла́вим, не смеше́нием существа́ Сего́ соединя́ем: Еди́н бо Сы́й и То́йже Лице́м, раздвоя́ется естествы́, Де́во, Тво́й Сы́н и Соде́тель.

И́н.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Да постыдя́тся ли́ца, и да заградя́тся уста́, не пропове́дающих во двою́ естеству́ несеко́мо, непрело́жно же и несли́тно, Еди́наго Сы́на: благочести́вии бо мы́ прославля́ем, и́нако у́бо и и́нако, де́йствовати же и хоте́ти Христу́, не у́бо ли́цы, но во двои́х естества́х.

И́же Иа́кова иму́щии Кенто́на назва́ние, того́жде и́мя себе́ напису́ющии, отвеща́йте на́м: а́ще в назва́нии его́ вы́ в купе́ли крести́стеся дре́вле? Те́мже си́х ра́ди благода́ти Христа́ отступи́сте вои́стинну, во́лею со лжи́вым си́м безсту́дствующе.

В Халкидо́не Собо́р четве́ртый Диоско́ра, Евти́ха же и Севи́ра лю́тых низложи́, и до конца́ отсече́ терно́вную и́х пре́лесть, слия́тельную суще́ств Спа́совых, от Це́ркве Христа́ и Влады́ки; с не́юже правосла́вящии, возненави́дим си́х.

Тро́ичен: Трисве́тлую Божества́ еди́нственную сия́ющую зарю́ от Еди́наго Триипоста́снаго Естества́: Роди́теля Безнача́льна, сра́слена же Сло́ва О́тча и сца́рствующий Единосу́щный Ду́х, де́ти, благослови́те, свяще́нницы, воспо́йте, лю́дие, превозноси́те Его́ во вся́ ве́ки.

Богоро́дичен: Богороди́тельнице Пречи́стая, души́ моея́ я́звы и грехо́вныя собла́зны очи́сти, исто́чником омыва́ющи из ре́бр Сы́на Твоего́ и и́же из ни́х исте́кшими струя́ми, к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Не подоба́ет приложи́ти или́ оста́вити что́ свяще́ннаго преда́ния правосла́вныя на́шея ве́ры: в не́йже бо ве́рно крести́хомся, а и́же приложи́тели сея́ ве́ры впра́вду пре́дани бу́дут преще́нию прокля́тия.

Ра́достию се́рдца вси́ взыгра́им, свяще́нныя Собо́ры оте́ц совоку́пльше: те́х бо ра́ди све́т ви́дехом правосла́вия. Свети́льницы бо яви́шася, вся́ наставля́юще к пра́вым уче́ния обре́тением.

Душа́м испро́сим очище́ние и благоче́стно житие́ препроводи́ти потщи́мся, я́ко да прича́стницы бу́дем святы́м отце́м, и́же скры́ша пра́вых уче́ний бога́тство на́м, ча́дом и́х.

Богоро́дичен: Бо́г от боку́ Твое́ю возсия́, Ма́ти Бо́жия, и челове́ческий ро́д обожи́, и сла́вы Своея́ сподо́би, и насле́дники вся́ показа́, и́же Тя́ Богоро́дицу вои́стинну при́сно пропове́дающия.

И́н.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Преше́д Севи́р Христо́ву благосла́вную Це́рковь льсти́вый, и отмще́ние сове́том оте́ц благочести́вых хуле́ния ра́ди и хитростносло́вия своего́ прия́т пра́ведно, и отрева́ется учи́телей сосло́вия, осужде́нный.

Естества́ Христо́ва что́ слива́еши и смеше́ние вво́диши и сли́тие, кре́стную стра́сть и погребе́ние прилага́яй безстра́стному Божеству́ Единоро́днаго Сло́ва Бо́жия, о окая́нне Севи́ре? Те́мже вели́каго твоего́ хуле́ния гнуша́емся.

Богоро́дичен: Бро́ви и де́рзость вку́пе вражде́бных рожде́йся от Де́вы низложи́ и сове́ты злосло́вящих Соде́теля, ве́рных же Собо́р утверди́ непоколе́блемь, я́ко Бо́г, ро́г вознесы́й и ве́рою укрепи́вый, да Тя́ вси́ велича́ем.

Свети́лен.

Оте́ц Боже́ственных дне́сь па́мять пра́зднующе, моле́ньми те́х мо́лим, Всеще́дре: вся́каго вре́да ересе́й изба́ви лю́ди Твоя́, Го́споди, и вся́ сподо́би Отца́, Сло́во сла́вити и Всесвята́го Ду́ха.

Богоро́дичен: Ра́дуйся, Бо́жия пала́то. Ра́дуйся, горо́ присе́нная. Ра́дуйся, неопали́мая купино́. Ра́дуйся, престо́ле сла́вы. Ра́дуйся, Боже́ственная трапе́зо. Ра́дуйся, ру́чко всезлата́я. Ра́дуйся, свети́льниче всесве́тлый. Ра́дуйся, ле́гкий о́блаче, Де́во Ма́ти Мари́е.