В коне́ц, о та́йных Сы́на, псало́м Дави́ду, 9.

Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́. Возвеселю́ся и возра́дуюся о Тебе́, пою́ и́мени Твоему́, Вы́шний. Внегда́ возврати́тися врагу́ моему́ вспя́ть, изнемо́гут и поги́бнут от лица́ Твоего́. Я́ко сотвори́л еси́ су́д мо́й и прю́ мою́, се́л еси́ на Престо́ле, судя́й пра́вду. Запрети́л еси́ язы́ком, и поги́бе нечести́вый, и́мя его́ потреби́л еси́ в ве́к и в ве́к ве́ка. Врагу́ оскуде́ша ору́жия в коне́ц, и гра́ды разруши́л еси́, поги́бе па́мять его́ с шу́мом. И Госпо́дь во ве́к пребыва́ет, угото́ва на су́д престо́л Сво́й, и То́й суди́ти и́мать вселе́нней в пра́вду, суди́ти и́мать лю́дем в правоте́. И бы́сть Госпо́дь прибе́жище убо́гому, помо́щник во благовре́мениих, в ско́рбех. И да упова́ют на Тя́ зна́ющии и́мя Твое́, я́ко не оста́вил еси́ взыска́ющих Тя́, Го́споди. По́йте Го́сподеви, живу́щему в Сио́не, возвести́те во язы́цех начина́ния Его́, я́ко взыска́яй кро́ви и́х помяну́, не забы́ зва́ния убо́гих. Поми́луй мя́, Го́споди, ви́ждь смире́ние мое́ от вра́г мои́х, вознося́й мя́ от вра́т сме́ртных, Я́ко да возвещу́ вся́ хвалы́ Твоя́ во врате́х дще́ре Сио́ни, возра́дуемся о спасе́нии Твое́м. Углебо́ша язы́цы в па́губе, ю́же сотвори́ша, в се́ти се́й, ю́же скры́ша, увязе́ нога́ и́х. Зна́емь е́сть Госпо́дь судьбы́ творя́й, в де́лех руку́ свое́ю увязе́ гре́шник. Да возвратя́тся гре́шницы во а́д, вси́ язы́цы забыва́ющии Бо́га. Я́ко не до конца́ забве́н бу́дет ни́щий, терпе́ние убо́гих не поги́бнет до конца́. Воскресни́, Го́споди, да не крепи́тся челове́к, да су́дятся язы́цы пред Тобо́ю. Поста́ви, Го́споди, законоположи́теля над ни́ми, да разуме́ют язы́цы, я́ко челове́цы су́ть. Вску́ю, Го́споди, отстоя́ дале́че, презира́еши во благовре́мениих, в ско́рбех? Внегда́ горди́тися нечести́вому, возгара́ется ни́щий, увяза́ют в сове́тех, я́же помышля́ют. Я́ко хвали́мь е́сть гре́шный в по́хотех души́ своея́, и оби́дяй благослови́мь е́сть. Раздражи́ Го́спода гре́шный, по мно́жеству гне́ва своего́ не взы́щет, не́сть Бо́га пред ни́м. Оскверня́ются путие́ его́ на вся́ко вре́мя, отъе́млются судьбы́ Твоя́ от лица́ его́, все́ми враги́ свои́ми облада́ет. Рече́ бо в се́рдце свое́м, не подви́жуся от ро́да в ро́д без зла́, его́же кля́твы уста́ его́ по́лна су́ть, и го́рести и льсти́, под язы́ком его́ тру́д и боле́знь. Приседи́т в лови́тельстве с бога́тыми в та́йных, е́же уби́ти непови́ннаго, о́чи его́ на ни́щаго призира́ете. Лови́т в та́йне я́ко ле́в во огра́де свое́й, лови́т е́же восхи́тити ни́щаго, восхи́тити ни́щаго, внегда́ привлещи́ и́ в се́ти свое́й. Смири́т его́, преклони́тся и паде́т, внегда́ ему́ облада́ти убо́гими. Рече́ бо в се́рдце свое́м: забы́ Бо́г, отврати́ лице́ Свое́, да не ви́дит до конца́. Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Чесо́ ра́ди прогне́ва нечести́вый Бо́га? Рече́ бо в се́рдце свое́м: не взы́щет. Ви́диши, я́ко Ты́ боле́знь и я́рость смотря́еши, да пре́дан бу́дет в ру́це Твои́, Тебе́ оста́влен е́сть ни́щий, си́ру Ты́ бу́ди помо́щник. Сокруши́ мы́шцу гре́шному и лука́вому, взы́щется гре́х его́ и не обря́щется. Госпо́дь Ца́рь во ве́к и в ве́к ве́ка, поги́бнете, язы́цы, от земли́ Его́. Жела́ние убо́гих услы́шал еси́, Го́споди, угото́ванию се́рдца и́х вня́т у́хо Твое́. Суди́ си́ру и смире́ну, да не приложи́т ктому́ велича́тися челове́к на земли́.

В коне́ц, псало́м Дави́ду, 10.

На Го́спода упова́х, ка́ко рече́те души́ мое́й: превита́й по гора́м, я́ко пти́ца? Я́ко се́, гре́шницы наляко́ша лу́к, угото́ваша стре́лы в ту́ле, состреля́ти во мра́це пра́выя се́рдцем. Зане́ я́же Ты́ соверши́л еси́, они́ разруши́ша, пра́ведник же что́ сотвори́? Госпо́дь во хра́ме святе́м Свое́м. Госпо́дь, на небеси́ престо́л Его́, о́чи Его́ на ни́щаго призира́ете, ве́жди Его́ испыта́ете сы́ны челове́ческия. Госпо́дь испыта́ет пра́веднаго и нечести́ваго, любя́й же непра́вду ненави́дит свою́ ду́шу. Одожди́т на гре́шники се́ти, о́гнь и жу́пел, и ду́х бу́рен ча́сть ча́ши и́х. Я́ко пра́веден Госпо́дь, и пра́вды возлюби́, правоты́ ви́де лице́ Его́.

Сла́ва:

В коне́ц, о осме́й, псало́м Дави́ду, 11.

Спаси́ мя, Го́споди, я́ко оскуде́ преподо́бный, я́ко ума́лишася и́стины от сыно́в челове́ческих. Су́етная глаго́ла ки́йждо ко и́скреннему своему́, устне́ льсти́выя в се́рдце, и в се́рдце глаго́лаша зла́я. Потреби́т Госпо́дь вся́ устны́ льсти́выя, язы́к велере́чивый, ре́кшыя: язы́к на́ш возвели́чим, устны́ на́ша при на́с су́ть, кто́ на́м Госпо́дь е́сть? Стра́сти ра́ди ни́щих и воздыха́ния убо́гих ны́не воскресну́, глаго́лет Госпо́дь, положу́ся во спасе́ние, не обиню́ся о не́м. Словеса́ Госпо́дня словеса́ чи́ста, сребро́ разжже́но, искуше́но земли́, очище́но седмери́цею. Ты́, Го́споди, сохрани́ши ны́ и соблюде́ши ны́ от ро́да сего́ и во ве́к. О́крест нечести́вии хо́дят, по высоте́ Твое́й умно́жил еси́ сы́ны челове́ческия.

В коне́ц, псало́м Дави́ду, 12.

Доко́ле, Го́споди, забу́деши мя́ до конца́? Доко́ле отвраща́еши лице́ Твое́ от мене́? Доко́ле положу́ сове́ты в души́ мое́й, боле́зни в се́рдце мое́м де́нь и но́щь? Доко́ле вознесе́тся вра́г мо́й на мя́? При́зри, услы́ши мя́, Го́споди Бо́же мо́й, просвети́ о́чи мои́, да не когда́ усну́ в сме́рть, да не когда́ рече́т вра́г мо́й, укрепи́хся на него́. Стужа́ющии ми́ возра́дуются, а́ще подви́жуся. А́з же на ми́лость Твою́ упова́х, возра́дуется се́рдце мое́ о спасе́нии Твое́м, воспою́ Го́сподеви благоде́явшему мне́ и пою́ и́мени Го́спода Вы́шняго.

В коне́ц, псало́м Дави́ду, 13.

Рече́ безу́мен в се́рдце свое́м: не́сть Бо́г. Растле́ша и омерзи́шася в начина́ниих, не́сть творя́й благосты́ню. Госпо́дь с небесе́ прини́че на сы́ны челове́ческия, ви́дети, а́ще е́сть разумева́яй или́ взыска́яй Бо́га. Вси́ уклони́шася, вку́пе неключи́ми бы́ша: не́сть творя́й благосты́ню, не́сть до еди́наго. Ни ли́ уразуме́ют вси́ де́лающии беззако́ние, снеда́ющии лю́ди моя́ в сне́дь хле́ба? Го́спода не призва́ша. Та́мо убоя́шася стра́ха, иде́же не бе́ стра́х, я́ко Госпо́дь в ро́де пра́ведных. Сове́т ни́щаго посрами́сте, Госпо́дь же упова́ние его́ е́сть. Кто́ да́ст от Сио́на спасе́ние Изра́илево? Внегда́ возврати́т Госпо́дь плене́ние люде́й Свои́х, возра́дуется Иа́ков, и возвесели́тся Изра́иль.

Сла́ва:

В коне́ц, псало́м Дави́ду, 14.

Го́споди, кто́ обита́ет в жили́щи Твое́м? Или́ кто́ всели́тся во святу́ю го́ру Твою́? Ходя́й непоро́чен и де́лаяй пра́вду, глаго́ляй и́стину в се́рдце свое́м. И́же не ульсти́ язы́ком свои́м и не сотвори́ и́скреннему своему́ зла́, и поноше́ния не прия́т на бли́жния своя́. Уничиже́н е́сть пред ни́м лука́внуяй, боя́щияжеся Го́спода сла́вит, клены́йся и́скреннему своему́ и не отмета́яся. Сребра́ своего́ не даде́ в ли́хву и мзды́ на непови́нных не прия́т. Творя́й сия́ не подви́жится во ве́к.

Столпописа́ние, Дави́ду, 15.

Сохрани́ мя, Го́споди, я́ко на Тя́ упова́х. Ре́х Го́сподеви: Госпо́дь мо́й еси́ Ты́, я́ко благи́х мои́х не тре́буеши. Святы́м, и́же су́ть на земли́ Его́, удиви́ Госпо́дь вся́ хоте́ния Своя́ в ни́х. Умно́жишася не́мощи и́х, по си́х ускори́ша: не соберу́ собо́ры и́х от крове́й, ни помяну́ же име́н и́х устна́ма мои́ма. Госпо́дь ча́сть достоя́ния моего́ и ча́ши моея́, Ты́ еси́ устроя́яй достоя́ние мое́ мне́. У́жя нападо́ша ми́ в держа́вных мои́х, и́бо достоя́ние мое́ держа́вно е́сть мне́. Благословлю́ Го́спода, вразуми́вшаго мя́, еще́ же и до но́щи наказа́ша мя́ утро́бы моя́. Предзре́х Го́спода предо мно́ю вы́ну, я́ко одесну́ю мене́ е́сть, да не подви́жуся. Сего́ ра́ди возвесели́ся се́рдце мое́, и возра́довася язы́к мо́й, еще́ же и пло́ть моя́ всели́тся на упова́нии. Я́ко не оста́виши ду́шу мою́ во а́де, ниже́ да́си преподо́бному Твоему́ ви́дети истле́ния. Сказа́л ми́ еси́ пути́ живота́, испо́лниши мя́ весе́лия с лице́м Твои́м, красота́ в десни́це Твое́й в коне́ц.

Моли́тва Дави́ду, 16.

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, о́чи мои́ да ви́дита правоты́. Искуси́л еси́ се́рдце мое́, посети́л еси́ но́щию, искуси́л мя́ еси́, и не обре́теся во мне́ непра́вда. Я́ко да не возглаго́лют уста́ моя́ де́л челове́ческих, за словеса́ усте́н Твои́х а́з сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. А́з воззва́х, я́ко услы́шал мя́ еси́, Бо́же, приклони́ у́хо Твое́ мне́ и услы́ши глаго́лы моя́. Удиви́ ми́лости Твоя́, спаса́яй упова́ющыя на Тя́ от проти́вящихся десни́це Твое́й. Сохрани́ мя, Го́споди, я́ко зе́ницу о́ка, в кро́ве крилу́ Твое́ю покры́еши мя́. От лица́ нечести́вых остра́стших мя́, врази́ мои́ ду́шу мою́ одержа́ша. Ту́к сво́й затвори́ша, уста́ и́х глаго́лаша горды́ню. Изгоня́щии мя́ ны́не обыдо́ша мя́, о́чи свои́ возложи́ша уклони́ти на зе́млю. Объя́ша мя́ я́ко ле́в гото́в на ло́в и я́ко ски́мен обита́яй в та́йных. Воскресни́, Го́споди, предвари́ я́ и запни́ и́м, изба́ви ду́шу мою́ от нечести́ваго, ору́жие Твое́ от вра́г руки́ Твоея́, Го́споди, от ма́лых от земли́, раздели́ я́ в животе́ и́х, и сокрове́нных Твои́х испо́лнися чре́во и́х, насы́тишася сыно́в, и оста́виша оста́нки младе́нцем свои́м. А́з же пра́вдою явлю́ся лицу́ Твоему́, насы́щуся, внегда́ яви́тимися сла́ве Твое́й.

Сла́ва:

По 2‑й кафи́сме: Трисвято́е, по О́тче на́ш:

Тропари́, гла́с 2:

А́з сы́й дре́во непло́дное, Го́споди, умиле́ния плода́ не ношу́ отню́д и посече́ния страшу́ся, и огня́ о́наго бою́ся негаси́маго. Те́мже Тя́ молю́: пре́жде о́ныя ну́жды обрати́ и спаси́ мя.

Я́ко во́лны морски́я, на мя́ возста́ша беззако́ния моя́, я́ко корабле́ц в пучи́не, а́з еди́н обурева́юся от прегреше́ний мно́гих, но в ти́хое приста́нище наста́ви мя́, Го́споди, покая́нием и спаси́ мя.

Сла́ва: Поми́луй мя́, рече́ Дави́д, и а́з Тебе́ зову́: согреши́х, Спа́се, грехи́ моя́ очи́стив покая́нием, поми́луй мя́.

И ны́не: Предста́тельство те́плое христиа́н, Сы́на Твоего́ моли́, Богоро́дице, вся́каго злоде́йства и лю́тости изба́вити на́с ра́тника, и да́ти проще́ние на́м, о ни́хже согреши́хом, милосе́рдия ра́ди щедро́т, Твои́ми моли́твами, Ма́ти Де́во.

Го́споди, поми́луй, (40).

Моли́тва.

Влады́ко Вседержи́телю, О́тче Го́спода на́шего Иису́са Христа́, Единоро́днаго Твоего́ Сы́на, да́ждь ми́ те́ло нескве́рное, се́рдце чи́стое, у́м бо́др, ра́зум незаблу́дный, Ду́ха Свята́го наше́ствие, к стяжа́нию и дово́льству и́стины во Христе́ Твое́м: с Ни́мже Тебе́ сла́ва подоба́ет, че́сть и поклоне́ние, со Святы́м Ду́хом ны́не и при́сно, и во ве́ки веко́в, ами́нь.